[#63 筆者好似撞邪咁跌入騙財陷阱痛失錢財! 臨近歲尾騙徒手法層出不窮只能當破財擋災?! 銀行出手幫忙究竟筆者有無攞返智商稅?! 下集]

估唔到一篇跌入騙徒點數卡陷阱既文章就感受到香港人既人情冷暖，有唔少人留言話筆者當交智商稅啦，又或者講唔係麻，條橋咁舊咁都中抵死啦等等既說話，事實再一次證明香港人係好鐘意睇人仆街，仆得越甘，笑得越大聲，子華神既棟篤笑受歡迎不無道理。

但令筆者感到十分窩心既係，有好多讀者pm筆者睇下我是否ok，有無陰影，有部分讀者甚至安慰筆者人生路不熟遇到咁既事唔奇，幫筆者講說話，係呢度想講非常多謝你地，世界因為有你地係可愛左好多，相信香港人亦會因為有你地既關心而係異地有更多既支持。

出文係果然可以拋磚引玉，見有其他讀者留言話佢既公司都有同事試過中招，仲無左500鎊，同公司講左竟然比佢claim得返錢，我講笑話間公司真係好值得做，哈哈。

承接上文，一發現對方係騙徒經已係太遲了! 我當下知道300鎊已經凍過水，但嘗試保持冷靜入返對話入面扮野同佢周旋，扮爭小小錢先買到第3張卡，叫佢過返100鎊比我先 (呢個時候其實我係想減少自己損失，亦嘗試唔好觸動佢神經住，希望佢繼續用呢張電話卡，我再報警既話警方都有機會追縱到佢) (天真地咁諗)。

非常可惜地當我察覺既時候，對方都察覺到我已經知道自己被騙了，唔再覆機，講真，騙徒點會咁傻，係得我先咁蠢。

即時返左屋企，發覺自己miss左同office manager既會，就同佢say左聲sorry，亦簡單交代左自己跌入騙案既經過，覺得自己應該追唔返d錢。佢聽到都非常肉緊，話非常之抱歉聽到我經歷呢d事，亦講左英國有好多呢d騙案，公司既其他同事都有收到呢d電郵嘗試趁你分神或having a bad day既時候hook you up，令你容易中招上當。之前公司亦試過有一個同事中過招，但整體本地英國人黎講就好少會中招。

我非常同意，係香港都有好多買點數卡既騙案，我當時都覺得點解d人會相信，自己從來無上當，轉過頭黎到英國，未摸清網絡騙案係點發生已經中左招! 佢建議我搵銀行幫幫手，睇下可唔可以攞返d錢。當時我覺得係無可能，因為我係同tesco買野，又係我自己傻send左activation code比人，點會有得羅返?!

後來，我請office manager send個簡單電郵比公司其他同事，希望佢地警惕以CEO名義寄出既電郵，我唔想公司入面再有受害者。 (本身其實唔想講呢單野比office既人知，因為岩岩入職就有單咁瘀既野，講出黎好尷尬，但覺得如果幫到其他人alert scam係值得，所以無諗咁多。) 佢亦有建議我同銀行講可能有機會攞返錢。

呢個時候為左檢討自己，睇返騙徒寄比我既電郵，原來佢係用左CEO個名做寄件者名稱，但個電郵係GMAIL黎，當時未食早餐又開完會，分一分神無細心留意。

思前想後，都係報警穩陣D，起碼警方可能憑住電話同電郵track到騙徒。另一邊廂，我亦聯絡Chase銀行講述有關自己被騙經過。

哈哈，唔search由自可，一search點解周圍警局係google map上面都係得1星或者2星，仲要話waiting time好長，職員態度惡劣既? 於是乎我就決定唔去警局，上網搜尋有關騙案既野，發覺原來報呢d性質既案係上action fraud既網站，係一個全國性既網絡詐騙報案中心，報完就得唔使去差館，聽落係咪好兒戲?

