top of page
Search

[#26 一返早全部manager係齊度究竟搞邊科?! 係賭場賭客可以keep住嬴錢真唔真?! ]

話說返左幾日工今日終於可以返早，而返早係講緊朝早6點到晏晝2點，諗落都幾正，收左工仲有大把時間可以做野，加上朝早工作應該幾輕鬆，邊有賭鬼神咁早起身去賭?!


一返到黎，咦? 乜咁齊人既，店長係度，manager係度，supervisor係度，財務部同事全部都係度，唔通朝頭早一齊happy下打邊爐?! 係諗緊既同時有d同事已經開始移開老虎機前面d凳，仲慢慢打開緊每部機，場面都幾壯觀，原來每個禮拜既呢一日都係money take，會將機入面既錢羅哂出黎數同bank in，俗稱 “吸血”。


咁我當然就即刻幫手啦，由於要數錢既關係，好自然我要睇哂同數哂每部機既所有50鎊以下既紙幣同硬幣，而第一次我係覺得錢係可以好重XD 因為每部機入面都有海量既1鎊，多到可以掟死人，要一袋袋咁羅去有保安同夾萬既所謂 “電腦房”核數。而我亦係呢個時候望真哂所有50鎊以下紙幣同硬幣既樣。


然後我係啪住supervisor同事Heather一齊做野，咁佢係一個英國女仔黎既，仲有一頭金髮。咁由於每部機都要打開黎scan code同數錢，而有d舊機個介面呢就要按老虎機上面d制黎操作先record到所需既code既。


咁呢個時候我地一齊去左d舊機個度，Heather就係咁按部機d制入去某d介面度，但佢又有時按過龍，要慢慢按返去某d介面先記錄到d code，我睇睇下就忍唔住大笑左出黎。


heather: What are you laughing at, Sam?

我: Wow, I don’t even know you can play a slot machine like this! Nobody has ever played like a pro like you! This is the latest and most fashionable way of playing a slot machine I have ever seen!

+然後我地一齊爆笑左大概10秒，停唔到... XD

我: Heather, you are really a game changer! No wonder the customer love you so much!


(事緣係我之前企係間舖度曾經見過有d中年阿叔入黎話要搵佢，有同事就話呢d客成日入黎想同佢傾計，又問佢羅電話但唔成功，仲曾經示愛添! 我聽到個下真係笑左 XD)


我地又繼續爆笑左超過20秒有多停唔到，因為呢度d老虎機全部係好似玩game咁係有故事模式，唔似澳門係咁拉拉拉好快玩完，所以話佢係game changer其實有d語帶雙關，佢笑到成塊面紅哂停唔到。


宏觀現場，所有老虎機都開哂嘔錢出黎其實都幾震撼，咁其實呢間野不嬲都開24小時既，唯獨呢一日朝早有三個鐘呢就會數錢，數錢係我心目中其實都應該自動化，你諗下澳門咁多部機如果要數錢咪要刪埋門數幾日? 所以都好surprise呢度竟然係人手money take而唔係自動化。


----------

√係呢度如果你想賭係好容易既事? 因為梗有一間賭場係左近，特別係曼城市中心， china town個邊直情有三間casino/slot machine場。


√賭注小至10p都有得賭，jackpot一獲最多可以有500鎊 (唔鼓勵賭博，你估小賭真係可以怡情，大賭堅係可以變李嘉誠? 全部bullshit黎，好多經營博彩業既老闆都係唔賭錢既，咁你參透到d乜?)


√舖頭總有幾個老人家係常客成日都黎賭，你以為佢地一定成日輸錢? 佢地有幾個唔係輸而係成日嬴小錢，因為我有企係佢地後面觀察 XD 事後問返舖頭技術人員都有講過有d機如果個本夠大，keep住拉部機係有機會小嬴，但長遠就一定舖頭嬴。


√有一日返工見有兩三部連埋一齊既老虎機係咁比d客嬴錢，我仲以為部機壞左通知左個技術員Imre，點知佢話總有一兩日會係咁嘔錢黎回饋 “客戶”，因其餘時間多數我都見客係個部機係輸錢，我問佢下次呢d嘔錢比客既日子可唔可以通知我黎賭幫下我 ，大家又係度爆笑


√呢度只要你有比錢賭，通常都可以免費飲下水/汽水/咖啡茶個d同埋食餅餅，聽講以前仲有pizza/donut，只不過疫情關係借機cut左慳成本。


√賭場無酒精無煙，工作環境係ok，唔似澳門烏煙瘴氣同d大陸人迫埋一齊，仲要聽佢地鳩叫/飲醉訓地。

----------

相信好多人都聽過係英國搵工一個月係快，兩個月係標準，三個月都唔叫慢既邏輯，實際上我都正係搵緊老本行既工作。


但在此期間，如果家庭開支每個月都兩萬兩萬咁科水出去，都咪話唔肉赤，特別係對一d無係香港賣樓賺到盤滿砵滿既人黎講，過黎英國搵份臨時工返住先叫做止住血先係特別重要。


如果係無特別技能唔係專業人士既話，返住呢d工先我覺得其實無壞，一方面有返小小收入，一方面同local既人相處下，了解下佢地工作模式同談吐技巧，知道幾時講笑幾時認真，成日話香港人英文勒勒聲，好多時都講緊商業英語，但講真有時生活用語香港人未係咁掌握到，仲要有時要配合埋聲調語氣表情，所以呢一類臨時工既好處係比你快速融入當地社會同生活，到你真係做到老本行既時候，相信有關技巧都可以應用係你份工度。


過到黎要有心理準備無咁快搵返老本行，因為人工要折讓，hard skills同soft skills都未必可以全部帶到過黎，最重要就仲有cultural fit，英文電話interview佢都會feel到你究竟get 唔get到佢講d乜，呢d臨時工就可以比你準備下。


話得係臨時工，呢d最低工資既工種通常都臥虎藏龍，有黎自各個國家既新移民，特別係曼城有國際機場就更加多! 所以我係呢度係識到唔同既人，亦有問佢地過左黎英國住既各種開心事及不適感，幫你對所有事都有個心理預期係度，唔會乜都用香港個套黎percept，咁樣對你自己係舒服好多，唔使乜都係咁催，學下佢地生活既步調。


討論區有師兄講話返warehouse operative，我見到個d工返工期間係無停過，做完又要勁攰，有d師兄就話好多體力唔驚，所以你要了解下自己係頭腦型人士定體力型人士，我係屬於前者，所以我係返唔到工廠工，變左而家呢份工都係一個良好的踏腳石，起碼唔使chur左8個鐘無哂體力做唔到其他野。





 
 
 

Comments

bottom of page