[#38 賭場所見所聞之呢度做CS究竟做D乜? 辛唔辛苦? 乜野最難頂?! 中集]

話說上次講完係賭場遇到D乜客人之後有好多讀者超有共鳴pm我，因為係香港做CS真係慘過做，日日係咁比人媽差之餘仲要成日收到投訴，要應對D超麻煩客又要同超麻煩上司交代，都咪話唔頭痕。

咁我係呢度就so far都無呢個問題，同事大家都好團結，因為好多野其實都手板眼見功夫就做得黎，工作內容主要分為幾大方面。

1. Serve客: 公司有個理論同training係講fish theory，每個員工都要上，主要係講你係間舖要無時無刻enjoy緊，先會吸引到d客，起碼唔買住都埋黎睇左先，睇下你做乜返工咁開心，有乜攪笑野發生緊，咁終有一日呢個客就點都會買d野。

因為反正係曼城，黎黎去去個三至四間大既賭場集團，你要賭，點都要揀一間，點解唔揀間大家都勁happy既店去玩? 試諗下如果你入個場，d員工愁眉苦面，你都可能想調頭走，心諗呢度係咪好易輸錢，個個都唔happy?! 個理論鼓勵你全心全意返工享受服務客人，放低私人野，公司免費野飲野食，雞脾打人牙胶軟，令你暫時忘記生活既枯燥。

2. 煮野食: 正如前文所述，黎呢度玩機係有野飲野食。野飲係有茶、咖啡、汽水、奶; 野食係有唔同種類既餅，熱食方面朝早有牛角包、中午有pastry、夜晚係有辣肉腸pizza、薯條，所以其實係好豐富!

你唔使怕醜架，因為我地想你食多過唔食，無派哂個d仲要羅返入廚房，勁麻煩。d野食通常都係派比玩緊機既客，無玩機我地唔會主動派，但好多客都會出聲主動話要，所以場面係幾好笑。我試過煮完d野羅出黎，d客係好似餓鬼咁搶食，面前有十幾塊pizza係可以10秒比人搶q哂。

我諗間賭場深明一個道理，就算d客輸哂d錢，但呢度飲飽食醉可以令佢地使少買一餐飯既錢，所以就會係度打躉，你知啦，賭鬼好犯賤，打打下躉又會去cashier禁錢出黎去賭...如此這般... 大家自己想像下賭場點賺錢，何況呢度d野食咁平。所以serve客令d客開心係CS既使命之一。

3. 搞靚個場，做足清潔係基本，洗廁所不在話下。老虎機上面好多鋼面同埋有個大mon，所以要成日清潔，否則有好多指模唔靚仔，呢d位要成日抹令到佢地立立令。樓梯地板地氈吸塵，唔好以為吸左好乾淨，以我既認知，賭場既地氈真係十級恐佈，d客食完野有碎跌左落地氈、咖啡茶汽水因為d客手震倒左落地氈、落完雨有d客隻鞋有泥照踩入黎地氈... 我係有潔癖既人，賭場既地氈... OMG! 我之前有睇過鹹片係講係地氈上面搞野，OMG，No Way?! 近排見有谷友入住租盤無清潔地氈就住左入去搞到成身紅成身痕，OMG，Are they crazy?! 三個月所謂一次deep clean，英國既deep clean有幾deep clean，我嗤之以鼻，信佢一成雙目失明。

終極恐佈透露 (慎入慎睇): 之前有神經失常既客入左黎，去完廁所大大之後將佢既米田共抆左上牆度，激到店長即刻全國舖頭ban Q左佢終身不得再入舖。而我清潔既工作當然係包括執屎你無聽錯係執，所以呢樣野係好難頂，無心理準備唔放下身段係做唔到呢D工，因為永遠有你意想不到既事發生! (當然無用手去執而係用工具做左老豆既我對屎呢樣野，還好... 因為之前半夜肥蕎仔成日柯d比我嘆同處理。養兒方知父母恩，各位絕對要孝敬父母)

4. 搞活動: 做主持玩event其實係我拿手好戲，因為以前公關成日做，仲要對住好多上市公司高層同埋投資者做主持、演講同埋做presentation。咁呢度就細藝好多，只係對住個mic講抽獎既野，事緣呢度週末通常都會有活動搞旺個場，免費送free spins比d客，咁既然我有經驗就持槍上陣，同事話都幾鐘意我主持風格同聲線咁話喎，英國呢邊既sweet word係真係寧舍好聽d。

5. 數錢埋數: 講開呢味野就真係不得了，因為每星期有一日朝早d高層都係齊度數錢埋數。呢日亦係難得地見齊其他好多位好玩既同事同manager，因為佢地都係 keyman，公司對呢班人都係比較信任，全部人亦做足dbs check，make sure係 “家底清白” 先做得。

