[#342 永居申請 Q & A - follow up]

Sam Fang
Feb 19
4 min read

上次訪問完永居申請成功既Sam，見到唔少讀者依然有好多好多疑問，有見其他版主都有出個Q&A解答，本頁都想一次過解決大家係腦海中仲有既問號，希望係填表或者申請時更加順利。

筆者強烈建議，就算你未夠鐘填表，都上去望一望個system，查實都幾簡單直接，無乜野係複雜，望完一次你就會踏實超多，玩左幾次，甚至你會覺得: 其實都幾易架喎~

-------------------------------

1. 快證幾時搶最好?

呢條問題最多人問，相信有唔少人既小朋友想用home fee讀大學，或者成日要外遊工幹，要6個月唔離開英國真係好難，不如快快脆快證搞掂。

訪問Sam個時，佢有講過查實成日唔同時段都有機會放快證出黎，筆者都有諗過可能係因為佢屬於1月尾/2月頭比較早申請既呢批人，所以比較容易見到快證。問左超過三位移民顧問，通常都係半夜12點最多quota放出黎，呢個大家知道就好。

另外，TLS正常約打指模時間唔加錢都係七日後，但如果加錢 (50鎊至150鎊) 你就可以最快1日後打指摸，但要記住，打指模前你係要upload哂所有文件，簡單講，最好你submit比錢搞永居時所有文件softcopy ready隨時可以upload。

2. Home office 點知你係一家人申請?

其實上網填表個時，有一頁係比你填返之前BNO Visa申請時既UAN號碼，個度就係話比case workers知，你係自己一個申請，定係一家人過黎英國。除左呢part，如果你係dependent，仲有一個部分係要填你跟邊個BNOer過黎。個度就係填主申請人申請左永居個UAN。

3. 如果小朋友滿18歲，係咪可以獨立申請?

無錯呀，如果小朋友已滿18歲係adult child，基本上唔使等父母雙方入左紙先再入紙，而係其中一方入左紙就已經可以入紙。

4. 英國生左bb，係咪一定要申請visa? 唔申請直接入藉得唔得?

移民局既建議係要有visa，咁bb先有最佳保障，包括醫療。有個案係父母入紙快證永居，只係用左3日就批左，之後用MN1 表格直接幫BB入藉，永居費用都慳埋。但要留意，內政部有機會會係審批期間send電郵問你做乜唔幫bb申請visa。

5. 英國小朋友在學證明

查實如果你覺得搵學校寫信太煩太耐，你都可以用一個平台既資料去幫你，上面會有哂你過往就讀學校資料及現今學校資料，資料放留言度比大家參考。

6. 護照過期點搞?

你申請BNO Visa 既個本護照，無論係BNO或特區，必須要有超過6個月既有效期，因為永居既資格係會register落你本護照度。

建議如果你兩本護照都有，最好兩本都有效啦，過左期既話就Renew啦，早前筆者拍過護照renew既注意事項比大家睇，有興趣可以睇返本頻道既youtube。去visa centre打指模個陣，都記得要帶有效既護照啊~

7. 填表個時填國藉揀HKSAR定China?

知道呢條問題困擾唔少人。正常黎講，如果你係用BNO做BNO Visa既，係你填其他nationality 個陣係可以 add返特區護照資料，係可以用HKSAR。

但如果你得特區既話，因為本野係寫住CHN，所以你係要填 “CHINA”。

8. 長者有D乜野文件證明在英生活?

GP信 / NHS信 / 醫院信 / 投票信等，雖然bank statement 唔係official 要求既文件，但如果顯示到日常生活開支都可以照交，道理係兩set唔同source既文件去證明在英生活。

9. 等批期間evisa status係咩?

查實等批期間，你唔可以離開英國，你個evisa status係無咁快update到，佢會依然顯示做visa狀態，甚至你攞到永居後，短時間內都唔會update住。如果外遊既話，你最好keep好批永居既電郵係身。

10. 入左紙永居，但公司話我簽證到期，點搞好?

根據英國法律 Section 3C Leave，只要喺過期前入咗 Form申請ILR，而家嘅工作權利係會自動延續，直到 Home Office 出結果為止，所以係可以繼續合法返工嘅。

你可以提供返個 Application Reference Number 畀佢哋，佢哋要去政府個 Employer Checking Service (ECS) 網頁入返你啲資料，Home Office 就會出返一封 Positive Verification Notice (PVN) 畀公司，證明你有權喺度做嘢。呢封信通常 5 日內就會收到，有效 6 個月。

留意Share Code 系統未必更新得切，所以一定要用 ECS 呢個途徑。

11. Consent form 要點簽法?

查實consent form有三份，第一份就係要check你既application資料，申請者必須要簽。

第二份係話你有無同家人聯合既聯名戶口或者水電煤等utility 聯名戶口，有既就雙方都簽名，例如老公申請，有同太太聯名戶口就第二份要太太簽名。

第三份就係話你同第三方sponsor既人，即係可能朋友財政上有贊助過你visa申請既，就要佢簽，正常呢part 一個家庭無外人幫手唔使簽唔需要理。

小朋友夠16歲可以自己簽，小過16歲父母代簽consent form，簽大人自己個名，簽第一份就得。

----------------------------------------------------------

希望大家都申請順利，加多句補充，上面既答案唔係9吹出黎，而係問過成功申請人士以及結合移民顧問Anson得返黎既答案。跟住成功過既人既經驗去行，就係成功既最佳例證。

永居成功後，你會收到電郵 "your application for settlement (also known as indefinite leave to remain) has been successful."

然後過一排你登入UKVI ，會發現E-Visa改為Settled。

#馬年祝大家馬上永居

#ILR