[#11 英國買車飽食驚風散? 個agent係咪路架之上集?!]

係英國買車可謂係我人生入面買野體驗最驚奇既一次，真係未遇過一個咁爆正既sales，一方面係因為隔離期間睇唔到車要網上買，一方面可能真係第一次同英國sales打交道唔知道佢地籠野，我相信我呢個經驗總結係可以比好多香港人分享同埋笑下。

話說我地黎之前大概一星期我已經上autotrader搵定心儀車款，到埗airbnb後再睇既時候就發覺d車加左價(同d租盤一樣)，而且選擇少左好多(講緊日本車Honda，Toyota個d，歐洲車大把大家唔使擔心!)，我完全明白發生乜事，因每日勁多人過緊黎UK，D車賣得快係真，加上製造新車既芯片短缺，唔排除本地D人都轉買二手車玩住先。

我心儀架車係Southampton，距離hazel grove其實好遠，要三、四個鐘車係倫敦南部運上黎，諗一諗其實有d牙煙，但偏偏個價錢係得呢間叫做幾好，個廣告仲話跟埋black line pack ，即係架車有包圍個d成架車靚仔d，其他都貴一千鎊以上或者咪數較高，心底覺得無咁抵 (因架車係同款車型既頂級版，有heated seat同埋天窗)，所以當時竟然就做左個決定係呢間車行買，就係中伏既開始，而家笑得出，但當時係勁傍徨。

住Airbnb期間，我地有同個host Stuart傾計，講開買車通常都有5-8%既議價空間，但係網上英國圍爐取暖個group度爬文發覺大家近來買車既經驗都係好難講到價，同埋我買車個時間唔係車商轉季大減價既時間，所以有小小難度，但我都利用左我自己鑽研既一d心得，減到車價既2.4%，喜歡的可以參考下，不喜勿插純粹個人分享。

--------------

議價及爭取優惠既心得 / 買車需要注意既事項:

√上google review及trust pilot望下車商個評分先，唔好儘信auto trader個評分，買得安心好重要，否則手尾長。

√唔好買太遠既車，就算可以14日無條件退換，有咩事都係自己麻煩。

√揀一d可以offer 14日無條件退換既車商，站係車商既角度，要deliver架車出去都唔可以太樣衰或者有重大issue。

√而家香港已經green list，唔使隔離，建議買車一定要現場睇車，試車，同望真d架車，千祈唔好心急，千祈唔好心急，千祈唔好心急，重要既事講三次!

√問清楚所有野，因呢度既人好興逐個step先同你講，唔會講overall picture。(你諗下申請bno visa個application都係逐個step先問你細節，唔會一開始一次過比你知哂所有細節等你準備好哂。我做公關做左超過十年既毛病係所有野都要知同掌握清楚，否則容易得失客人，交代唔清楚變左好似乜都唔知同埋不負責任。)

√架車未比Road Tax，可以同車商傾爭取減免，以及要求佢地送返架車既原廠地氈，識有朋友架車黎到無地氈要去costco買39鎊起。

√我上去官網check架車未做MOT，通常都可以請車商係賣比你之前做埋MOT先。

√同個sales講話其實都睇中左另一架車，而家只係兩架入面揀一架，希望佢可以平d快手做到呢個deal，因我唔使睇車又唔使試車，增大誘因佢可以賺到quick money，大家開心win-win，why not? 議價幅度建議係5%，自己睇餸食飯。

√呢邊既人興happy deal happy business，唔鐘意講好多價，有得讚既話就讚對方，絕對有so，佢會幫你跟得足d。

√落訂可以傾，唔使一定落500鎊咁多，可以200或300鎊都得，規矩係死人係生，當然要問得禮貎d，話d錢由海外匯緊入黎，無咁多cash係身。

√岩岩黎要等幾日先有傳統銀行卡，黎英國前一定要申請revolut，而家睇返如果當時無revolut真係好頭癢，好多野都比唔到錢，因lloyds bank張卡都等左四至五日，你知啦，頭一兩日到埗係攰到hihi，整得黎都幾日後，變左出得關都未有卡比錢買車，預先有account係快好多! 鐘意既可以用呢條link登記: https://www.revolut.com/referral/kashin0qa4

√如果對個transaction係有疑問，要果斷取消，不要猶疑!

