[#65 夜遊曼城靠Getir?! Electric moped 一電兩騎體驗城市景色同氣氛係最好? 10度氣溫岩岩好騎車最爽?! ]

話說近排收到讀者pm問我見工既野，然後就問左一個幾得意既問題: 筆者，你日頭有文職要返架啦噃，做乜仲返Getir咁辛苦呀?

其實我想講返Getir係完全無辛苦既感覺，因為佢係計鐘完全唔chur，唔似其他deliveroo、justeat或者外賣送餐咁勁chur，超危險，仲要有汁水，諗起都核突。返緊工無送order既時候可以自己進修下或者同同事吹下水。有order我都慢慢黎，因為安全係最緊要，另外其實佢送既區域係電單車8-10分鐘內一定去得到，所以就算你慢慢黎，overall黎講係顧客角度其實都係好快。

好耐之前我已經好鐘意電單車，考埋牌，亦係香港係遵守交通安全底下的情況下風馳電制過，奈何有左小朋友後變左渣家庭七人車，我諗呢個係好多男人有左家庭既其中一個轉變黎。然後又因為香港實在太熱同潮濕又成日落大雨既關係，每次騎完車其實係變左一個汗人，個種味道，OMG，堅係頂唔順。(就咁睇返d字都覺得有味)

黎到英國，呢件事又突然變得可行左! Getir輕鬆賺錢之外，仲可以係成為車主前體驗下呢度騎車既生活，其實堅係幾爽! 因為凍凍地既氣溫係最岩滑雪之餘，騎車都係必然選擇。最正係乜?! 就係電動電單車仲要無臭味，無噪音，仲要對環境係環保好多，岩哂我。係香港其實已經睇中左Zero 同Maeving，好想快d做車主。

香港人以前係香港最期待係乜? 唔使講除左旅行，都一定係旅行。離開香港係外地旅行用自駕形式，日本、泰國同台灣係勁適合電單車旅行，仲好過租一架車，唔使隔住玻璃，直接感受、睇同埋聽到你去個個地方既環境同埋文化，真係好正。想像下你經過櫻花樹、紅葉、竹林或者係小島上面欣賞海天一色，個種感覺同體驗係無其他野可以取代。

返Getir既好處係正正欣賞曼城既skyline同景色，又令我了解左自己住個區邊個位係好區，邊個位係多銀色樽仔係地下，邊個位d屋主係勁有心機佈置自己間屋，簡直同郵差一樣可以極速了解你個區d鄰居係點。另一個正既位係有d位你永遠唔會去，但因為送groceries既關係你係可以一睹呢度既local住既社區有d乜，配套係點，不失為一份了解地區既臨時好工，如果你有計劃買樓，先了解後買應該係最完美，以免捉蟲。

呢陣子送groceries個陣仲識到係Salford住既香港人，堅係有緣做左朋友，有學生、有住左一排既情侶、又有岩岩搬黎無幾耐既家庭，小朋友紮紮跳，希望你地好好享受呢度既生活。

---------

√ 話說已經refer左好多師兄做呢份工，要澄清一點係ebiker係唔使refer直接申請就得，電單車就係你做滿100小時之後你同我都會有300鎊referal fee可以收。

√ 有師兄得私家車牌黎到換左牌之後 DVLA咪送左AM牌比你既，要注意其實AM牌係唔得的，你要上佢地既課程叫電單車CBT，要比200-300鎊學左之後，公司先會比你做，CBT有效期一年，同埋只可以駕駛125cc以下既電單車。

√ 有師兄想申請電單車呢份工係要年滿21歲公司保險先會保，如果你係18-21歲佢係唔會比你做的，請各位留意。

√ 唔知呢度既讀者有無係Ducati、Yamaha同Ninja既fans呢?

√ 超鐘意Shoei同Arai日本頭盔既圖案，因為勁多crossover，但係呢度日本既選擇少好多，反而好似AGV等既意大利牌子都好高級好靚!

√ 究竟我講左渣電單車好舒服有幾多次? 唔知我做呢份工既讀者會唔會以為我講緊咸濕野?!

---------

唔想睇字可以睇片傳送門: https://youtu.be/JqrsnCDjesE