[#211 泊車唔想比人抄牌?! 香港人絕密大披露秘技以及做咖啡仔既苦與樂~]

話說，筆者初黎英國個陣，唔知規矩，泊左人地個位，第二日就食左告票 XDDD 又知道有唔少香港人黎到未必知道部分私人停車場既泊車條例，今日有幸邀請到係英國曼城大型私人停車場做左兩年幾既歐生，講下佢做呢份工既苦與樂之餘，亦同大家披露有乜野秘技可以或者有機會避免比人抄牌。

一黎當然要入戲肉啦! 究竟佢地點樣先成功抄到你牌呢? 筆者呢度唔係講緊同靚女攞電話號碼，而係點樣先可以成功向你發出告票。

歐生透露，作為咖啡仔，佢地通常會有部公司電話用黎影相，仲要係d普通model款，唔係d咩最新iphone / Samsung ultra咁好用，佢要成功抄你牌，通常會影你幾張相，包括:

1. 車頭相

2. 車牌

3. 司機位有無人

4. 停車場泊車塊牌既條例

筆者回想比人抄牌個次，的確係有呢幾張相係入面。咁有d咩原因佢可以抄你牌呢?

a. 泊左傷殘位但無blue badge

b. 泊出界

c. 泊車位需要permit但你無permit

d. 泊超左鐘  現場停車場相機會捕捉到然後向你發告票

e. 泊超左鐘但採用pay and display  咖啡仔照舊會影相出告票

f. 你去麥當勞個停車場但唔係入麥當勞  咖啡仔通常會坐係角落頭你為意唔到既地方，佢睇到既話基本上可以做野，歐生解釋同行通常會抄左先，等個客appeal，所以筆者早前講泊車告票既時候，曾經強調去完消費要keep單，有咩事可以攞黎appeal，同埋一定要appeal，千祈唔好怕事

g. 去shopping centre / supermarket 停車場都要留意point e所提及既規例

問到咖啡仔抄牌既高峰時期，歐生毫不猶豫答朝早11am – 3pm，原因係早班未收工，晏班又返左工，兩者重疊時間最多，所以係抄牌高峰期，大家要留意。咖啡仔一定要著制服，仲有反光衣，如果有人無著制服話抄你牌，基本上都屬於流流地。

歐生透露份工好處在於有1個鐘既break係可以自己安排時間，唔使限死，相對有自由度，一個星期大概返三十幾個鐘，公司亦都有津貼油錢。佢又話倫敦抄牌抄得好甘，24小時都黎料; 相反曼城都係24小時可以抄牌，但基本上9點後就收哂工，但大家泊過夜唔好老奉，記得都買定泊車飛穩陣d。

做咖啡仔既兩年幾歲月期間，歐生都曾經遇過驚險事情，話說以前停車場都仲係採用膊頭有部機要印張野出黎黏擋風玻璃，曾經有車主推撞佢及與其發生口角，後來私人停車場先轉用影相之後大概隔一星期出信既方式，減少左好多無謂既爭執同衝突。

=====================================

講左咁耐，究竟有乜野方法可能可以避免比人抄牌? 歐生透露佢地係影哂你架車既所有相後，最尾有個製要按既，就係 “confirm”，一日未按，一日都唔會啟動發信呢個程序。只要你係任何咖啡仔按 “confirm” 前求情，都仲有一綫生機。

但佢又分享有部分熱衷抄牌既上司 / 經理，有時避免面對面衝突，會係你面前話取消，但等你架車走左，依舊會按下 “confirm” 制，歐生形容佢自己唔會咁做，因為覺得咁樣實在太陰濕，唔係正人君子所為。

佢又分享另一個秘技，就係咖啡仔係影相期間必須影到一張司機位無人既相，所以如果你見到咖啡仔做緊野，快快手跳返上自己架車，令到佢影唔到一張司機位無人既相，基本上你已經阻止到佢向你發出告票。

呢張相係關鍵，事關佢係有咩爭執私人停車場上庭必須出示既證據黎去舉證你違例泊車。換言之，架車有人咖啡仔係一定落唔到charge，原因可能係郁緊車 / 準備緊去買飛… 等等。

========================================

私人停車場雖然表面上無比咖啡仔任何quota (似乎係法例規定)，但每個月review既時候都會向你透露你既 “業績” 是否符合 “標準”。咖啡仔既薪金亦係佣金制，抄得越多越和味，所以定期會有經理 / 上司向你捽下數。

歐生做左咖啡仔兩年幾，抱住佛系抄牌既態度，初黎英國報到都成功養到家，所以真係事在人為，文匯大公成日話英國搵唔到食，講真真係流過流四。歐生透露都望緊有無其他更筍既工可以做，因為呢行始終嫌惡性行業，希望將來客人對住佢笑佢會仲開心。

筆者笑問，呢篇文出左街會唔會令佢抄少左牌影響生計，佢話每日實在有太多人大頭蝦或者違例，希望個訪問幫到香港人，減低比人抄牌既風險，筆者係度向佢講聲多謝，亦祝佢前程似錦，在英生活愉快。

credit: 歐生

Recent Posts