[#187 特區護照海外續領搞幾耐? 有乜手續?]

繼之前續期BNO護照既分享之後，相信各位黎左英國都可能需要經歷一次幫小朋友續特區護照呢件事。因為本護照有效期得5年，每個家庭如果有小朋友既話基本上都會續既。

今次筆者幫個囡續期特區，用左3星期大概21日就攞到本新既特區護照，請睇以下時間線:

1月15日 - 上特區搞護照個網揀續期護照，填好資料、upload新既證件相、由於小朋友不在港讀書需要準備一份副署人簽名既表格證明佢係本人、用信用卡比錢 (連埋投寄費用)。

1月18日 – 收到通知香港入境處會係1月24日投寄阿囡本護照。

1月24日 – 入境處投寄護照。

1月31日 – 收到電郵通知下週某特定朝早時間可以帶同文件領取新護照。

2月5日 - 前往曼城中國領事館領取護照。

--------------------------------------

領取新護照需帶備以下文件:

-小朋友本人親身領取

-小朋友舊特區護照

-小朋友香港身份證

-父母護照

----------------------

話要帶但無攞黎睇既文件:

-出世紙

-父母身份證

-副署人有簽名既表格

注意: 如果太耐無攞證，個證件會退返香港。

======================

續領特區護照費用: 185 HKD

速遞費: 205 HKD

需時: 21天

領證過程好快，Show文件，攞新護照，剪舊護照角，走得，全程少過15分鐘，入領事館前，好似大陸搭地鐵咁，要人+袋過機，現場都唔少人。

另外，有個搞笑位係，收到領事館電郵，佢係copy哂所有領證既人取證，筆者係睇到哂其他人既電郵…… 其實呢個世界有bcc功能…

整體感覺:

都叫做快靚正，續證價錢對比英國護照黎講平一半，但需要同學校講請半日假，因為佢攞證既時間只限平日，希望作為一個參考比想續證件既朋友同家庭。

=============================

證件有乜唔同?

小朋友顯示資料個頁對面個頁係observations，有放大左小朋友張相係度，呢頁既後面都係observations，有一個好大既中國印，寫明本護照係中國曼城領事館頒發，呢個印因為係紅色，結果係前面睇小朋友張相就會好奇怪點解好似小朋友個口咁大咁紅...

=============================

最重要記得做乜?

上UKVI網站，用返你小朋友舊護照資料登入，更新返新護照資料，咁之後出入境，都唔使帶舊護照。但而家國藉個欄，一律變哂China (見圖)。

Recent Posts