[#341 英雄莫問出處]

難民都可以好有成就，假如NHS當初聽佢講，改革應該可以慳納稅人n咁多錢。政府今時今日要填補既財政黑洞亦都有機會無咁大。

發生咩事? 先講故事背景。

Thuria Wenbar 嘅父母原本喺伊拉克做醫生，1999年一家以尋求庇護者身份嚟到英國。當時戰事將至，佢哋先後喺中東幾個國家同德國生活過，最後落腳英國，做任何搵到嘅工作維生。Wenbar 七歲入學，學英文、讀書成績好，之後成功成為醫生。

喺急症室工作期間，佢發現太多其實唔算緊急嘅個案，令佢好沮喪。32歲嘅佢於是決定改變現況，2018年同人創立網上藥房兼遠程醫療公司 Evaro，希望幫助更多唔需要去急症室嘅病人。

公司去年收入達1,210萬英鎊，扣除利息、稅項同非現金項目後盈利約47萬英鎊，過去三年年均增長110%，入選2026年《Sunday Times》英國增長最快科技公司榜單，並創造咗164個職位。

一家人初到英國時被安排住喺倫敦嘅難民住所。Wenbar 話父母好努力保護小朋友，唔想佢哋感受到現實壓力。佢爸爸曾做酒店夜班接待員，換取一家人同住一間房嘅免費住宿；之後搬去另一間屋，條件係佢媽媽要照顧同一棟樓嘅長者。最終一家定居 Slough，爸爸亦曾到海外工作寄錢返屋企。

為咗維持生計，佢哋做過唔少「好誇張」嘅兼職。例如有禮品卡公司每裝1,000張卡入膠套只畀5鎊，父母就將呢件事變成一家人嘅「家庭活動」。

Wenbar 形容成長過程「混亂但美好」，令佢養成「唔好投訴，做就得」嘅心態，對日後白手起家創業好有幫助。

佢好鍾意讀書，修讀六科 A-level，亦享受攞好成績帶來嘅肯定。細個自學編程，本來想做軟件工程師，但父母希望佢延續家族幾代嘅醫學傳統。佢笑言：「如果唔讀醫，佢哋可能會同我斷絕關係！」

------------------------------

佢入讀東安格利亞大學（University of East Anglia）醫科，覺得課程較實務、競爭感較低。早期要同扮演病人嘅演員練習溝通，曾經向「病人」講乳癌診斷時忍唔住喊，呢啲經歷令佢之後更擅長面對病人同經營公司。

大學第一年，佢認識讀藥劑嘅 Oskar Wenbar。兩人2018年共同創業，2019年結婚。

因為鍾意高壓同混亂環境，佢曾考慮做軍醫，最後選擇急症醫學。第一晚值班就喺 Norfolk 嘅 James Paget 醫院遇到電梯內心臟病發個案，即刻要實戰學習。雖然享受急症室節奏，但佢好快對大量非緊急病人感到無奈——例如尿道感染，對患者好痛苦，但未必係急症，只係約唔到即日 GP。於是佢開始設計演算法，希望病人未到急症室前就可評估需要，甚至預先開藥。

佢曾經三番四次向 NHS 提案時被嘲笑，但伴侶Oskar 相信佢嘅想法，決定辭職 + 租一個2,000平方呎倉庫創業。初期資金靠兩人做臨時醫療工作（locum）維持，倉庫設備全部DIY、用二手貨。網站最初只提供18種常見藥物，例如事後避孕藥、偏頭痛藥、尿道感染治療。現時已涵蓋80多種病症，2024年取得監管機構 CQC 註冊，可安排驗血、解讀結果同診斷。

早期網站查實係亂咁黎，Wenbar 晚晚喺 Facebook 編程論壇求救，第一個工程師就係喺論壇幫咗佢兩個鐘後請返嚟。如今公司已有30名工程師，亦加入AI功能，甚至可透過病人對住咪咳嗽評估肺活量。

2019年12月係公司轉捩點。Wenbar 為咗出糧維持公司，25日內做咗18個夜班，之後決定必須令公司盈利，開始裁員、精簡業務、提升財務管理。

======================

公司原名 E-pharmacy，但投資者嫌太悶。Wenbar 用程式篩選易讀嘅域名，最後揀出14個，再用一場綜合格鬥賽決定個名——將每個名配對一位選手，贏嘅就用。不過當 Evaro 輸咗，佢哋反而發現已經最鍾意呢個名。

2024年1月，公司獲首輪150萬美元外部投資，包括 Cornerstone VC 同東安格利亞大學，搬到18,000平方呎新場地。佢哋仍然非常節儉，例如原本預算3,000鎊買新工作枱，最後用 Ikea 傢俬自己砌。

2025年公司同成人用品品牌 Lovehoney 及月經追蹤App Clue 合作，提供NHS網上避孕服務。未來計劃繼續投資技術，例如數碼測量體脂、血壓等。Wenbar 亦每隔幾個月仍會返急症室當值，保持同英國公立醫療系統嘅連繫。

以後大家頭暈身㷫症狀簡單既，可以多個選擇。真係病重既就真係要睇醫生。呢位家族世代係醫生既伊拉克人，真係造福唔少人。

#有腦有抱負有計劃 

#私營係出路

#nhs已經龐大到不能倒

#第時上市要留意