[#339 點解英國水費貴？]

Sam Fang
Feb 19
3 min read

琴晚講完電，不如講埋水。係人都知，英國水費都係好甘，點解會咁甘呢? 查實之前報導泰晤士水務出事既時候有略略講過。

第一當數私營化制度，唔係制度問題，係監管問題，不過先同大家講左背景先，呢篇野稍後再講點解監管出問題，係人為野出事所以先積積埋埋出事。

英格蘭同威爾斯嘅水務公司係1989年私有化，公司要向股東派息、要為投資借錢、利息＋分紅都會反映喺水費。簡單講，你張水費其實包括：

-水本身

-基建維修

-借貸利息

-股東回報

第二當數英國水務基建老化，英國水管好多係維多利亞時代起落，漏水率高，需要大量翻新。簡單講，未來10年需要投資 £1000億以上，成本當然全部加落水費。

第三係英國用水效率低: 水管漏水嚴重、基建舊、投資不足多年。

大家應該想像到結果係咩: 要大規模補投資以及價格急升黎支援營運開支。

第四係地區差異好大，英國唔係統一水價。蘇格蘭同北愛最平，倫敦周邊就偏高水費，英國南部最貴。

======================

咁歐洲係點既呢? 好多國家係公營以及市政府營運: 冇股東分紅壓力，價格通常穩定啲。筆者放左張英國歐洲水費對比圖係左下面，大家可以click黎望下。 (用左2-3人既水費規模黎模擬。)

主要係西班牙同意大利最平，講緊平一半。雖然最貴既仲有德國同丹麥，但英國問題主要漏水多、排污問題以及公司派息高。

有人可能會問，黎緊5年點先? 預計大幅加價 30 – 50%，主要係用黎更新污水系統、防止排污入河、建水庫。

--------------------------------------

戲肉黎啦，文章開初筆者話係人為搞事，搞咩事呢? 自從1989年私有化後，部分英國水公司被私募基金、基建基金、主權基金及退休基金等收購。

佢地玩槓桿財技令部分水務公司負債極高，即係發左債話要發展水網絡整好基建，但舊錢就比人攞左去舞、攞黎派息。發展水基建? who cares? 袋左先。早年監管機構懶懶閒，所以先有之前泰晤士水務危機既出現。

結果係公司債務暴升、利息成本上升、未來投資壓力變大。用泰晤士水務再做例子，多年派息派左幾十億，管理層笑騎騎，但負債就越黎越多，大概14-18億鎊，一個屈尾十，係市況好既時候仲可以包裝靚靚高價脫手。想像到水務公司去到最尾因為高負債，應付唔到高利息，就係要準備破產，要政府介入，要求大幅加價，由市民埋單。

講到底，如果政府接管，都係市民埋單，因為係用你d稅金去埋單。核心問題其實係制度設計，唔可以一竹篙打一船人，唔係話「私募基金＝壞」，而係監管設計容許高槓桿、派息、利潤抽走、水基建投資延後。

衰在佢仲要係自然壟斷行業，市民冇得揀供應商，所以一旦財務出事，基本上一定硬食用戶埋單。（加價／政府救）

===============================

英國監管曾經過於寬鬆？

好多政策研究都認為2000–2015年，監管機構 Ofwat 容許高負債模式、鼓勵金融化、強調「低水費」、但投資要求不足，佢係幫兇。結果係點呢? 短期水費低大家happy、長期基建積壓。呢兩三年爆煲，查實做呢d野既基金高層，都知係計時炸彈黎。

要解決現時問題解決方法只有：

加水費

減派息

政府出手

實際上通常係：

加水費＋減派息＋國有化一齊do

再同歐洲比較下，佢地係公營、負債低、派息少、長期投資穩定、雖然水費未必最平，但波動細。