top of page
Search

[#58 郵差叔叔送信純熟迅速送出! 點先做到Royal Mail郵差? 工作係唔係只係派信咁簡單?! 難頂既野係咩? 點先pass到online test同面試?! 之上集]

首先係度多謝咁多位網友對筆者既信任，之前成功介紹左三位師兄姐做賭場，以及5位師兄係英國唔同城市做Getir，希望令到你地有額外既收入，生活又好d，起碼唔使再做倉咁辛苦先。

今次要講既工作係乜?! 正如標題所講就係Royal Mail既郵差啦!你見郵局請既title係 postperson with driving – (office name)就係架啦!


好唔好pay? 入職初期一個鐘10.85鎊，6個月後11.45鎊，做滿一年升到12.05鎊一個鐘，星期日如果你揀ot係會有 10.85+5.83=16.68鎊一個鐘既，份工既學歷要求同英文要求唔高既，識簡單英文同渣棍波車就會做到，人工叫幾好唔錯架藍領黎講。


[幾時join好?! 工作地點係邊?]

筆者曾經係11月做過郵差一段短既時間，你可能好奇點解揀而家去講而唔係11月去講呀咁? 因為而家1月就係join郵差既黃金時間，經歷完恐佈既感恩節、聖誕同新年後 (好明顯我係最差既時間join左做郵差)，學同事吹水咁講，d人買到無哂錢了，信件量同包裹量係最少。

同事亦分享夏天派信係最舒服既，晴天多、落雨少、氣溫怡人、更加無雪、冰同大風需要顧忌。咁你可能諗，夏天先join都得啦! Sorry夏天係join唔到，因為夏天係行業既honeymoon，d人通常夏天前就join左變左夏天係少d空缺。隨住日照時間係冬至之後每日逐漸加長，呢份工係夏天當然係最舒服。


工作地點係mail centre，你見每個區都有一個，例如筆者住係Salford，都有一個mail centre，但呢區少空缺，因為平地多唔使行山路/斜路派信。Mail centre你當係一個巨型倉庫，隔離通常都有其他倉，如amazon。


[工作時數+如何補水?]

筆者join個時個contract係一個禮拜27.5小時，話就話每日返5.5小時，但實際上份工係7點或8點開波，通常去到3點，30分鐘小休，咁你計一計其實每日係要返8小時。人工係按你合約時數每星期五按週出糧，如果你今個禮拜ot左，就下個禮拜補水比你，ot鐘數係需要你每日返工係一張枱仔度寫，收工亦要再寫一次，如果漏左填或無填係會無得補水。


份工要你星期一至六都要available，因為星期六都會派信，每個禮拜輪住shift一日比你去dayoff，即係今個禮拜如果你off左星期一，下個禮拜你就會off星期二，如此類推。


初入職佢會比郵差套制服你，但你要預兩個禮拜先會羅到，因為行政人事需時去處理同運去你個branch，即係話頭兩個禮拜你要用住自己既衫先。郵局係會提供膠手套比你去sort信同派信，但好奇怪地，成個郵局我目測d老鬼都係唔用套，好環保，鐘意徒手，所以你見到佢地隻手係好粗糙 (如果唔帶，我覺得會比較容易割傷/工傷。係架我好錫住自己隻手)


[工作內容做d乜?!]

做郵差主要係sort信、派信同埋派包裹，亦需要係指定時間係郵筒收信。你朝早7或8點返到去每人係有一個專區sort信，我當時主要負責M27同埋M28，即係曼城Swinton同Worsley區，sort好信，10點至10點半就要出車派信，總共會停四站四個區去派信，通常我地要泊係個區入面既中間點，然後同另一位拍檔分頭行事派哂d信佢，然後就派包裹。


有tracking既包裹係會優先sort同派，所以郵費係最貴。另外平時係有mail diversion要check，如果有客戶係搬左屋或者申請左郵件divert服務，郵差係sort完信係會人手check將d信去divert既，由於係人手操作，所以有時係會check漏架，哈哈。平時如果你單位收到信唔係你個名既話，係可以寫返no such person / return to mailer 放返入郵筒就okay。


[時間夠唔夠派信?!]

10點半出發去到3點返mail centre係標準時間，即係四個半小時你要派哂，每個區得一個鐘派，因為半小時係預返車程來回該區。信都還好，包裹係海量，仲有推廣既資料，你唔好以為宣傳單張個d係有人攝入黎，其實好多時都係郵差攝入黎，因為郵局收左錢去做呢件事。計返其實個時間去派信派包裹係好緊湊。


呢度想暗示d乜?! 就係佢話有break其實係無架! 講真你8點返工，10點半前要去廁所同break，岩岩先返工比你break唔break?派信途中因為時間實在太緊湊你係去唔到廁所，簡單講，你朝早食完野就直落去到3或4點，好多同事會帶水果或者餅乾係車度食，但你不要忘記佢地隻手無帶手套其實都幾...污糟。咁你無去到break喎點計先? 佢係會當個30分鐘係人工咁樣出比你。


咁我係11月join個時係點? 撞正感恩節，講真，你係會前所未有地見到超級無敵多包裹，我無講錯你無聽錯，係可以堆滿一架中型size既郵差van，你開門既話d包裹係會跌出黎。


未完待續… 下集會講點樣一定過到筆試同面試仲有video架








 
 
 

Comments

bottom of page