[#43 中左Covid大難不死? 病到聲都變埋似batman?好多朋友問我究竟係咪聞唔到野?!]

八月中有十幾日個page完全荒廢左無update到點解?! 發生左咩事?! 你係咪以為我中左最近個大樂透彩票有成一億八千英鎊走左佬? 其實我係就係中左，不過係中左covid，初頭既病徵係完全唔covid，然後病到曚下曚下。

初頭以為岩岩過到黎傷風感冒好正常者，d菌對亞洲人黎講又係新既，覺得難d好返好似好make sense，點知訓左兩日唔對路好唔返，但又無惡化，無咳無發燒，死死氣地返工，嘿嘿，去到第三日返完工返黎就黎料，攰到hihi仲要高燒，人生無試過燒到咁犀利，接近38.5度，超級crazy，極級占寒占凍，冚大被但唔暖，訓極唔精神，肌肉酸痛，不得了。

好啦，你可能會問，我點知中左covid先? 第四日起身覺得，咦?! 唔對路喎，點解聞極d野都咁奇怪既? 勁大力勁大力呻個鼻都仲係呢隻味，我諗我一世都唔會唔記得，係一種極強烈既煙草味，唔係有人係街邊食煙你聞到二手煙個隻味，亦唔係食水煙噴出黎既個隻味，而係一種你個鼻控埋去d煙草度大力索一啖既味。所以我係覺得極之奇怪，我仲問我老婆係咪邊度收埋左煙草定隔離煲緊煙有特殊煙草味?! 由於係朝早既關係，係我懷疑之際走左去擦牙，唔擦由自可，一擦，一放，當牙膏進入口腔個一剎那，我心諗: 扔野了! 平時擦牙由於牙膏既關係，你係會將你聞到既野倍數咁放大，而呢一刻，媽呀! 係極級強烈既煙草味!聽講每個人聞到既野都唔一樣...

由於我係第四日氣管唔知點解突然好敏感係咁咳，再加上乜都聞唔到淨係聞到煙草味，內心係覺得超離奇但知奶左野，因為個時吹到covid係會勁嚴重要入廠，講緊係ICU，但呢下內心都仲係半信半疑，而最恐佈既野係唔係自己病，而係太太都開始狂咳，佢細個仲要有哮喘，所以個下我堅係有小小懷疑人生做乜帶左佢黎英國，仲要未帶佢嘆世界，乜都未探索到就被covid玩謝左，內心十分歉疚。

我太太雖然係咁咳但都好sweet沖左杯熱檸蜜比我飲，我一飲，嘿嘿，點解係一種膠類似車軚既味道… 完全變左另一隻味，而呢一下我亦知道我連味覺都變埋。然後極速試埋其他野食，係有一種 “點解d食物好似無左味，情況好似係被一d野包住左搞到你聞唔到taste唔到佢地本來既味道，但明明佢就係你個口入面 XD”。

後來大家食緊早餐既時候邊咳邊食既情況下有左共識: 不如快速測試下究竟有無中covid... (其實黎到呢度應該係毫無懸念，但內心唔信邪呀麻...)

如是者，我就羅起之前同肥蕎去圖書館羅既rapid antigen test，當時仲一心係度諗有呢個看下門口都好喎，估唔到竟然咁快派上用場。雖然話主動做test，但其實內心都仲係好想係negative，點知太太Vivian一兩下手勢已經做完，而個test結果仲要極速顯示係positive! 係positive! 係positive呀! 我個下隻眼mark到大到呢... 唔使戴大眼仔都超大... 我好難相信呢個事實，係positive無誤，仲驚喜過有左bb個一剎那，而我，當然都係positive。

然後就係來回地獄又折返人間既故事了，第二朝朝早起身感覺係好d，然後晏晝又可以高燒，夜晚係極度占寒占凍，到朝早又好返d… 無限輪迴! 我都儘量係咁啪係香港帶黎既感冒丸減弱病情，想自己感覺上好d，但呢隻病係成日都好攰，最尾黎個統計我係足足、足足、足足訓左15日d燒先退哂! 半個月既生產力!

其間只係食、柯、訓，連上網都無精神，肌肉極攰，狂咳，係咳到一個地埗覺得自己無得救了，我甚至連英國同香港銀行戶口密碼都話哂比Vivian知，有乜東瓜豆腐佢可以羅哂d錢。想羅藥但GP同埋醫院唔比你入，只係叫你係屋企隔離同休息，個時仲要勁攰既情況下上網order groceries，因為要隔離無得出去買野食，堅係羅你命3000。

發病期間碌facebook仲入左個鬼佬互助covid group，入面病情更嚴重既有連續幾個月訓醫院病房，睇d病情case係矚目驚心，有人係味覺嗅覺過左半年都未返黎、有人係咳到甩肺(肺炎)、有人當然係要用埋呼吸機，入面係有好多互助打氣既留言，令到病人睇既時候彷彿有返d希望!

