[#62 筆者好似撞邪咁跌入騙財陷阱痛失錢財! 臨近歲尾騙徒手法層出不窮只能當破財擋災?! 報警都無用求助銀行有無機會攞返d錢?! 上集]

筆者覺得一直唔會發生係自己身上既騙案竟然發生左，成為左自己諗都無諗過既受害者之一。其實呢單野同好耐之前既高科技電子零件一千蚊一粒一樣咁低智但我都係中左，實在太蠢，實在抵鬧，但究竟呢單騙案點樣發生? 騙徒又用咩手法黎昆我錢? 筆者最尾損失左幾多錢?! 請比我深呼吸一下容我慢慢、慢慢咁講比你聽...

話說前日星期四，一如以往，氣溫相若大概7度，如常地朝早送肥蕎仔返學後就趕返屋企WFH了。時間上都幾趕，連續兩個會要開，早餐都未食。一開完會諗住準備食少少野先繼續做，突然間收到一封以CEO名義寄比我既電郵，內容係同我講佢開緊會，打唔到電話，陣間有個presentation要做，想我幫手做小小野，但就想要我手提電話先。

當時一開始我覺得無乜野，我新人，佢無我電話好正常，於是乎好快就覆左佢我既手提電話號碼。話說send完電郵一分鐘佢就add左我，whatapps我話有個好urgent既 task想我幫手，問我介唔介意。我新黎呢間公司，CEO叫到唔好意思托手掙，就問佢有乜野可以幫到手非常樂意幫忙。

佢同我講叫我去就近既超市買Google Play Store既gift card，我諗一諗都好簡單者，就問佢要幾張，價值幾多等等既問題。呢個時候佢既答案我本身係應該要質疑，但唔知點解個刻我好似比人落左降頭咁唔識思考，佢同我講叫我去到睇下有幾多張先再算。大家諗下呢句野，係咪好有問題?!

當我去到tesco發現有得買之後就問佢想要幾多張，佢同我講要3張，每張面值100鎊既Google Play Gift card，我無諗太多好快就買左，因為呢個面值係香港黎講實在唔多錢，但其實係英國黎講都叫做幾多下，足夠買到部雜嘜既洗衣機，而當時我係完全無問過佢 1. 公司幾時會入返錢比我 2. 佢用呢d卡既用途係presentation入面係有乜意義。

我直情好似鬼掩眼一樣，完全聽哂佢指令，買完之後撕左gift card後面銀色封貼比左activation code佢仲要影左相佢睇。

當我以為任務完成事情告一段落之際，呢個時候佢竟然叫我買多3張卡，每張面值100鎊! 呢一下就好似晴天霹靂咁敲嚮左我神經，咪住! CEO 唔會咁架噃! 我認為高層人士永遠知道自己做乜，唔會咁樣散開要求買完又買，個下我就覺得自己係咪比人呃左?!

我即時問個條友買呢d卡既目的係乜，仲蠢到問個條友呢個係咪陷阱黎，然後我要求佢打比我。而當下其實我係即時打過去，因為覺得伏味好重，佢係即時cut左線，然後佢打返比我講左一聲: hello Sam就收左線，又借故text我話唔講得電話。由呢一刻開始既對話我就覺得一個CEO唔會咁樣講野，亦同我認識既CEO講野口脗有所出入!

然而，一聽到聲個下我已經知道自己深深地扔左撻，因為把聲根本唔係CEO! 即時收線入個chat度delete我send過去既相+將三張卡既code入落自己個google play 戶口，可惜發現已經太遲!

未完待續...

唔想睇字，可以睇片: https://youtu.be/wPWCfwigZDc

#uk #bno #uklife #英國生活 #香港人在英國 #Ukmrpr #manchester #scam #intelligent #ceo #phishing #emailscam