[#19 我個VISA要收皮了?! 我差d就被差佬拉?!]

話說前幾日傍晚時份Vivian煮緊野食，肥蕎仔因肚餓係咁係度嘈，又係廚房抆住Vivian件衫係度大叫，有幾次差d掂到好熱的焗爐。

係一邊睇緊書既我收到Vivian求救，都忍唔住要去睇下發生乜事，黎到廚房就睇到肥蕎仔係度無理取鬧，我嘗試將肥蕎仔抱埋一邊，由於佢好大聲，可以話係震耳欲聾既地步，我地都同肥蕎仔講唔可以再咁做，因為好危險 (因佢有前科，就黎3歲好難教) 然後肥蕎仔又使出佢既拿手好戲，就係喊到拆天，佢既脾氣我地實在太了解，然後係我地耐心同佢講緊媽媽煮野唔可以攪住媽咪既時候，我突然聽到好大力既拍門聲。

咁我當然暫停一切，落去睇下發生咩事。一打開門，就見到係對面街住既一班白人細佬仔係度，後面就有一兩個佢地d家長。

白人細佬仔劈頭就問: is your baby okay? Did you hurt the baby? I know what Chinese do!

我:no, I didn’t hit my baby. She is very hungry and just crying! And I’m not chinese!

白人細佬仔: ask your wife down and we need to see the baby / 白人家長對住佢個小朋友講: you shut up and go back to your home!

我: no, no, no, listen, we didn’t hurt the baby, she is crying and just asking for food, don’t get us wrong, please!

其中一個白人小朋友肥仔: if you hurt your baby, I’m gonna punch you in the face. / 白人家長對住佢講: you shut up now and get back!

我: 我勁無奈，唔知講乜好，係呢個時候Vivian就抱住肥蕎仔落左黎門口。

班白人細佬仔就同肥蕎講: are you okay? Did he hurt you?

肥蕎當然唔識答，係呆左，因為見到好多人，但成班白人+白人細佬仔就話我hurt the baby，然後我keep住話無，係一場誤會，Vivian都有解釋佢地聽，但佢地好似唔係好信。

佢地之後返左自己間屋。我都刪左門，諗緊點解佢地會咁樣…

然後過左大概5分鐘，突然有好大力好大聲既敲門聲，我心諗: 又黎?! 但我都即刻再去門口睇下發生乜事，以為班友又黎，我諗緊應該點講先至令佢地唔好繼續誤會落去。

警察:Police! Open the Door! 我:嘩，_ (自行想像呢個係咩字)，咁大獲?

我開左門，一男一女警就行左入黎，目測一米八至一米九，兩個都係白人，仲要肌肉型，佢地話收到風有hurt baby事件，所以黎調查下，佢地要求女警上去上一層同Vivian傾，男警係下面呢層同我錄口供睇下發生咩事。

由於係香港面對過黑警，我又無話特別驚，只不過覺得做乜攪到咁大? 然後我即刻解釋話一切都係誤會，但內心係度諗我個bno visa係咪要玩完了?!

個男警即場解釋做乜要入黎間屋度in a nice way，我都好耐心邀請佢坐低，解釋返件事佢聽，隨即佢睇我證件以及寫低我個名，又問肥蕎仔返學未，邊度返學以及幾多歲。

我同佢講左成件事既來龍去脈，佢都好有耐性聽，但就無寫低，事後諗返起原來佢係拖延時間比女警問我老婆關於岩岩有無hurt肥蕎既事情發生，因為當女警問完我老婆後就落左黎下面個層，而同一時間個男警係收左支筆同薄，但佢好明顯本身其實唔係要寫d咩，而係呢一刻之前，我仲聽到女警用手啪左d聲，但唔清楚係乜，相信係暗號，可能係表示無乜大礙，個男警先至無再筆錄。女警落到黎就話一場誤會，會去返對面屋同d鄰居講無野，解釋可能係文化誤會。

警察走左後，我先知道原來個女警上去上面問Vivian發生乜事個時，肥蕎仔係勁開心係度請個女警食暑條，咁又岩既，如果比我嚴重hurt既話應該會有傷痕同埋紅腫，又邊有心情請人食暑條?

呢件事之後，我有好大既得著，就係千祈千祈唔好得罪個囡同老婆! 千祈千祈唔好得罪個囡同老婆! 千祈千祈唔好得罪個囡同老婆!

講三次請每個男人都要小心，否則我應該可以執定包袱返香港有人而家勒索我話要Hermes 包包，我可以點做?

-------------

√警察反應勁快速，唔似某個地方既黑警咁成日渣流灘，同記者講無戴錶唔知幾點。

√警察第一時間分開父母，避免有任何夾埋比口供既情況出現，否則好難查出家暴案件。

√如果Vivian話我有掂肥蕎，又或者輕微打左佢一下，我個八月十五應該要洗乾淨了?

√Vivian話女警好型，做左UK citizen之後要應徵咁話喎。

√當時肥蕎仔開心享用晚餐中，難為我係度錄緊口供?!

√外國小朋友唔會因為你係大人就驚左你。

√睇返資料，原來警察係唔使有入屋令，如果佢相信入面係有罪案或者求救發生緊。

-------------