呢日既工作內容亦都講過，係要開哂每部機數錢同入數報比總公司，所以如果揀打劫，呢日係最佳時機，勁多cash、勁多cash、真係勁多cash! 保守估計呢一日所有同事係要係三個鐘之內數超過幾萬鎊，然後係某個鐘數前還原個場正常營業，你無聽錯我無講錯，好鬼intensive，我都當然sign up左要做呢味野，所以個朝係好攰，早起身唔使講，空肚+神早流流狂數錢仲有時間限制，你都咪話唔難頂。

所以我而家係熟哂英鎊由1便士去到50鎊既所有紙幣同硬幣。面對咁多cash，其實係真係好大誘惑，彷彿有個魔鬼會話你知，不如羅d放入袋，呢樣亦正正係人性黎 (魔戒三部曲講貪念係幾好，當然動作場面仲正!) 但全場d cctv係無死角，每分每秒影住你做d乜，所以千祈唔好起貪念，為左一百幾十葬送自己前途。

以前睇新聞成日見候生仔去便利店偷野真係好傻，你要諗下你出黎社會工作多多錢都搵得到，真係無必要去偷個一百幾十影衰自己，影嚮家人更加唔使講。(黑警更加唔使講，葬送埋公積金同份工個下真係好死蠢)。最重要係乜野? 你成世仔都後悔做過d咁撚蠢既野搞臭屋企個朵，候生仔係白紙一張，劃黑左好難漂返白。有時間有心力，不如做下善事幫下人，不求光宗耀祖都可以係生活給別人多一點便利。

6. Cashier唱錢draw錢: 呢個位就係你入老虎機場即刻見到既所謂front desk，有好多功能，幫客用機draw錢、唱錢、將賭場贏到既錢唱返做紙幣，都係呢度一獲過做哂，我如果係呢個位，通常都好認真，因為如果short左數係會入你數。

你諗下如果個客draw錢draw 50鎊，你又無睇清楚部機gen出黎張slip係有無approve就羅50鎊比人，到你收工先發覺short左50鎊，對於你賺緊最低工資黎講係可以欲哭無淚架，而我同事係試過，即賠即科水白做。所以無乜野我都係鐘意對客吹下水玩下識下人仲開心，起碼如果個客中jackpot我又叫埋一份，仲開心! 何苦搞到自己咁大壓力，反正係臨時工?

7. 外勤買野: 話說其實間舖都有個小小既電腦房係處理文件用，咁就成日打印機印完野無墨要去過mall度買; 又成日搞活動要買汽球入helium氣，都要去個mall度買; 又成日要買呢樣個樣野黎補貨，總之乜q都去個mall度買。你可能會問: 邊個mall呀? 其實就係曼城市中心數一數二既mall: The Arndale Shopping Centre。事無大小我都申請幫手買，因為有小小坐監放風既感覺可以出去行下哂下太陽，最緊要係可以稍為蛇下王睇下唔同舖頭賣乜，對我黎講係好過係舖頭打躉。

8. 仲有太多太多既工作內容寫唔哂，黎緊會有一集youtube講下等大家閒來無事笑下，包括見過有客賭到要我地幫手call車送佢返屋企，因為佢係連續中q左三個jackpot太開心! 坦白講我都戥佢勁開心，通常d客開心成個場都開心。

又例如我既一個職責係check人身份證，如果有個人入黎望落似低過25歲，公司要求都要循例check下，無check又比佢玩到部機而又比差佬知既話，公司係要罰幾皮野，所以呢方面好鬼嚴。我有個俄羅斯同事就公器私用，專check女人，索d既候生妹佢一定check，因為佢地通常都著得好鬼性感，佢仲試過成功羅人電話，我通常都笑騎騎對住佢講: you are so naughty ; p 。

又例如d飲品無哂要補貨、入電腦房做training、認住d全國被公司禁入賭場既客等等都係每日需要做既野，overall黎講係，開心地增廣左係英國見聞 XD。

下集同大家講下呢度d同事又係乜野人，歐洲黎既同事又係乜鬼性格，密切期待!

--------- √ 客已經好笑，但其實同事仲好笑。

√ 分到外國人既樣，包括白人、黑人、印度人、中東人、南亞人係大概屬於咩年紀呢下對我黎講都係一個技能解鎖，因為以前係老鼠老虎傻傻分不清楚。

√ 雖然話係英國生活得耐都會分得到d錢，但係呢度做cashier兩三日令我認清哂所有紙幣顏色價值同硬幣顏色、大細、價值同形狀。

√ 有時係度諗老天爺係咪要我慢慢一步一步adapt左local生活先可以比我做返老本行。

---------

P.S. 之前有一位師兄經介紹已經係Bolton返緊工，如果仲有師兄有興趣既，歡迎搵我。