[#59 郵差叔叔送信純熟迅速送出! 做Royal Mail郵差點禦寒? 裝備+同事又係點?! 唔識英文真係做唔到郵差?! 點過最頭痕既限時網上筆試?!!! 之中集]

筆者真係無諗過原來咁多咁多咁多既香港人都鐘意郵差或者想做郵差?!完全超出我預期！係香港做郵差係筍工，係呢度做郵差堅係要經歷天氣及氣溫既驟變，君不見佢個廣告寫住From scorching summer days to the depths of winter都要返工，其實係寫得好真實，要記得你唔係機械人，你係血肉之軀。

上集講到郵差既運作仲係一個幾analog既方式，包括超時補水，另外亦寫左工作內容，幾時係peak season，又幾時做又最爽等等，筆者亦收到好多pm，係呢個post會儘量解答大家大部分既問題。

[好快天黑]

承接上文，我個時join係11月撞正重要節日，包裹量係多到形容唔到，我會想講係parcels mountain parcels sea，派完信要派包裹，然後嘿嘿，接近3點了，你頭頂既太陽就黎收工了慢慢入黑，呀唔係，好多時都落緊雨或者冰雹既時候，而你係要ot到5點去派q哂佢，但其實四點一天黑，你係好難睇到門牌號碼。

所以題外話筆者黎緊買完屋後係一定會裝盞燈照住門牌，以及裝個獨立信箱係牆度，因為問過好多同事原來佢地都唔係好鐘意攝信入度門度，仲有攝信既時候有被狗咬既風險 (呢度semi-detached既屋十間有七間有狗)，大家都勁鐘意個d裝係牆度既獨立信箱。唔裝有咩效果？有機會冬天收唔岩信。

[裝備+禦寒+天氣]

係條街派信，乜野天氣都遇過，戴冷帽同冷手套係必須，但呢度好多鬼佬都仲係著短袖郵差袖衫/polo+短褲，有時真係好服佢地，你仲記得英國從前好流行有吸血鬼呢單野麻? 鬼佬同吸血鬼共通點係咩?! 就係唔怕凍。

郵局制服係有fleece、boots、防水防風既風褸比你，如果地下結冰，佢都會有釘帶比你勾起隻鞋度，等你行個時唔使pk。制服係會比兩對鞋你，如果落大雨淋濕左，你都有第二對可以換，裝備個人黎講覺得係幾好，對boots係舒服好著保暖 (見圖)。

係咪代表著左就唔凍?! Make sure你有食早餐有energy唔會訓過龍太趕著少左件衫，身體好d就唔會，但我地係人黎，有時係會凍 (係咪好玄好似黎明講野?)。

任何天氣都係需要派信，除非十分極端，絕少機會唔使返，有太陽係要感恩，綿綿雨是日常，扯風是朋友，有時黎探你既係大雪同大冰雹。筆者雖然只係做左短時間，但不得不承認體魄變得強健，而家4至5度既天氣只需heattech+sweater+外面一件大褸，絕不需再著虧佬褲，有別以往只做文職既汕弱。

大假方面就有22.5日+bank holidays。

[同事係點架?]

你派信係一定有個partner，你渣車或者佢渣，基本上全部係男人，郵局有少部份女性員工，大多數目測係40或者50歲，你問佢地做左幾耐，佢地有d係做左二十幾年，好鬼忠心服務社區同社會唔跳糟，例如amazon 或者DPD等其實都可以考慮架麻。

人事上，同事超級nice同friendly，仲會時不時關心你好鬼健談，但傾計時間只限10點半出車前，因為出左車後堅係直落無得停，如果你有乜唔明佢地都會好有耐心講你知，但其實都係手板眼見功夫，派得耐係會勁熟你派信個四個區，簡單講即係成個postcode熟哂，咁講一定熟過地產經紀。

但mail centre入面係有d著恤衫既manager，佢地就會西d，成日叫你派多d完成多d，因為咁佢地先會有bonus，你又會見到好多老鬼郵差級人馬成日寸呢d manager，因為真實既情況係好難派得哂，你見好多人都聖誕後先收到聖誕卡你就知發生咩事，所以有時你要be your own boss去決定點派信。

[Be your own boss]

係臨近感恩節同聖誕，由於有太多包裹都係有tracking需要priority派送，但人手就有限，有時居民唔係日日都收到信。

下?! 你可能心諗咁都得? 乜郵差唔係事必要派信架咩?!係架，郵差係可以決定一日派單數門牌，一日派雙數門牌，所以居民係有時隔日先收到信。Mail centre入面manager都首肯呢件事，因為派多d包裹佢地係會有多d錢錢。

前排DVLA係罷工，但多少可能因為太多包裹信件，你個車牌遲一兩日先到你手唔奇！

[要搬重野?]

好多讀者都問使唔使搬重野，理論上你係要揹住裝左信件既郵袋，唔輕架，起碼6kg。你用trolley推郵件+包裹去郵差車度都要用力。

派信+派包裹既時候你可以用小型郵車 (見圖)，但相對你會用多d時間，但換黎既係你唔使肩頸背痛，有經驗既郵差 (即係你partner) 會成日鼓勵你唔好用，因為唔用會快d，你諗下逐家逐戶攝信，推一推車又要停，對比人手行住派係慢得多。你諗下，其實做人有第二個情況又係成日叫你唔用，（如果明既讀者就明)，但咁樣係咪代表你唔可以要求用，保護自己? 筆者係堅持用，仲用得好efficient! 所以其實係睇人!

如果香港做過郵差黎到都會覺得好唔同，因為連我自己派信既時候都覺得，派到一幢過既apartment係超舒服，入信勁易+無狗 (筆者已經唔驚狗，但都遇過超大狗隻+大聲吠叫)。

未完待續...

下一集終極披露! 唔識英文真係做唔到郵差?! 點過最頭痕既限時網上筆試 – 性格測試 + 看圖駕車判斷路面危險測試 + 情景客戶服務測試?! 面試點sell自己sure win?! 做郵差乜野福利最好?! 筆者做乜唔繼續做?!!!