top of page
Search

[#57 人民歷史博物館已記載香港反送中運動?! 了解英國歷史文化不二之選黎呢度就岩? 展覽仲講述左英國主要政黨包括工黨、保守黨同自由黨的由來?!]

話說呢日係湊囡日，當然要同佢黎個文化之旅繼續加深認識大英帝國啦。英國最多係乜?! 之唔係博物館，咪以為博物館好悶，其實勁多野睇。係曼城博物館已經有好多個，人民歷史博物館可以話係當中幾精彩既一個。


話說入左棟建築物入面，佢係有兩個展覽廳。展覽廳外面已經有個移民轉盤，分析移民既主要原因不外乎經濟移民尋找更好的生活 水平 (apply 到係我歐洲同非洲過黎既同事)、尋找政治庇護的移民以及難民，睇到呢度都不其然係度檢視自己既移民身份。


蒲入第一個展覽廳的門口，就已經即刻睇到香港2019年6月反送中既相片，現場都幾多本土英國人圍住睇，同埋如果黎得呢個博物館，基本上係一定會睇到，可想而知呢件事係幾咁重要，所牽涉既關係又幾咁大。相片同資料放得係呢個位，你又可以想像到政府係幾咁致力教育英國人有關香港既歷史同埋開放BNO Visa既原因，更加唔好講之前倫敦除夕倒數加左 “歡迎” 兩個字對好多香港人黎講係幾咁有意義。


其實黎到英國，係更加感受到香港係全球政經入面扮演住一個幾咁重要既角色，堅係可以話係牽一髮動全身既感覺，除左更加認知到香港係一個好重要既自由貿易港之外，呢個彈丸之地更加係全球自由民主同埋共產黨兩大勢力角力既地方。唔好以為自己只係升斗市民乜都做唔到，只要你發聲，持續發聲，大家一齊發聲同做野，星星之火係可以燎原，匯沙能成塔，君不見而家係世界各地好多香港人都做緊野去凝聚同團結香港人既力量，所以唔好低估自己能夠帶黎既影嚮力，現場已經有塊展板仔展示左博物館資料既貢獻者，當中包括第一代香港人移民既Jo Yee Cheung，有參與當中資料既分享及梳理工作。


鏡頭一轉黎到講述二戰時期英國由首相邱吉爾帶領，但當盟軍戰勝之後，邱吉爾係好大呼聲繼續當選既前題下落敗左比工黨，原來係人民都好期待有一個戰後重建既新面貎，而你睇現場當時既工黨海報，完全描繪左當時人民最想要既野，包括屋、屋同埋屋，因為英國實在太多屋被德軍炸爛哂。


展覽入面仲好詳細講述左英國三大主要政黨既執政概念同影嚮力，同埋塑造左今日英國制度、福利及面貌既由來，所以千祈唔好覺得政治唔關你事，否則溫水煮蛙，熟左都唔知咩事，你睇下而家香港發生緊咩事，短短半年入面簡直係天翻地覆既轉變，而家連新聞都無埋，基本上同牆內既人民一樣係唔會知道邊度有真新聞! 黎到英國，記得登記做選民，唔只幫到你credit score，更應珍惜手中一票。


現場除左睇之外，仲有d互動野，肥蕎仔係最鐘意。有個game係模擬好耐以前英國d工人整火柴賣比人，好考你反應，要禁得快先整到一支，好啦，當你好辛苦咁整到幾支以為有糧出啦個日，佢會話你聽你既工資只會出25%比你，有75%會被剋扣黎支持間廠發展 (其實係入左老細袋袋袋平安)。因為好早期有好多工人遇到呢d不公平事件，先有後來越黎越多既工人團結起黎組成工會發聲同反抗，亦先有後來對工人保障既條例及福利制度，間接比你了解到一d平時睇黎覺得好稀疏正常既野，其實係前人打生打死爭取返黎，唔珍惜唔去捍衞係可能會無左。


從好既方面去諗，而家呢幾代既香港人全部覺醒哂，亦都唔會再只係掛住搵錢，會主動諗多d野，做多d野同捍衞香港人既核心價值，蘋果雖然無左，但種子已漫天散播開去，在每個人心入面種下深深自由民主既根。












 
 
 

Comments

bottom of page