[#320 越黎越多英國人海外求診?]

話說，英國而家越嚟越多病人因為 NHS 等到嘔，唯有出國睇醫生，創下新高紀錄。上年超過 50 萬英國人離開英國去海外求醫，兩年間升咗五成。

NHS 等候名單一路升，而家有 741 萬人等緊，就算財相李蘊晴畀咗 250 億鎊落去都未頂得順。

睇返過往紀錄，有唔少人去外國做手術有併發症，返英國之後搵NHS 執手尾。目前，最受歡迎嘅醫療旅遊地點包括土耳其、波蘭、羅馬尼亞、葡萄牙、印度同意大利。最多人做嘅係髖關節／膝蓋置換手術、白內障、牙科同整容。

衛生大臣 Wes Streeting 話: 「成十幾萬納稅人被逼去海外做本來應該喺 NHS 免費做到嘅治療，真係講唔過去。」

「好多平價整容呃人出國，最後整壞咗，返嚟又要 NHS 埋單，所以政府會加強宣傳風險以及打擊危險醫療旅遊。」盲既都知佢講緊土耳其，真係好多英國人去個度做手術減肥以及整容。

出國求醫人數統計數字

2022：348,000

2023：431,000

2024：523,000

嗰段時間 NHS 等候名單由 610 萬升到 740 萬。

以土耳其為例，換髖關節要 £6,000–£8,000鎊，英國私家醫院要差唔多一倍價錢，仲有大量去做牙科同整容。

--------------

好多移民喺英國做嘢，但係返自己家鄉（例如波蘭/羅馬尼亞/立陶宛）做手術，因為唔使等咁耐又平。 (但對其他人黎講可能有語言障礙。)

理論上 NHS 患者有權選擇去私家醫院做手術，但好多醫生唔會主動同病人講有呢個option，真係要主動問先得。另外，有啲人係 NHS 資助出國做，但三年都係得 352 個 case，絕大多數人依然係自己畀錢去海外做醫療。

--------------

英國，有埋私人醫療會好d，普通睇病或者有咩事都可以多一重保障唔使等。至於睇牙同埋bodycheck，查實都唔少人返香城或者去泰國搞，泰國水平都超高超企理。 (利申: 親身試過)

Recent Posts