---------------

因為架車有一個前車主，而係前車主之前佢係一架車廠既agent車/用黎test drive既車 (即係兩個前車主)(我諗係因為架車係頂級版既關係 ) 個價錢係比 market price平小小，所以覺得有得再減小小都已經算係咁，然後同個sales傾話可否儘快送原廠做services以及做MOT 因急住用車 (車齡4年，架車有原廠5年service plan但不是approved car，想係隔離完即刻有車出去睇租盤/買盤) 。

咁個sales就話要check check 聽日覆我。就係咁，我就係星期三落左200 鎊訂金，然後傾左運送方式係佢派個人渣過黎運比我，都接近300 miles，心入面諗覺得ok就go ahead。

個sales話第二日朝早一早九點幾再打比我update MOT同做services時間。咁ok啦，後來同Vivian商量覺得渣過黎都有風險，通常呢邊都興運架車過黎，於是諗住第二朝再問下運過來要幾錢等等。

星期四(第二日)朝早等呀等，等到中午12點都唔見佢打黎，於是我就打過去問下。

---------

我:Hello? May I speak to Patrick, please?

佢上司: Patrick is on dayoff today. May I know who is calling and is there anything I can help you?

我:This is Sam who have just put a deposit for the vehicle XXX with car plate number of XXX yesterday. May I know your name please?

佢上司: I am Patrick’s supervisor and my name is James. Happy to help.

---------

就係咁，我有講過疫情期間好多車行都會係咁遠距離既情況下運車，唔知佢可唔可以offer咁既service比我。佢就話佢會checkcheck然後send左個電郵比我，係原先運費既1.5倍價錢，我上網check其他公司運車其實都唔使咁貴，請佢可唔可以平d，當日佢都無再覆我(office hour內)，然後神奇既事發生了。

星期五(第三日)遲遲都未收到Patrick打比我，我係中午時間打過去，佢突然話唔好意思滿足唔到我對運車既要求，經過同佢阿頭商量，想取消交易 (我聽到個下o左嘴，我勁等車用，所以叫大家千祈唔好心急，然後autotrader另外一架差唔多價錢既頂級版亦係呢兩日無左) ，個下我都想取消交易，心諗點解可以突然取消咁無credit，明明autotrader同google個評價都好地地?

問佢係咪會賠多200鎊比我因為佢失信，佢又話唔係只係會退返我個200鎊比我，比佢吹脹哂，問佢退錢係點，佢話10個工作天，我當堂灰哂… 乜可以咁架咩?! 輾轉溝通下發覺原來係佢supervisor乜都唔想減，所以唔想繼續，我覺得件事好鬼好似夾好哂...

於是我當時即刻提出話我可以自己安排運車， can we still honour the deal? 佢又突然轉軚話咁就ok，仲話可以星期一幫架車做services同MOT，然後為免有詐我再同佢double check架車係咪come with black line pack，佢話係，就係咁，我就繼續去馬。

-----------

但其實個晚係咁問自己:

1. 點解仲會繼續單deal

2. 點解仲會信佢(因佢突然想取消單交易搞到我對佢無哂信心，而我又無左另一架車做back up 既option)

3. 人生路不熟但要confirm運車既資料同價錢

4. 因件事鬼鬼地，係咁問自己如果過唔到驗車，又有野要整同埋哂多兩日時間之後應該點做... 因就黎可以出關但去唔到睇樓，airbnb 得返一個禮拜鬆d... (本身book左25日)。

------------

然後之後發生既事係哈哈哈，講你都唔信呢條友係點樣做生意係咁比驚喜我。

太長，下集待續...