top of page
Search

[#53 戰爭迷萬勿錯過? IWM Museum 重新感受英軍當年部署? 噴火戰鬥機有幾威水?]

Updated: Apr 5, 2023

筆者生日當日咁岩撞正Remembrance Sunday，最應境既節目首選參觀IWM Museum，唔講唔知原來呢個博物館全國有三間，唔止倫敦，連曼城都有，睇網上評價好似話幾正就忍唔住帶埋肥蕎仔去睇下，後來去埋佢網站睇先知倫敦仲有一艘皇家海軍驅逐艦可以上埋船參觀，另外仲有二戰時期邱吉爾既作戰指揮室可以參觀，來頭絕對唔惹小。


一黎到博物館門口就比佢既建築物外形吸引住，不規則及波朗形既設計同一般映入眼簾既紅磚屋對比分別十分大，然後門口當眼位已經見到一架係伊拉克用過既T55坦克，望一望真係好有歷史既味道，當年911及伊拉克戰爭依然歷歷在目，美國政權點樣鏟除薩達姆侯賽因政權聲稱尋找 “大殺傷力武器”既新聞彷佛在昨天發生一樣，雖然最尾搵到奧薩瑪·賓·拉登既藏身地，但都唔知有幾多平民百姓因為咁而一齊陪葬。入侵伊拉克背後既龐大利益更加唔使講，人越大越覺得世界好多野都有私利，但慶幸呢個地球仲有好多正義既人。


入到去有個偏廳展覽緊一個Poppy flower既藝術品，紀念二戰作出貢獻既英國及聯軍軍人。然後上左一層就正式係展覽部分，一入門口即刻當堂頭頂有架戰機，臨場感十足，現場室內展覽又有坦克，亦有其他二戰時期使用既軍用車輛，又有講述英國既噴火戰鬥機 (spitfire)，目不瑕給，最正係一d關鍵事件例如講希特拉點樣係德國堀起以及佢點樣入侵同轟炸英國都有好詳細既描述同埋當時既軍用配備展覽一齊睇。


後來二戰完結進入冷戰，唔同既戰爭都有描述，包括越戰、韓戰以及日本侵華，其中又有講到德國分裂成西德同東德，栢林圍牆係點樣分隔左兩地既人既聯繫同生活，以及兩邊既統治係點樣影嚮到日常生活，係好立體咁呈現到比參觀展覽館既人睇，彷佛置身當時既生活。


你以為佢只係不停有展品比你睇咁悶? 其實大部分既野都係互動式展述，要你用手攪轉盤先睇到資料、羅起話筒聽摩斯密碼同埋聽無線電對話以及場館係有表演架! 個表演主要都係用燈光展示生命既可貴，對比不必要既戰爭帶黎既傷害同無情，令人好印象深刻，令到筆者都不得不分享呢次參觀體驗，仲想即刻快d去倫敦睇埋倫敦展館同驅逐艦。


話說阿囡睇完都好大感受，現場已經係咁問呢樣係乜個樣係乜，返到屋企都仲係咁講緊好多屋屋因為轟炸爛左，佢對戰爭既感受分分鐘比我更深。睇完展覽已經覺得好正，點知佢賣紀念品個區有好多筆者覺得好精緻既野，係第一次覺得d關於戰爭精品可以媲美日本d展覽館(例如廣島和平紀念資料館)。


--------- √ 展覽係免費入場，只需上網預約門票，但如果可以既，都請捐款支持展覽館繼續研究及展覽工作。


√ 英國噴火戰鬥機聞名世界，二戰時力克德軍Fw190A及Bf109G戰鬥機，如果有睇Dunkirk就知佢貢獻有幾大，睇緊展覽個時令我諗起Christopher Nolan同Tom Hardy。英國首相邱吉爾在演講中曾經講過: “在人類戰爭歷史上，從來沒有這麼少的人為這麼多的人做出過這麼大的貢獻。”講緊既係整個不列顛空戰入面，英國方面損失了1547架飛機，包括770架「颶風」和「噴火」；德國空軍損失了1887架飛機，其中650架是Bf 109戰鬥機。(網上資料)


√ 阿囡學校都有制作poppy flower，搵張紙畫左朵花之後，油左紅色剪出黎，十字膠紙黏係心口。個日我問佢咩黎架，佢仲大大聲話poppy flower!





 
 
 

Comments

bottom of page