[#23 教會playgroup有幾好玩?! 唔止玩仲有得食?! ]

話說同肥蕎仔係water park餵左天鵝、係農莊餵左moo moo，又同佢去圖書館 “精進”，小朋友點都要d群體活動一齊玩下開心d，又可以睇下佢點同本地既小朋友互動下。

咁就上網search 下 “church playgroup”，發覺屋企附近其實有唔少教會都有係夏天既時間舉辦playgroup，比小朋友係教會既地方玩下玩具或者team up玩下遊戲，家長又可以放鬆聯誼下吹水，一舉兩得。

今次就黎到Elmwood Church，佢地逢禮拜三朝早都會有兩小時開放時間，入場費係2鎊，現場都有一個藍球場咁大比大人細佬可以活動，就咁睇d玩具都係target比4歲以下既小朋友玩，佢又分左唔同既小區域，呢邊有d小朋友一齊玩車車，將d車車推入同一個停車場、個邊就一齊睇書書，有兩三個仲唱歌唱得好開心、另一邊就有滑梯同埋小型交通工具，見到大小小既大概3-4歲都鐘意玩呢類，現場就咁睇d小朋友都好開心，但最開心好似係d家長，因為好多都好似定期黎一早識哂，早已經企埋一邊角落係度吹水勁開心。

肥蕎仔當然唔執輸，樣樣都玩下，仲同現場既靚仔英國哥哥一齊玩車車添，阿囡，你真識食!

然後其實呢度都幾貼心，你驚太早黎未食早餐? 呢度其實有個小食亭，教會auntie會不停勘野飲，milk tea、coffee、chocolate，適隨專便，仲有餅同埋一d小食比你包你唔會肚餓。

我地仲同教會既哥哥仔Matt傾左陣計，佢話佢都知道香港既情況，早前係教會亦遇過另一個港人家庭，整體印象都好好咁話，歡迎我地定期去玩同埋認識下教會既本地朋友。除左playgroup，因為lockdown完左，黎緊仲會搞其他既活動岩大人細佬一齊參加，仲叫我地快d登記!

臨完之前教會auntie Cheryl仲有個講故事同唱歌歌時間，肥蕎仔咁岩撞正佢成日聽既兒歌仲同其他小朋友一齊大合唱添!

呢d教會活動其實令我諗起香港既聖類斯中學，因為自己細個其實係西環英皇書院讀書，同聖類斯好近。

仲記得個時星期六晏晝或者星期日朝早都有去聖類斯中學既鮑思高教會玩，佢係無宗教野迫你要讀或者睇聖經，而係你係門口排隊就可以入去玩。

我仲記得有好多益智活動，包括球類運動、踩單車、康樂棋、roller、攤位遊戲，最正係有得玩電子遊戲，講緊係當年hit到爆既紅白機同埋任天堂都有得玩，全部免費大家輪住玩唔會爭先恐後，而且個場係勁勁勁大，我諗有一個足球場咁大，個時係同埋幾個小學同學一齊去超開心，係個度仲透過遊戲識到好多朋友互相切磋同埋交流技術，童年本應就係咁，而唔係成日對住部電視或者電話。

然後如果你玩左某d活動，仲有得吸印仔，儲夠印仔係可以係小食部換零食同埋野飲，我而家諗起都仲係覺得好開心好熱血沸騰，好感恩好多謝鮑思高既創辦人真係好有善心，為社區帶黎歡樂，亦幫到好多年青人唔會學壞，反而有d野可以學下充實自己，同埋結識一d朋友互相學習。

#多謝你 #聖類斯中學 #鮑思高 #uk #bno #uklife #英國生活 #香港人在英國 #Ukmrpr #manchester #church #playgroup #fun #time #singing #story #sharing #快樂童年 #childhood _______ Facebook: fb.com/Ukmrpr Instagram: instagram.com/ukmrpr/ Youtube: https://youtube.com/channel/UCDIhO0JrstXzy1njvsnH4Dw 我囡囡肥蕎仔IG: instagram.com/kiukiubelle