[#183 英國葬禮要幾銀? 使唔使等位等到地老天荒定呢邊都好興撒骨灰落海? ]

筆者仲記得2017、2018年，香港人連等一個骨灰龕位，都可能要等一年以上時間，主要原因當然係 “土地問題”，根據當時立法會特別財委會文件顯示，2018年香港有3.5萬名先人輪候公眾龕位，平均輪候時間達50個月，即4年零2個月。

因此當時仲推出新廣告新創意，叫人 “環保殮葬”，將先人骨灰撤海，享受無拘無束既 “自由” 咁話，但對於部分重視風水同傳統既香港人黎講，風光大葬似乎係佢地偏向既選擇。

現時，除左每年1次綜合編配公眾骨灰龕位之外，食環署自2020年12月起每月都推出約1,700個位於曾咀靈灰安置所的新建龕位供市民申請，因此，現時公眾龕位據說係有足夠供應，基本上無需輪候。

根據香港政府推行的骨灰安置所發展計劃，當局已在各區物色到合適用地，其中14個項目目標合共提供約60萬個新骨灰龕位。2019年至2022年完工的項目已提供約24萬個新骨灰龕位。即將於2025年完工的沙田石門安興里將提供約4萬個新龕位，期望可逐步縮短公眾等候骨灰龕位的時間。

就咁睇，香港既龕位問題似乎已慢慢得到合適解決，對先人同後人黎講都係一個好消息。而香港搞葬禮，根據資料，平均要10萬至20萬不等入場費。

==============

黎到英國，究竟英國既葬禮要幾銀? 睇返保險公司Sunlife既數據訪問左多達英國1500個家庭及100個葬禮公司總監，基本葬禮要4200鎊左右，而平均總體費用就大概9700鎊，已包括喪禮、中型棺木、租用送殯車、醫生及神父/禮儀師費用及遺產處理費用。

調查所得7成人死前有儲錢準備自己身後事，但得54%人士留低足夠金錢，部分後人要承擔殮葬先人既費用，所以有趨勢顯示後人寧願直接火化先人，並無安排葬禮等儀式，費用只需1200鎊。

英國地大物博，找尋好山好水既地方安葬先人自然較輕鬆簡單，費用亦較便宜，坊間亦有超市集團有分支公司搞殮葬，好容易就搵到，e.g. Coop，呢邊亦好容易見到有小型墳場係住宅隔離，環境祥和寧靜，周邊屋價亦通常有折讓。

#英國葬禮

#費用方式