思前想後，點解我會中左covid既呢，我淨係去左返工咋喎，後來一諗就知道源頭係邊個 XD。

好明顯就係公司個supervisor俄羅斯人，極級抗拒帶口罩，認為戴口罩對防止covid病毒傳播無用，實則係想滅你聲咁話 (後來好返同佢傾計得知佢咁既諗法)。佢未好返就返左公司返工，而當時我係新人佢要train我... 係我面前狂咳，而當時我仲要唔知，後來聽佢同同事既對話入面先知佢岩岩好返返黎，但無做pcr test 證實negative就返左黎，你聽到呢度係咪覺得好神奇?

而我係返工返到第五日已經要請sick leave因為中左covid，極尷尬，後來先知間舖既同事差唔多每個人都係之前既疫情入面中過哂招，有d人到而家味覺變左都未好返，連食隻蛋都嘔，而有d人係完全無病徵，行得走得食得!

嘿嘿，呢個時候有請主角肥蕎仔登場，因為佢係完全無事，大大聲、紮紮跳，能量爆燈，我臥病在床期間佢仲要係我身上跳，係咪好勁先? 我都覺得十分神奇，好彩佢無病，如果唔係實擔心死我同Vivian，但因為我地病得太犀利既關係就無好好慶祝蕎蕎既3歲生日，淨係網上order左個蛋糕同peppa pig 氣球比佢頂住癮先。

後來係度諗，陰謀論咁講，如果隻病毒係中共係武漢發明，堅係不費一兵一卒，打到洋鬼子兵敗如山倒，隻病毒針對中年至老年人搞死佢地，一個國家無哂領袖，而班候生既病左都無哂生產力，到時佢真係坐享其成… 陰謀論者，哈哈。

執返條命好好彩，諗返起發病期間我係咁咳十分聲沙，老婆仲講左句笑話: 你而家明白點解batman把聲係咁未? 因為佢中左covid… (而covid病毒來自bat…)

--------- √ covid好古惑，初頭病徵可以係完全昆左你。

√ 味覺嗅覺無左好似人生變得無乜意義咁，因為無得食好野，但有一樣野係發病期間係特別好食: 你估係咩?! 就係上帝之果: 蘋果，特別甜、特別爽脆，一口接一口停唔到，因為對其他野食無哂欲望。

√ 中左covid味覺嗅覺變哂搞到連食野都有問題，因為所有野都無味，即係唔好味，嚴重影嚮食欲，體重直綫下降5kg，人生未試過減肥咁成功 xD (由60跌至55)

√ 返工個度要同英國政府網上訂pcr test，要test positive先比你用covid理由係屋企休息 (如果你不幸中左或懷疑中左，請到呢條link取免費pcr test kit，政府會寄比你: https://www.gov.uk/get-coronavirus-test ，你之後經普通郵筒回郵即可，test kit入面有哂指引)

√ 好返之後勁感恩，因為可以繼續享受下世界先，對比covid世界，真實世界實在太多姿多彩同色彩繽紛!

√ 發覺要愛錫老婆同囡囡再多d XD，但我有問: 可唔可以忘記我d銀行密碼呀?

√ 如果你中左covid，千祈唔好覺得迷失，係會好得返的，比時間自己休息下，比兩個禮拜時間自己。嗅覺同味覺就要比一至兩個月自己，佢會慢慢好的，唔需要太過擔心，記得飲大量水。

---------

發病時間及時序表:

8月初發病

第一至第三日: 返工中左covid，係屋企dayoff兩日都臥病在床，見好返d再返工但當日整日超攰，尚未有covid病徵，只係好攰好攰同發冷。

第四日: 味覺同嗅覺劇烈轉變，飲熱檸蜜本應甜味但味蕾傳來的是車軚場的味道 / 做rapid antigen test發覺中左招 / 公司打黎話要做pcr test / 訂pcr test kit。

第五至第六日: 病情最嚴重，發燒達38.5度勁攰，發冷、占寒占凍，好lost，心入面既感想: 會繼續變得嚴重 / 寄pcr test kit / 上網發現英國本地local 既互相support group / 將銀行密碼及錢銀相關事項全部交帶老婆 (佢病情較輕) / 獲得過來人網友 Cherry Chanfelita鼓勵病情會好轉，不必太擔心，但需要休息約兩週方可痊癒，係度衷心多謝佢既advise。

第七日: 病情好轉但依然超攰，不停咳，感覺時間很慢，病既感覺很重。

第八至第十五日: 臥病在床，以蘋果及waffle為主食，其他野食一概覺得極級難食。

第十六日: 終於好返 / 再訂pcr test 證明negative 先返工 (雖然公司無要求) / 屋企廁所行上體重個磅發覺體重直綫下降5公斤

足足第四十八日: 味覺及嗅覺逐漸回覆 (thanks god!)。

拍左條片紀錄病前病後真係兩個樣，唔係病死但笑死其實幾好! XD https://youtu.be/N9G6voxpIy8