[#17 原來無寬頻係好痛苦? 屋企終於駁通左之重回現代人生活回憶錄][附回贈連結]

Sam Fang
Apr 3, 2023
3 min read

由於實在太開心，裝完之後我差d嗌左出黎，終於有寬頻用啦~ 由於bnb個wifi真係麻麻地，到搬入黎租盤度又要等寬頻安裝，無寬頻既生活尤如回到原始石器時代咁既feel，乜都要依靠電話數據，用既時候就住就住 (唔係無限plan) ，呢段期間其實我已經activate多張卡買多d data去support 上傳影片，但始終唔夠用，搞到今個月出少左好多片。

回到正題，係香港，裝寬頻個費用通常個合約都包埋，仲要勁快就裝到，原因係一棟大廈咁多客，加上咁大競爭，電訊盈科呀香港寬頻呀個d一定舖哂光籤，差在一個師傅幫你駁入屋。

係英國，雖然都有apartment，但住屋既都係大多數，book個寬頻安裝原來係要等兩個禮拜，仲要如果你間屋外面個範圍唔係屬於你自己 (非freehold)，間寬頻公司可能要同council或者相關部門申請鑽地拉條線比你，都唔係一個細工程，變左其實有兩個party黎服侍你，一、就係班挖你門口路既工人幫你整條線; 二、就係鑽你間屋塊牆拉條線入屋帶埋modem同router比你既師傅哥哥仔。

你可能會問，做乜一同二唔可以一齊做又要等多幾日或者成個禮拜既? 因為呢度唔係香港，d野唔興一條龍，大家各有各專業，雖然都屬於同一間公司。

話說岩岩租到間屋個時我已經即刻申請寬頻，但個安裝日期都排到兩個星期後，然後到安裝前一日臨收工時間我收到個message: your installation is postponed another two weeks for application to council for digging and drilling... 我除左無言都唔知可以點做，上網問進度都只係叫我等。

如是者我足足等左成個月先裝到，但原來咁樣已經叫快! 上網睇見到有人係咁不停比人postpone都幾大獲，我仲住係bnb個時係附近識左另一家香港人家庭話足足攪左兩個月，你知啦，而家英國興work from home，屋企寬頻係必須，一係就要手機買無限plan data，郁d都25鎊起跳，唔係因睇片chur哂d data，係因為要開teams call 或者zoom call。做開office job都應該知我講乜，一個20分鐘有視像既會議閒閒地用over 10gb data。

而我係無寬頻期間每日都去圖書館用佢地個wifi，仲因為咁同圖書管理員熟左，你話係咪好搞笑? 返左屋企或者係街就用電訊商voxi，點解? 貪佢stable同social media data 免費，傳送門: [#6 電訊商，識揀一定揀...] https://lovfang.wixsite.com/ukmrpr/post/6-%E9%9B%BB%E8%A8%8A%E5%95%86%EF%BC%8C%E8%AD%98%E6%8F%80%E4%B8%80%E5%AE%9A%E6%8F%80

好啦，咁呢間寬頻係邊間? 咪係virgin media羅，你以為我想數柒佢? 絕對唔係 XD，而係用左佢一排都覺得幾好，都係個句，訊號穩定同快係好重要，而我有D local 朋友係度有講過其他寬頻公司例如EE或者Talktalk個d真係好水皮，時不時斷下比d驚喜你。

Virgin media 個modem同router係共同體黎架，穿透力仲要好勁，屋企三層都收爆，唔洗再買wifi mesh extender，最緊要係係香港唔使再hand carry個router過黎，慳返d位裝緊要野或者裝多幾個杯面唔使中超買咁貴 (呢兩日睇奧運搞到我勁掛住日本杯面 XD)。

加上黎裝個師傅仔幾靚仔，乾淨企理有禮貎，仲make sure我上到網先走，服務分100分，我仲請左佢飲可樂。佢鑽牆期間，有兩塊碎磚跌左出黎嚇左我一嚇，但佢都用玻璃膠黏返好make sure everything is fine，我見隔離屋有d都係virgin media裝既係就咁由佢，唔會補返玻璃膠或者黏返好舊磚，變左間屋外面望過去係好似有個隆咁，網上亦睇到有人話要同virgin安排換返舊靚磚，但要等一個月。

臨走前佢話用以下呢條link登記: (http://aklam.io/iglcbY) ，就你、我同佢都有50鎊可以齊齊賺。如果大家岩用又想要一個好既鑽牆寬頻師傅，可以用呢位哥哥仔叫Adam (已得到佢同意，可以pm我取得佢電話，只限曼城。)

記得記得，裝寬頻前要問準屋主，因為涉及鑽牆同拉線，否則退租個日你個租金按金可能因鑽左牆或者拉左線對間屋有變動而凍過水。

P.S. 同唔同既網友交流左，發現網友Bella都係寬頻拖延既苦主黎，佢分享左原來可以請寬頻公司寄住無限數據wi-fi蛋畀你用住先，直到裝到寬頻為止。

P.S. 2023年更新: 後來發現，原來寬頻遲左黎裝，你係可以CLAIM佢斷日計，詳情睇下面網址，大概講左MISS左安裝APPOINTMENT佢地要賠29鎊 / 另外每一日既延遲佢地要賠5鎊左右。

https://www.ofcom.org.uk/phones-telecoms-and-internet/advice-for-consumers/costs-and-billing/automatic-compensation-need-know