[#340 成日話英國電費貴]

對比歐洲同美國其實貴成點? 早兩日先同大家研究究竟屋企個暖氣應該長著同需要時先開，定係一早一晚開最好，講到尾其實都要睇返問題既根本，每度電幾銀?

英國國際能源署（IEA）話，英國家庭嘅電費差唔多係歐洲最高之一。電費升得比人工快，主要原因係淨零排放相關徵費，搞到市民剩返嘅可支配收入少左，用嚟去應付其他生活開支。

英國家庭平均每度電（kWh）要俾約 30.45 便士，貴過挪威（9.5p）、法國（23.7p）同荷蘭（21.8p）。美國電價就算幾平，大約 12.9p 一度電。所以如果你有friend係美國 / 加拿大，你見佢地係長著暖氣，屋企著短袖好舒服。

------------------------------------

IEA 話：「自 2019 年以來，好多國家嘅家庭電價升幅都跑贏收入同通脹，令住戶電費負擔更重。」

「喺英國同好多歐盟國家等發達經濟體，計埋通脹同購買力之後，電費喺家庭總開支入面所佔比例都上升咗。」

同時，英國家庭拖欠能源費用嘅情況都愈來愈嚴重，由 2020 年初嘅 13 億英鎊，升到舊年 9 月大約 45 億英鎊。

平均嚟講，英國家庭一年電費約 963 英鎊 (有無咁平... 筆者慳住用舊年都要95鎊一個月平均)，但實際用電成本只係其中三分一左右。其中，電網成本約 217 英鎊、各種補貼（主要係可再生能源）約 220 英鎊，其餘係供應商利潤同增值稅（VAT）。

----------------------------------

能源業界組織 Energy UK 政策總監 Adam Berman 話，政府長期將各種成本加落電費度，令英國相比其他經濟體競爭力更差。

因為電價太高，英國用電量反而跌咗：由 20 年前約 350 太瓦時（TWh），跌到而家約 272 TWh。但全球用電需求就持續上升，IEA 預測到 2030 年前每年會增長 3.5%。

另一方面，能源大臣 Ed Miliband 計劃大幅擴建輸電網，未來五年預計要花 900 億英鎊。政府話呢個係 2030 年實現潔淨電力系統嘅關鍵。

有業界人士認為，相關電網費用會再加落市民電費：平均家庭電網收費可能由去年的 52 英鎊，升到 2030 年超過 120 英鎊。

Octopus Energy 指出，英國而家用電量其實比 20 年前少約 25%。

佢話：「就算未來用電量有少少上升，都仲遠低過以前，所以唔應該被誤導，以為一定要花幾百億去做其實可以避免嘅電網同基建項目。」

Recent Posts