[#368 點解英國大學生唔還貸款? ]

利申先，呢個報導係大概講講目前整體情況，大學生係可以借到幾千鎊既大學生活貸款，但成個系統目前嚟睇，利息嘅增長速度遠遠超過咗還款額。

2025年加喺學生貸款上嘅利息，係所有畢業生還款總額嘅兩倍以上。搞笑在: 呢筆債務完全唔會影響學生嘅信用評級 ，而且喺畢業 30 年後（針對 2023 年後入學嘅學生就係 40 年）就會完全被清零（註銷），無論你當初還咗幾多，抑或只係還咗一小部分。

政府預測顯示，疫情入讀大學既個一代學生，只有大約三分之一嘅人能夠完全還清貸款。主動去額外還學生貸款，本質上係向財政部「捐款」，去還一筆注定最終會被撇帳嘅欠款。

-------------

喺 1990 年代，第一代嘅高等教育學生資助模式係按揭式貸款（mortgage-style loan）。該模式貸款嘅表現極差，以致政府最終將最後一筆面值 8.9 億英鎊嘅債務，以 1.6 億英鎊賤賣——相當於每 1 鎊債務只賣得 18 便士。

政府並無從中吸取任何教訓，只係學識可以將虧損由數薄撇帳，然後又以類似嘅方式推行更多貸款。

 Covid 期間嘅政策係推行「彈性回升貸款計劃」（Bounce Back Loans Scheme）。喺幾乎冇做過信用審查嘅情況下，就借出咗 465 億英鎊。政府自己嘅還款數據就已經係最好嘅自白：只有不足 16% 嘅 Bounce Back 貸款得到全額償還；而係國家擔保下，已有四分一嘅貸款由納稅人埋單。

喺整個疫情貸款計劃中，政府向銀行支付咗 119 億英鎊嚟填補貸款損失。當中高達 19.4 億英鎊嘅貸款被標記為涉嫌詐騙，而政府向貸款機構支付嘅賠償金中，有 15.6 億英鎊同呢d涉嫌詐騙嘅個案相關。呢個又係另一個獲政府擔保、最後被默許撇帳嘅貸款計劃，係好多企業持有人當成手續多幾步嘅「補助金（grant）」。

你會以為一個見證過自己借貸政策失敗過兩次嘅政府，喺第三次嘅時候會去改變機制。相反，佢哋選擇咗將規模進一步放大。 現時學生貸款嘅總額達到 2,950 億英鎊，預計到 2040 年代末將達到 5,000 億英鎊。而當部長們喺 2022 年終於「改革」呢個體系時，佢哋修正嘅唔係機制本身，而係財政部喺當中所承受嘅風險 - 還款期被延長至 40 年。

每一次嘅「修正」，都令呢樣野運作起黎越來越唔似貸款，反而越來越似一種稅，但同時又保留住「貸款」呢個名義，等政府唔使揹飛。

-----------------

1. 無後果唔影響信貸分

學生貸款（Plan 2, Plan 5 等）屬於「收入對應還款」（Income-contingent repayments），由稅務局（HMRC）直接喺薪金扣除（PAYE），完全唔會落入三大信貸評級機構（Experian / Equifax / TransUnion）嘅報告。

補充： 就算你欠下巨債，你申請按揭（Mortgages）或信用卡時，銀行只會睇你每月扣完還款後嘅「淨收入（Take-home pay）」，而唔會當你係「違約/拖欠債務」。所以對個人信貸記錄嚟講，真係「零代價」。

=============

2. 利息加得咁快搞到畢業做普通工既畢業生覺得還款無希望直情唔還

每年加嘅利息（經常高達 RPI+3%，甚至達 7-8%）遠超普通畢業生每年還到嘅金額。

好多畢業生工作咗幾年，發現每月被扣錢，但總欠款額竟然越還越多（因為利息增幅 > 還款額）。當見到「永遠還唔完嘅債」，畢業生放棄「徹底還清」嘅念頭，轉為當作係一筆「額外 9% 嘅畢業稅（Graduate Tax）」嚟處理。

=============

3. 覺得反正政府都會撇帳直情唔還

主動提早還款（Voluntary Overpayment）喺經濟學上就等同於「無償捐款畀財政部」，所以直情唔額外還款係最理性嘅選擇。

=============

4. 不如自己攞舊錢黎投資

學生貸款係「全世界條款最鬆嘅貸款」（無抵押、不影響信貸、低收入唔洗還、過期自動消失），佢本質上就係「極低風險嘅資金」。畢業生如果手上有一筆錢（例如學費/生活費節省落嚟嘅積蓄），攞去還學生貸款係回報率最低嘅做法；相反，去買 ISA、股票、做定期，甚至留嚟做買樓首期（Deposit），收益同實用性都遠高於「還一筆注定會被撇帳嘅債」。

============

if you can't beat them，join them。

#借到幾多就借 

#反正撇帳   

#真係好難會有人還錢