[#363 移居直布羅陀?! ]

隨住唔少人永居入藉，可能有d移英港人已經諗緊之後移去邊可以交少d稅，而當中直布羅陀可能係選擇之一，事關大家都知喺當地司法管轄區以外產生嘅收入（例如投資收益）一律免稅，佢亦都無資本增值稅、遺產稅及增值稅（VAT）。佢仲要氣候宜人，隔離就係西班牙，真係方便到暈。

但最新直布羅陀宣布針對富裕人士嘅居留計劃（Residency scheme），將富豪移民門檻由200萬鎊大幅提高至500萬鎊自從 2020 年達成脫歐協議，申請移居當地嘅人數嚴重超額，導致直布羅陀政府喺舊年需要暫停接受英國同歐洲經濟區（EEA）公民嘅新居留申請。官方數據顯示，喺 2022 年至 2024 年期間，有超過 3,000 人移居到直布羅陀。

今次門檻變更預計會喺 7 月 15 日生效，亦即係英國與歐盟條約開始臨時適用嘅同一日。除左增設資產門檻之外，直布羅陀政府亦收緊咗其他入境條件，例如申請呢個被稱為「第二類」（Category 2）特殊身份嘅費用，就由 1,233 英鎊暴升至 5,000 英鎊。

條約會令呢個直布羅陀納入歐盟嘅神根免簽證邊境區，實際上免去直布羅陀同西班牙之間嘅陸路邊境，令雙方可以自由往來。

條約引發移居熱潮 當局只係想精簡政策

直布羅陀商務部長費咸（Nigel Feetham）喺宣布呢項門檻改革時話，自從條約公佈以黎，市場對俗稱「第二類」嘅高淨值人士申請反應「非常熱烈」：

「呢個現象反映出公眾對直布羅陀嘅未來愈嚟愈有信心。與此同時，呢個體制亦必須同直布羅陀更廣泛嘅經濟目標、以及條約帶嚟嘅機遇保持一致。」費咸指呢d改動將會「支持直布羅陀嘅策略方向」，並有助於維持當地喺吸引財富方面嘅競爭力。雖然直布羅陀提高咗資產門檻，但就並無增加稅率。

喺現行制度下，符合呢種特殊稅務居留資格嘅高淨值人士，只需就其首 118,000 英鎊嘅收入繳稅，實際上將佢哋每年嘅稅款上限鎖定喺 37,000 英鎊。

業界憂慮新政策「殺雞取卵」

不過，總部位於直布羅陀嘅財富管理公司 Fiduciary 負責人哥利亞（Paul Correa）就有懷疑：

「佢哋收緊條例嘅程度，有可能會扼殺晒高淨值人士移居直布羅陀嘅意欲。睇嚟政府係想拖慢透過呢個途徑湧入嘅需求，縮細合資格人士嘅圈子。」

「第二類」申請人被要求必須透過就業或商業活動，展示與直布羅陀經濟有積極聯繫，同時要通過背景審查 + 擁有合適嘅住所。不過，佢哋並唔需要將直布羅陀嘅物業當作主要居所，亦無規定每年最少要喺當地逗留幾多日。

商務部長費咸強調，將會「繼續吸引能夠對我哋嘅經濟同社區做出實質貢獻嘅人士」。

直布羅陀四大經濟支柱

直布羅陀人口接近 4 萬，因為稅率低，加上英歐條約令邊境往來更加順暢，一直被視為高淨值居民嘅理想目的地。喺當地司法管轄區以外產生嘅收入（例如投資收益）一律免稅，而且直布羅陀亦無資本增值稅、遺產稅或增值稅（VAT）。

直布羅陀地產代理公司 BMI Group 嘅蒙特格里科（Louis Montegriffo）表示：

「我估計英國大約只有 1% 嘅人身家達到 200 萬鎊，所以政府可能想嚴格少少，去控制申請嘅數量。但我唔認為直布羅陀嘅經濟係依賴『第二類』移民。我哋嘅主要收入來源其實係金融服務、網上博彩、旅遊同航運，呢四個先係我哋嘅核心支柱。」

英國與歐盟嘅條約將於下星期三正式生效，屆時呢個英國海外領土同西班牙之間嘅陸路邊境屏障將會被拆除。而喺三個多世紀前，英荷聯軍正係對抗西班牙嘅戰爭中奪取咗直布羅陀呢個要塞。

#直布羅陀

#慳稅慳唔少

#稅款會有上限cap

#大家有無計劃去呢度