[#61 郵差叔叔送信純熟迅速送出! 做Royal Mail有乜福利咁吸引? 唔識英文真係做唔到郵差?! 筆者點解唔繼續做?!!! 之終極披露下集]

繼上兩個post後，筆者真係收到好多pm問點做郵差以及點pass個online test同面試，好surprise地覺得香港人對郵差好似有份情意結係度，真心想知道大家點解咁鐘意，係咪因為自己派信唔使好似係Office做野咁比人篤住睇住覺得好自由所以鐘意? 定係因為工作性質簡單返屋企無乜野諗鐘意? 可唔可以係留言度話我知?!

承接上文，講左一系列做郵差面對既挑戰同問題後，當然要傾下大家最關心既福利啦~

人工一星期做足40粒鐘既話一個月係有1700-1800鎊 (稅前)，如果你做到星期日既話係大概17鎊一個鐘，簡單講人工係可以over 2000鎊 (藍領工作)，大假方面有22.5日+bank holidays。

郵差係有cycle to work既scheme，會資助你買全新單車黎踩車返工 (會cap左係某個位，買碳纖單車就未必得，但普通型號代步係夠買既)。所以你見收工個時係有唔少同事佢地堅係踩車返屋企。

然後最正係乜?! 登登登登!就係佢既pension scheme啦! 對比其他公司，Royal Mail既pension scheme係慷概好多，你供6%既話，僱主係供13.6%，無錯係13.6%，你無聽錯，係超過一倍。筆者曾翻閱文件，Royal Mail既目的都係想郵差老左生活有返一樽鹽係度，可以用pension黎好好生活咁話。

[筆者做乜唔做?]

講到好似好好，但你做乜唔撈先？！係咪因為郵局無得識靚女呀?! 筆者以前係office做公關文職工作，用腦比較多，較少使用體力 (聲明絕無歧視藍領工作，相反十分佩服身體壯健既人士，因為筆者真係唔屬於呢類型)，雖然話做左一排郵差已經適應左惡劣既天氣同酷寒既環境，體魄亦更強健，但始終體質屬於高消耗型，就算食完野食飽左隔一陣都好快肚餓，但呢份工係直踩，否則係好難3、4點前收工。

朝早食完早餐返去做野，去到大概1點已經好肚餓，因此每次派信自拍都殘殘地費時show樣，好難直踩到3、4點，更遑論在低溫或壞天氣下體力消耗係更快。所謂頂得一時頂唔到一世，筆者亦知道份工唔岩自己，另一邊廂文職亦已有消息。

但呢份工係迅速幫我了解左呢個postcode，以及呢區有乜樓係靚，本地人又點樣裝飾佢地既屋，以及門牌號係需要裝燈照住/外牆掛一個獨立郵箱比郵差放信/包果係會方便到郵差超多，最重要係了解到郵差堅係會排除萬難去將封信派到比你 (有好多舊區既屋前花園都種左好多野包括樹枝橫生或者好難進入或內有惡犬，但郵差都會用佢地既方法嘗試去到你門口攝封信入黎比你，看似簡單既工作，但日復一日，年復一年既堅持係值得尊重)。

[郵差聖誕籌款，獲區內居民頂力支持]

早前聖誕有位郵差叫Phil Hammond，係聖誕眾籌100鎊諗住幫輕下佢幫自己搞既婚禮，點知區內居民知道後幫佢設立左網站，超額完成籌款達到2000鎊，居民話多謝佢咁耐以黎忠誠服務左佢地咁耐，並讚佢係最佳郵差，連Royal Mail知道單野後都表揚佢做得好好，件事仲搞到Phil好感動!

[連環筆試點過?!] [由於筆者曾簽保密協議不可以公開太詳細講筆試同面試內容，因此過到筆試及面試既心得已放於Patreon]

有興趣既讀者係可以去Royal Mail jobs度申請工作: https://jobs.royalmailgroup.com/ 。好快你就會收到電郵通知要做筆試。筆試分三部分，分別係性格測試、路面駕車危險判斷測試以及派信情景模擬測試。

性格測試係判斷你是否適合做郵差，問題主要圍繞你是否喜歡戶外以及你係戶外某d環境下你會有咩行動。不限時。

路面駕車危險判斷測試就係睇你有無道路危機意識，會有好多題目係有圖片比你圈出圖中既immediate threat，你見到呢d threat識唔識減速定會踩油直去惘顧安全?

因為你其實渣緊郵差車，係代表緊郵局，有咩差池其實都會影嚮到郵局既口碑同埋品牌。近日就因為有郵差派信期間人有三急柯左係人地屋企花園度，結果比門口cam影到放左上網公審，聽講已被革職添，所以著住制服係要有所警惕，唔係亂咁黎，千祈唔好好似某地方既制服團體，作奸犯科樣樣齊，堅係羅正牌既爛仔。不限時。

最尾一個測試就係派信情景測試，答岩既話通常接住落去個條都會係駁住相關連，題目比較長，需時去睇同消化，有小小考閱讀理解能力既feel，mc題三揀一去睇你既作答是否恰當。限時作答。

[面試點sell自己sure win?][面試題目、如何作答以及衣著談吐等心得已載於Patreon]

面試要求你帶齊所需文件(包括NI、英國車牌、地址證明、Right to work等等)，最好唔好漏帶，但漏帶左見有同事都可以後補。我文件齊，然後由mail centre最大主管以及Line manager interview，面試問題有4條，相對簡單，用簡單英文都可以pass，主要介紹自己同講相關工作經驗點樣可以幫到做郵差，以及情景題目，保持eye contact+笑容係關鍵，過程只係20分鐘，感覺好快。

[唔識英文/英文差真係做唔到郵差?!]

唔想比假希望讀者，唔識英文係真係做唔到。但如果你只係英文差，咁又ok，因為筆者覺得面試係簡單無乜野，限時既最後一個筆試先係相對較難，因為筆者自問做左企業公關十年英文都叫ok，但睇題目係需要時間，需要一定程度做閱讀理解能力同logical sense先會pass到個test，有好多讀者都回饋話衰左係個筆試度，呢層唔使擔心，因為筆者記得大部分既題目同答案可以同你分享，你要記住你做筆試係屋企上網做，無人睇住。

[香港車牌做唔做得?自動波是否ok?]

所有郵差車都係棍波，自動波好抱歉地係唔得。香港棍波牌得唔得? 我鼓勵大家試左先，路係人行出黎。筆者係面試當日係出示英國駕駛執照，準備充足及妥當可以建立好印象。

[報名參加英國港僑協會分享會，2月12日禮拜六晚上8-9點] 最後，筆者好榮幸獲得英國港僑協會幹事Adrian邀請分享關於做郵差既體驗，如果讀者有時間可以mark定日子現場同我互動分享，有咩問題都可以即場問! (見圖)

唔想睇字? 即刻去片: https://youtu.be/R66hck7mnys