[#74 用locrating睇學校一目了然? 雖然話唔想做虎爸但過到黎點都要揀返間good或者係outstanding小學? 揀學校係咪真係要咁認真?! ]

黎到英國終於可以脫離香港太變態既教育制度，一個會功課太多興趣班太多chur爆你小朋友同你自己既教育制度，一個乜都要學乜都要比較既教育制度。但講真，比較係人之常情，係父母既都會想自己既仔女出色，攞獎，品學兼優，所以黎到英國都無可能亂咁揀一間學校，而係想佢地讀一間唔錯或者幾好既學校。

筆者係曼城，成日聽到港爸港媽搶貴哂sale同altriham既樓，點解? 因為要鄰近outstanding小學，最搞笑聽過話個邊小學有大半班係香港人，其實聽落通通都好正常，我唔求我阿囡超級無敵叻，但都想佢讀返間good既小學，點解?

因為呢度既學校係真係有時會唔教野，返去淨係玩、玩同埋玩，咁如果予學習於玩當然係最好，但有時係真係得個玩字。我非常認同小朋友要有一個愉快開心的童年，但都想佢地去一間有planning既學校，變左可以玩得開心之餘學到野咁就perfect，當然唔好太多功課啦，否則又變左我做，唔係我阿囡做。

我都想了解多d有關呢度既學校教學理念、數據同排名，除左上官方Ofsted睇report之外，有一個方法我諗大家都知道，就係Locrating。比小小錢，就可以好容易睇哂d數據。

咁話說鄰近outstanding既樓實在太貴筆者買唔起，好彩就近都有幾間good既小學，一睇，唔對路噃，全國有16000間小學，排前面top36%既，即係大概排第5000既小學又係good，排bottom30%既小學又係good既ranking😵‍💫，呢個時候，記得去google review睇下家長有無留咩comment，或者上學校既social media望下佢地管理成點，有無成日update小朋友既情況，都會係一個幾好既指標黎。

至於所謂outstanding既小學，當然有d係最top，你好明顯睇到所有數據都係比較好，無論係學生語文能力或者數理能力，但有時有d學校佢既排名同埋其他ranking又唔係話同真係good既小學相差太遠，所以呢度都有個技巧，就係如果你揀到間幾好係good既小學，但又未到outstanding，附近既樓相對可能會平小小。

當然，以上只係參考數據，始終作為老豆老母，了解自己小朋友既興趣同潛力，放佢係一個適合既學校或者環境係最好，多過成日只係爭排名或者數據，始終佢係一個人黎，唔係乜都可以羅黎比較。

例如我個囡肥蕎仔佢係好鐘意歌舞同埋食野既，我就朝呢兩方面訓練佢多d同埋比佢去上音樂班，佢enjoy之餘又主動學，相得益彰，否則放佢去佢麻麻地既跆拳道班，次次都耍手擰頭，拉牛上樹，哂你心機之餘又哂時間。

另外可以睇埋學校教學理念，了解下老師教學手法就最好，始終教還教，都要阿囡受先係最好，咁先最有效率同埋佢最enjoy。

學到野重要，開心更重要，快樂童年超級無敵重要，因為幸運的人用童年治癒一生，不幸的人用一生治癒童年，希望大家都搵到間好既學校讀。

---------

√ 由於筆者subscribe左Locrating，可以睇到學校排名同數據，仲有好多其他資料，包括間學校入面唔同人種既比例、學業成績及家長係咪推介等等，因此已經將登入名稱同密碼放左係patreon同patreon讀者分享，如果你都計劃緊子女讀邊間小學，歡迎加入我既patreon，了解唔同資訊之餘，免費用我account搵埋學校。

√ 雖然話人既際遇真係可以好不一樣，但揀一間學校真係唔能夠馬虎，筆者從前讀既小學同中學都叫做小有名氣，出到黎社會做野堅係發覺有時係職場上遇到校友真係一個良好的助力，有一種自己人的感覺。母校的校訓 – 慎思篤行，我依然記在心中，我相信係影嚮緊好多人行事應有既態度及手法。

√ 筆者從前係公關公司工作遇到良師益友，想借此機會多謝Keely及Kelly栽培小弟，令到筆者可以了解公關界既知識同技巧，以及待人接物應有的態度。小弟係生左小朋友之後，佢地仲主動介紹育兒書本比我，令我從中得益不少，無私既分享同助人既精神，小弟一生銘記，亦係啟發我創辦此專頁既源動力之一。

---------