[#24 曼城酒樓點心超水準?! 我地食點心嗌左d乜? 肥蕎仔食食下點心有甜品送?! ]

飲茶呢家野，對香港人黎講好多場合都岩。傾公事、飯聚、一家人飲茶、晨運完飲、行完山飲... 簡直係萬能key，基本上可能係日日都會做既野黎。

你問我過到黎有無掛住飲茶? 答無就應該呃你既，所以今日去完中超榮業行掃下貨之餘，都留左d時間上黎金煌大酒樓呢間野朝下聖。

咸水角、春卷、炸兩、腸粉... 睇張menu我已經流哂口水! 雖然我地得3個人，但點野既時候好似想食左成間酒樓咁 。老實講其實我地無乜期望，因為梗係覺得外地D港式野食一定唔夠香港咁好味，點心應該無咁正，但開心地黎到放係枱度既點心又望落幾正，聞落幾香，嗒落唔錯，我可以話係超水準黎形容。

呢度D夥計又好似friend咁同你傾計同埋落單，最親切既莫過於推住點心車仔出黎叫賣，仲好過香港上環蓮香樓，因為佢有得揀既點心係多好多! 熱辣辣既腸粉，皮薄餡靚，仲可以要求d乜?

話說當我入到黎間酒樓個時，其實係有小小好似時光倒流左20年前既香港酒樓 (有小小似荃灣川龍彩龍茶樓個種style)，佢地連個backdrop都仲係以前成日用既龍鳳，係勁岩羅黎擺中式酒席，如果配合埋啲打個d樂器既話 。

如果有一對著中式禮服既新人著哂裙褂係度行禮+埋d金器，不得了，應該勁開心! 而今日既戲肉雖然唔係行禮但都勁開心，就係隔離台有個老太生日! 咁岩酒樓播左一首勁開心西式既生日快樂歌，全場係望住佢，有d仲一齊拍手! 呢單野令我諗起細個個時係中式酒樓搞生日會都係好喜慶，仲會派利是/貼士比酒樓d夥計添。

咁我地肥蕎仔當然都有d動作啦，由於佢係勁鐘意happy birthday呢首歌，咁我地就叫佢去同老太講生日快樂，祝佢開開心心，年年有今日!

佢平時性格就有d蛇𠺌既本身，但係音樂既影嚮下佢今日就好勇，彈彈下走去同老太講生日快樂，令到老太勁開心!! 神奇既事情發生啦! 過左兩分鐘侍應羅左兩個蛋糕過黎比我地 (我地係笑住心諗... 下?!) 我地即刻走過去多謝老太，返埋枱肥蕎當然雙眼發光，即刻搶左蛋糕黎食，但我就心諗: 阿囡，你岩岩食到超飽已經再食唔到其他野 (超大肚dum)，點解又可以即刻食到蛋糕，究竟你咩構造?!

----------

√中式點心好有水準，包你唔會失望，應該會encore。

√酒樓保留左以前同客人friend底吹水既風格。

√如果首生日歌係 “恭祝你福壽與天齊...版本”就perfect啦!

----------

#uk #bno #uklife #英國生活 #香港人在英國 #Ukmrpr #dimsum #chinese #food #happybirthday #cake #birthdaysong #manchester #chinatown _______ Facebook: fb.com/Ukmrpr Instagram: instagram.com/ukmrpr/ Youtube: https://youtube.com/channel/UCDIhO0JrstXzy1njvsnH4Dw 我囡囡肥蕎仔IG: instagram.com/kiukiubelle