[#230 自由意志]

<黑神話: 悟空> 呢隻遊戲認真架世，呢排熱度十足，連筆者都迷上，講緊係睇人地玩咋，都起碼幾粒鐘，當中既故事引人入勝，值得細味。

遊戲足足砌左4年，投資額億億聲，一推出即有200幾萬人一齊係Steam玩緊，作為華人，有隻咁勁咁爆既中文game，其實係開心既，對上一隻筆者迷上既中文遊戲，已經講緊仙劍奇俠傳，淒美既愛情故事，扣人心弦; 又再對上一隻瘋魔華人市場既，當數金庸群俠傳舊版，作為大俠，馳騁於金庸筆下傳奇人物之間，快活非常。

返返正題，呢隻遊戲之所以咁爆，除左因為畫面 / 戰鬥系統有幾好 / 收錄妖怪道具之龐大 / 過場動畫及故事感動人心，筆者認為係遊戲當中所帶出既訊息 - 自由意志。而呢隻遊戲至今竟然仲未比內地禁售，筆者不禁驚訝。

話說悟空取完西經後，本應位列仙班，但睇透天庭黑暗，為鞏固權力及利益，用盡各種手段壓榨萬物，因此拒絕仙位，一心想隱居花果山，山高皇帝遠，自由自在咁生活。

但悟空既性格大家都知，點會肯歸順，天庭派遣二郎神為首嘅天兵追殺悟空。二郎神勸悟空歸順，以花果山嘅猴子猴孫做威脅，話畀悟空知二揀一，簡單講悟空比人渣住春袋，無得say no。悟空無力對抗天庭，喺歸順同自由之間，寧死不屈，選擇死喺好友二郎神手上。

悟空相信，雖然身死，但自由意志可以長存，而承繼自由意志嘅人，稱為天命人，亦即係打遊戲既你。2019年發生咩事，筆者唔需要複述，但一粒麥子不落在地裡死了，仍舊是一粒；若是死了，就結出許多子粒來。任何人既犠牲都唔會白費，大家心中仍舊記得。

作為天命人既你，係要集齊悟空身亡後分散各處嘅6根，相傳咁樣就可以復活悟空。6根中最後一根，係「意」，即係悟空爭取自由反抗強權嘅意志。其實天命人自己就係第6根，要覺醒最後一根，你要殺死失去「意」嘅悟空石猴，令悟空同天命人合二為一，咁樣就係復活悟空嘅方法，即係現實嘅你承繼悟空嘅「意」。 從來，呢個世界都唔會有英雄，只有自己承繼自由意志，挺身而出，直面被黑暗時代選中嘅天命，先會見到希望。

西遊記作者吳承恩本人就係一個久考不弟，年逾六十歲先中榜以貢生既資格升為長興縣丞，但在任僅兩年就被人老屈貪污入獄，被釋放後罷官而去。吳承恩深明官場黑暗，天庭亦即朝庭 / 內地政府，整個遊戲意識貫徹尋找自我自由既中心思想，反抗權威以及諷刺統治集團，如今遊戲科學咁直白推呢隻game，同踩綱線無分別，筆者甚至覺得背後意義，同 "讓子彈飛" 係一樣。

"生命誠可貴，愛情價更高，若為自由故，兩者皆可拋" - 匈牙利詩人裴多菲。

#今次內地整game技術值得讚

#自由價更高

#紅色藥丸同藍色藥丸

#你揀邊粒