[#46 英國基層份糧好唔好使? 幾多先叫夠? 出得國其實都叫幾有錢?]

話說筆者已經黎左英國幾個月，初頭既感覺係點解好多野都好似時光倒流左20年，商場既舖頭、經營既模式、甚至係待人接物都咁似之前既香港?!

商場夠膽死有主打賣卡既舖頭，雖然話英國人鐘意過時過節寫卡聊表心意，但明眼人一睇一聽都知卡既行業好明顯係夕陽工業，就好似實體報紙一樣，97年個時未死，但黎到21世紀都轉哂電子版本。經營模式方面雖然都有連鎖商店，但更多既係個體商店，好似以前一樣經濟逢勃，百花齊放，當地租舖租唔係飛天既時候，人人試下做生意，三贏，社會贏 (整體進步促進各方面發展)、商家贏 (大家良性競爭求進步汰弱留強)、消費者贏 (多選擇，各適其適)，舖頭做生意有彈性，有人情味，不會只向錢看。到後來香港政商彷彿勾結，紅色資本滲透，生意門檻越黎越高到壟斷市場已是後話。

黎到要重新黎過不容易，但感覺香港人好快適應，起碼我觀察到唔同既曼城群組 (我係組員) 好快都settle落黎，好多更加係落地到埗兩個月內已搵到工作，達到收支平衡。基本上，同好多本地人或者local華人都傾過，係曼城生活一個月基本上2000鎊對家庭黎講都幾夠使 (倫敦應該要3000鎊，但相對上人工都高d)，夠你比充足食物、屋租、水電煤寬頻、渣車油錢，有時出去食下飯甚至買小小衫都ok，但就未必儲到錢，但家庭黎講總會有從前既工作經驗，細心d搵，有好多工種要小小某行業既專業知識都有2400-2800鎊一個月，你需要既只係時間同耐性去搵一份正d既工，所以頭三個月做住基層收支平衡站穩陣腳，到你master到些少local culture同langauge既時候好多野自然得心應手，見工都有信心d，你會發覺人類世界好多野都好似，唔會因為地域唔一樣而唔同，我亦相信你好快會搵到自己想做既野/ 甚至係呢度做生意 / 做到以前一直想做但係香港做唔到既野。

呢邊打份工最低工資每個禮拜返40個鐘有1300鎊左右，扣埋ni同tax就得返1200鎊，一個人絕對夠，仲可以儲到小小錢。而家英國經濟復甦快，有一百萬份工等緊人做，如果係候生仔囡黎到絕對無問題，假以時日累積經驗及錢錢，未來是有希望，對比某個地方係可見既將來每日只有負面新聞唔會有好既新聞黎講，你可以話係有耳目一新既感覺，氣場同mentality都會好好多。(希望中學生同小學生唔好再跳樓)

絕對唔使擔心話唔識英文黎到咪好大獲既心理負擔，講真，有好多local slang我都係黎到先知，同同事講左一個月乜都識，仲可以講到好似local一樣融匯貫通，有咩唔識我都不恥下問，同事超nice乜都教，最多笑下你，咁咪一齊搞笑氣氛超開心，何況面皮值得幾多錢? 之前仲有新聞話英國有補貼，可以申請黎學英文，你需要既只係踏出第一步，主動搵資料，提出申請。乜都要主動如果唔係金錢掛帥既話對於香港人唔容易，但你睇外國教育就知道佢地由細已經教緊呢樣野。

係某地方返工我每個月都儲幾皮野，呢度就未必有呢支歌仔唱，但你會見到呢度d人好似係少d比較，唔係個個都帶chanel、LV，甚至我帶seiko有人話係靚錶，感覺local關心你個人多d，多過你戴乜野，所以係有一種回到從前香港既感覺。我認為當你做返本行或者搵返d你有經驗既工，一個月儲到一、兩皮唔難，同時間你亦可以更好享受生活，整體黎講感覺上無香港咁大壓力。

然後當我研究工資同物價指數個陣，就發覺本地人甚至係東歐過黎既移民，佢地好多都使哂粉糧，even係3x歲既開始步入唔候生既候生仔，佢地甚至係要同銀行overdraft... 即係戶口借住銀行錢先但又可以唔使計息，通常都有個限額大概100至200鎊，視乎你個人財政狀況。

佢地無乜錢既原因通常係好早搬出黎住要比屋租或者係成日同朋友出去飲野使哂落d酒水錢度，所以我係好surprise有關佢地對金錢既個種瀟灑態度，同時亦感覺到其實好多出得國既所謂外國人基本上都有錢好多，因為好多本地人佢地係選擇國內遊，而個分野都可以講話係幾大。情況就等於以前d人無乜錢就參加關鍵旅遊 (曝露年齡秘密)，有錢就梗係康泰英國遊一樣。

黎緊筆者會有新動態，就係搵到新工啦~ 同最低工資說再見! 密切期待同大家分享! Patreon亦會分享多d我會做乜工同埋見工心得。

--------- √ 家庭開支曼城黎講2000鎊就夠，理想當然係搵3000-4000鎊，積穀防饑。

√ 最低工資有1300-1400鎊一個月，夠哂一個人使，黎到未搵返本業唔使怕，站穩陣腳大把出路，you just need to be patient，長路漫漫伴你闖。https://www.youtube.com/watch?v=wmZv2Y4Dtp8

√ 呢篇唔係乜野雞湯文，但講真黎到有乜做化好睇你自己，唔係話一定大把希望，但起碼對比某地方叫做有希望，諗下5年後你會點? 好多問題既答案都會不言而喻。

√ 出年4月最低工資加到 9.5/hour。

--------- #uk #bno #uklife #英國生活 #香港人在英國 #Ukmrpr #manchester #work #nationalminiumwage #attitude #contribution #trial