[#134 英移公關不專業影評 - 多得蕭生話香港電影工業無前途，港產片因而越做越好! 正義迴廊劇力萬鈞!]

Sam Fang
Apr 5, 2023
3 min read

「壞人唔識講真話架?」

「傻仔唔殺得人?」

看畢正義迴廊，心情良久不能平覆，呢套電影為我帶黎好多反思，加上劇情反映香港社會既縮影，看似會沉悶既法庭戲，都拍到緊張深沉，峰迴路轉，當中更有好多細節位係好難釐清，誰在說真話? 誰在扮野意圖打甩控罪扮豬食老虎? 法庭已經唔係要搵出真相，而係睇人點樣去interpret，以及社會大眾如何認知呢件事，黎去決定究竟被告既未來會係點。

適逢近期發生蔡天鳳碎屍案，令我睇呢套戲既時候更加上心，心中不禁疑問人世間要點樣長大既一個人先會殺人仲要碎屍，先唔講複雜程度，做左咁既野既人餘生是否會每晚發惡夢? 良心如何過意得去? 看畢此戲後方知正義迴廊係建基於2013年3月1日發生既大角咀肢解父母案，並不是虛構既劇情，不由得心中打左個冷震，人成長既價值觀係可以如此扭曲，為利益不惜一切傷害身邊人，永遠現實發生既人同事係可以比你想像中更荒謬，更莫說一入警門深似海，再回頭已是百年身。

試問蔡天鳳案如果係一套戲，佢既曲折位由一個編劇去諗既話係點都唔會諗得到，係一定會被人ban橋話唔合邏輯的，但唔合邏輯情節往往現實中見最多，先由受害人數起：與前夫離婚後買樓，屋契點會寫前老爺個名？與現任伴侶點會擺過酒就當結咗婚，而未曾正式註冊？十年之間同兩男生咗四子女，點會仲有時間頻頻飛巴黎（及其他大都會）出席時裝周保持名氣場場keep住曝光率？

然後睇睇鄺姓前夫究竟係一種咩生物？婚後三年抱兩，居然撥冗出蠱惑結交同性戀者騙財，短短一年間四名老襯合共進貢五百萬港元，是基佬粉紅錢特別易呃，抑或此人身懷某些絕技？落網後棄保潛逃，六年來是否靠「父蔭」逍遙法外固然是個謎，大拿拿五百萬何去何從也引人暇想，另外，古語有云打虎不離親兄弟，既然肉誘基佬買黃金咁好搵，唔知有冇夾埋參與謀殺案既親生大哥拍硬檔，以警二代打孖上3P作招徠?

說回電影正義迴廊，無大cast但對白精境，每個演員既演出簡直入木三分，情節緊湊、拍攝手法尤如置身現場與陪審團目擊兇手被告行兇，簡直大氣都唔敢透一下，更莫講去廁所。

非常欣賞導演及劇本加入傘運元素，當中對白若是香港人必定頓時明白，諷刺現今警察無法無天，制度千瘡百孔，睇既時候心情複雜，既是心中舒一口惡氣，但又概嘆惋惜香港已非昔日法治之都。見到「冤獄比放過一個有罪的人更不公義。」「疑點利益歸於被告。」既對白，不期然令我諗起民主派47人究竟何時方有自由之日?

正義迴廊在一幕幕激烈的法庭辯論下，兩位被告上演出「天才」與「白痴」的戲碼，真相似乎越辯越模糊。九位不同背景的陪審員在休息室展開話語權的角力，同時陷入對與錯的正義思辯當中。好多時真相仲係咪咁重要? 社會大眾同大家點樣去認知一件事又係咪比較重要? 以為陪審團好pro一定會有公正裁決係咪一廂情願? 人始終係人，有好多限制，但呢套野有好多野關於社會、家庭同做人方面都值得大家思考。