top of page
Search

[#40 NHS 幫小朋友做成長發展評估會派護士上門? 做家長有乜野要準備? ]

話說大家黎英國有幾件事都必須要做既就係同GP登記，咁有乜頭暈身㷫都可以睇醫生羅個配方配藥食，因為有D藥要有醫生紙先買到，否則就買唔到。


如是者我同Vivian都網上登記左，亦都幫個囡登記埋，幾日後就收到封信話會有護士上門幫肥蕎做成長發展既評估，心諗，乜d service咁好既可以上門? 然後我就諗返起細個係香港都有每年一度既身體健康檢查，要去一d檢查中心個度做一d包括度高磅重檢查眼晴近視抽血睇睇脊椎骨生長有無歪等等既檢查，仲要聽一d護士認為好有趣既健康講座包括飲食點樣先會均衡 。


咁係呢度我個囡當時就未夠秤未過三歲，隨信寄黎既仲有一份問卷，都幾厚架，有勁多問題係要你答，好彩多數都係MC題，內容係問你小朋友成長階段呢個歲數有D乜野係做到，有d乜係有時做到，而有d乜係未做到，要圈出黎比個護士評估小朋友係唔同既體驗同認知上身體同心智係咪健康發展。


我仲記得有一題係好好笑，問卷上面係劃左一個火柴人(如圖)，問題係你既小朋友覺得呢幅圖係乜黎? 咁個答案就有


1. 機械人

2. 火柴人

3. 爸爸

4. 一堆事物。


當時我就返左工，Vivian問肥蕎覺得佢點都會答1,2或者4啦，好好笑地佢係即刻答3，仲要係大大聲話 “呢個係爸爸!”。


Vivian講返比我知個時我係即場大笑兼覺得有d不可思議，點解我會變左火柴人既? 同埋nhs呢題既問卷點解會有爸爸呢個答案 XD 由此證明小朋友既想像力係超級無敵豐富? XD


咁去到約定個日個護士就真係黎左，我地當然都有準備茶同朱古力招呼下佢，佢就開始跟住份問卷問左我地好多野，睇下肥蕎係咪健康成長，咁肥蕎仔都係一如以往啦，開頭人地同佢say hi又係度no 人地，到5分鐘後又突然懶係熟咁同人地hello，然後你睇下幅圖? 佢仲可以係陌生人面前坐係potty度去大作為見面禮，你話係咪勁先? 呢樣野我都做唔到 XD


咁個護士都好有耐性聽我地講關於肥蕎仔既健康情況，除左太黏媽媽、有d強迫症同完美主義之外基本上肥蕎既身體發展都幾好既，而護士聽到我地岩岩先返返黎英國度住都覺得肥蕎有咁既表現係好正常既，叫我地唔使太擔心，相信settle down之後返左學會好好多，的而且確佢而家返左學後係好好多。 (題外話: 學校d小朋友既衛生情況有d惡劣，見佢地乜都放入口，肥蕎返左學後都有時會有唔舒服。我可以話學校真係細菌既溫床...)


然後佢就比左樽維他命補充劑比我地肥蕎，支野就0至5歲都岩飲，補充維他命A,C,D，話而家夏天可能唔使住，但冬天日照短又成日落雨既時候可能就需要飲下呢D補充劑，仲比左張咭我地話如果呢支飲哂就可以去Pendleton既一個healthcare中心免費再攞，張卡上面就有肥蕎既簡單資料。


睇返個護士，佢其實都幾危險，上親門都全副武裝戴哂口罩同塑膠圍裙，而家其實都仲叫疫情期間，但好多人已經唔戴口罩或者抗拒戴口罩，我有拗水吹，佢都有透露做護士幾好pay，但有d屋企就比較朽舊，佢都會硬住頭皮入去，所以係呢度再次向全體nhs醫護人員致敬!

--------- √ 希望無乜野大家都唔使搵GP。


√ 首次經歷英國第一個冬天希望唔好凍親。


√ 護士好有耐性講解，如果有埋小朋友心理成長輔導咁就perfect ---------






 
 
 

Comments

bottom of page