銀行個邊反應好快，係訊息個度聽到係咁既案件之後就即時通左電話，感覺上佢既處理快過其他傳統銀行，仲叫我upload哂所有證據同埋同騙徒既對話比佢地研究。我都依佢地指示做左，但覺得300鎊應該都係跌左羅唔返，只係希望有關單位警覺唔使再有咁多人受害。

如是者，事情係鋒迴路轉咁發生! 銀行連續兩日都幫我跟進呢單案件，仲要埋警察報案編號，係兩日後既星期六早上撥左輪比我，話我聽會refund個300鎊入我戶口，話我聽會refund個300鎊入我戶口，話我聽會refund個300鎊入我戶口。

我聽到個下係完全O左嘴，即使條數唔係直接係fraud，簡接經過tesco都可以refund到比我實在係比到存錢係Chase銀行既人一份額外既安心。而Chase係聽我論述案發經過既時候都十分有耐性，並以支持既態度同我講佢地會調查，即使我同佢地講其實係我自己too naive too simple。係呢度係十分感謝佢地既幫助，佢地亦offer左有關防範呢d騙案既tips比我，希望我以後小心。

去到呢度，你都可能覺得筆者太易相信人，太傻，其實我都同意。有一點想講既係，office manager同我講呢度就算有呢d small errands小差事，CEO都唔會或者唔應該搵我去做，係應該搵返相關同事去做，亦會用公司錢petty cash，絕唔會叫你私人羅住出黎先，如果有下次都應該要即時拒絕及查證，唔需要怕尷尬咁話，有別於華人職場乜都拍硬檔做左先再針既文化。

同時，我既奴性又真係太重，因為以前係agency做野老細要乜我通常都比左先，出黎行講個信字，黎到呢邊就捉蟲了。我亦仔細檢討自己，有諗過騙徒其實好醒，睇到我update左linkedin，撞我電郵去試，同時亦透過linkedin知道我係華人，可能比較容易入手。加上大環境work from home，你未必知你老細做緊乜，如果係office，即時打聲招呼就已經避到呢d騙案。大家如果係做office既，都請額外小心。

--------- √ 如果大家有時having a bad day分神中左招既，記得留低越多證據越好! 會幫到警察或銀行知道件事既前文後理，容易解釋件事及追縱騙徒。筆者今次可以話係有驚無險。

√ 嘗試唔好alert到騙徒你已經知道自己被騙，要繼續扮被騙，將相關騙徒既資料包括行兇所用電郵電話交比警察/防詐騙中心。

√ 之前我開Chase戶口其實純綷為左1%回贈，估唔到佢地處理事情好efficient，最重要係態度非常好，無話筆者其實不如當交智商稅算啦，反而係非常supportive，係呢度再一次多謝佢地，Ayaz、Arthur同埋Kate。筆者之前曾經寫過Chase開戶文章，呢度係傳送門: https://lovfang.wixsite.com/ukmrpr/post/54-%E7%94%A8debit%E5%8D%A1%E6%9C%891-%E5%9B%9E%E8%B4%88-%E8%B2%B7amazon%E9%AB%98%E8%87%B33-%E5%9B%9E%E8%B4%88-jp-morgan%E6%97%97%E4%B8%8B%E7%BE%8E%E5%9C%8B%E9%8A%80%E8%A1%8Cchase-%E8%8B%B1%E5%9C%8B%E6%88%B6%E5%8F%A3%E4%BD%A0%E7%94%B3%E8%AB%8B%E5%B7%A6%E6%9C%AA-%E4%BB%B2%E6%9C%89%E5%BE%97%E6%8A%BD%E7%8D%8E%E5%92%A9%E6%96%99%E5%AD%90-%E4%B8%8D%E6%98%AF%E5%BB%A3%E5%91%8A%E7%B3%BB%E5%88%97

√ 有事按正常程序報警，保障自己，唔好覺得自己好蠢好傻，每個人都有分神做錯野既時候，事後檢討改進自己，唔好再犯錯就ok。

√ 身邊如果有朋友中左招既，你會選擇同佢講當交智商稅啦，定係切切實實去安慰佢幫佢，係你自己選擇要成為一個乜野人擁有乜野氣場既決定黎。

√ 感謝有send pm或留言安慰筆者既讀者，超窩心，有時你簡單一句都可以有好大既impact。 ---------

唔想睇字，可以睇片: https://youtu.be/wPWCfwigZDc

如果你鐘意我既分享，誠邀你加入筆者既Patreon，唔單止有獨家影片可以睇，黎緊仲會有outlet代購優惠!

[獲85244谷主邀請受訪講述受騙經過係英國交智商稅: 【BNO的故事】UK賭神遇騙案? ◎搵到新工◎仲要係老本行◎英國銀行會唔會賠錢?]

https://www.youtube.com/watch?v=I4F20kQwcTg