[#205 行公園其實係減壓最佳地點?]

Going for a walk 其實係英國生活既一部分，無論係城市、鄉郊或者好多唔同既地型，你都會見到d鬼著住皮鞋，低頭密密咁行、散個靚步或者巡一圈個公園。

《國際環境健康研究雜誌》早前公佈 "20分鐘公園論"，發現如果人係戶外停留一段短時間，心情就會變好，即使你唔運動、或者乜都唔做就咁發呆、都會感到放鬆同開心d，壓力自然少d。

英倫踏入春季，日照時間變長，尤其係而家成8點、9點先日落，有時唔好嫌渣車麻煩，渣出去落車透下氣，望下d綠色植物，對心情真係一個字: "舒暢" ! 英國乜都唔多，公園最多。

早前，曾經有唔同既讀者都向筆者傾計，話係英國生活有壓力有抑鬱又要搵食，無時間去做呢d野。查實而家大家都知，生理健康同心理健康同樣重要。有時即使忙到爆廠，都要搵個窗口比自己放鬆下，係非常重要，份工係緊要，但健康更緊要，時間永遠都會幫到你。

之前筆者都曾經因為公司內部既一d轉變，而感到好大壓力，出去行一轉呼吸新鮮空氣，返到黎又諗到新橋應對，辦法總比困難多，唔好stuck住，最緊要搵到出口。

香港既朋友更加要去行多d山，30分鐘車程內就有山有水，係一個絕佳親近大自然既好地方，行完山返黎仲可以紅粉菲菲，比化妝靚100倍!

#英國乜都唔多公園最多

#睇綠色植物超有效

#減壓良方