公司黑人: Someone stole our escooter on Friday!
我: Was it stolen overnight?
公司黑人: Nope, the escooter was gone when we were working, can you believe it? No one saw it and recognise the thief!
我: When did it happen? Didn’t we spot the thief when he was riding our scooter?
話說salford區d治安其實一向都麻麻地，住左係度一年，見盡形形色色既奇怪事，但好彩地未有一d超不幸事件發生係我身上。
有一日返工就聽到同事講，竟然有部電動電單車日光日白被人笠左。我一聽到個下係o左嘴，因為公司呢個warehouse直接出貨比客人，得一個出口，邊個偷野咁沙朴，入左黎好難出返去，點解咁講?! 就係因為要離開視綫範圍起碼要冒住200-300米既直線距離入面都無人睇到既風險，仲要日光日白勁清楚一定無走雞，仲要有同事睇到係一定會追，我地呢度仲要勁多架車，可以追到佢無電都得…
我即刻問話事人報左警未? 我地有CCTV睇左未? 佢話報左警，但就無CCTV。無理由架噃，平時我地呢度有個MON影哂貨倉內外一舉一動，再問深D，不由得滴哂汗! 你估點解?! 原來CCTV 同 Monitor就有，memory card就無? 我心入面超大聲 “下”’ 左出黎，竟然裝假狗慳張memory card?!
報左比曼城警方跟進，雖然架電單車大大個Getir logo，但根據同事既電單車資深 “經驗”，架野係電動應該凍過水，被人即刻帶去車房劏左佢羅cash走人，點解? 因為收個條友都應該會知道係賊蔵黎，除非個賊去噴完油先賣，但正常都唔會咁做，一定一定無得當二手車咁賣。
Anyway，點解話同事有經驗，事緣佢都係早一個月買左架汽油電單車，過左幾日係街被人笠左，又係發生係salford區，好彩既係佢報左案亦有買保險，叫做執返身彩。Salford區真係條條街唔同，新屋區當然好好多，但舊既排屋區有d堅係污煙瘴氣，有d其實睇條街就知，所謂市容，你就知個度係咪好地方。所以如果要買樓既香港人，強烈建議搵人去睇或者黎到英國先買，隔山買牛風險大。
再問下其他同事，原來有位同事之前渣架車送貨去一個學生campus既時候唔見左條匙，我一聽即刻覺得有警滾，於是乎金田一上身，推測一定係有人係宿舍附近執左條匙，再track住我地同事返warehouse既路線知道左架車平時停係邊。
當日傾傾下呢單野都覺得呢單野相當有可疑，但都覺得個賊好醒又好笨，點解咁講?! 醒係在於佢識搵我地既大本營係邊 (Getir網站無，要用app先會知)，笨又笨在公司車正常應該會搵得返?! 同埋賣公司車好大風險講真，車房收賊蔵都係罪黎。
如是者過左幾日去到星期三我再返工既時候，返到去我見到d好不可思議既野搞到我擘到勁大隻眼。咦?! 點解架車出現返既仲要無穿無爛? 即刻勁八咁問返同事，唔問由自可，一問覺得有d野!
曼城警方話部車係一個o靚仔偷左，未夠秤，截獲地點係Bolton。我一諗唔對路喎，咁遠?! 呢度去高速都要30分鐘，架電單車限速限左30mph，仲要未必夠電，常理係上唔到高速照計去唔到bolton，但如果有人放佢上van仔再運去bolton就唔同講法! 我地推測係o靚仔去賣車前就比人捉左，分分鐘係車房報寸報警 / 有人見到無著getir制服渣緊getir電單車唔對路。
同事一聽到即刻笑左。我問: 你笑乜呀? 佢地話好大機會其實係有組織犯案，推個o靚仔出黎認偷車，事緣呢度o靚仔未夠秤犯事既話原來判好輕，就好似香港既男童院女童院咁。運得架車都應該over 18歲有車牌，雖然可能唔夠秤渣車既事都時有發生，但諗諗下都覺得呢單野唔係單純簡單既偷車案，而係有組織集體偷車案。
大家都係度笑大家日光日白大家係咪太忙無留意架車被人笠左，呢件事簡直係要用神奇黎形容到而家都未有人知係點發生，淨係知無左; 另外呢件事之後我諗公司都會裝返memory card或者同閉路電視公司例如好似ring咁比年費mon住d車; 有人可能問架車而家點? 已經投入返工作一切如常，但架車都可能好驚訝有咁既奇遇; 偷車賊點? 警方話會落案起訴，但同事推斷刑罰唔會太重咁話。
---------
√ 保安費無得慳，better be prepared rather than regret。
√ 有保險又買埋gap insurance應該無問題，但claim返d錢都好煩。
√ 曼城警方神速搵返車，你又估唔估到? 因為平時好多local都話警察唔做野，但有時睇野唔好淨係睇表面? 我個時被鄰居懷疑虐兒都驚動左好多人包括警察，傳送門: [#19 我個VISA要收皮了?! 我差d就被差佬拉?!]
https://lovfang.wixsite.com/ukmrpr/post/19-%E6%88%91%E5%80%8Bvisa%E8%A6%81%E6%94%B6%E7%9A%AE%E4%BA%86-%E6%88%91%E5%B7%AEd%E5%B0%B1%E8%A2%AB%E5%B7%AE%E4%BD%AC%E6%8B%89
√ 架車大大隻Getir logo，要被人拆骨可能又真係難d。
---------
_______
Linktree: https://linktr.ee/ukmrpr
Patreon: https://www.patreon.com/Ukmrpr
Facebook: fb.com/Ukmrpr
Instagram: instagram.com/ukmrpr/
我囡囡肥蕎仔IG: instagram.com/kiukiubelle