[#242 英國懲教員大不同 - 記香港人故事四

打犯、批踭、未審先判坐返幾碌先?! 你估呢度香城咩? 係英國係無呢支歌仔唱，事關呢度好講求人權。筆者有幸今次邀請到係英國監獄從事懲教員既Jim，同大家分享做呢份工既見聞，以及作為一份鐵飯碗，係佢角度會形容呢份工係幾筍。

可能大家印象中懲教員都係厭惡性工作，成日係監獄做野，會唔會好悶好閉翳架?! 故此劈頭第一句筆者就問: “呢份工其實最開心既位係邊?”

原來Jim身為懲教員，職責係令囚犯做好準備重投社會。囚犯有分四個等級，A及B類屬於搞事份子，亦歸類為如果重投社會屬於危害性較大既類別，因此囚犯會個別囚禁於50-70呎既囚室，大概等於一個香城既劏房，不… 根據超哥講法係簡撲房一樣既規模，係評估上呢類犯人有逃走意欲，以及在囚表現都係較差。

相反，C及D類就屬於自由度相對大既囚犯，有最低生活標準，最多四個人同一間囚室囚禁，放風時間亦都會比較多，主要原因係佢地屬改過自新類別，重返社會係會變返做 “有用既人”，部分囚犯刑期就黎屆滿既時候，可能有機會選擇開放式囚禁，平時日頭就離開左監獄，只需指定時間報到，及有良好紀錄就得。另外，囚犯係監獄入面係有圖書館以及gym房，不過大多數囚犯根據觀察都會做gym，多過睇書或者進修。英國監獄志在令你醒悟改過，重投社會幫到社會融入社會。

Jim 最開心既位，係幫到囚犯重新更好地投入或融入社會，佢形容囚犯可以離開監獄個下，其實自己都會感受到快樂，覺得自己既工作真係幫到人。工作既難度在於，大部分囚犯原來係文盲，無一技之長所以挺而走險，做懲教員好似幫到佢地重新計劃人生一樣，但佢提到早前政府實施既提早釋放囚犯政策，查實打亂左部分囚犯既計劃，令佢地產生焦慮。

因為要突然重投社會，又要搵地方住，呢個係對囚犯既影響以及負擔; 對懲教員既影響就在於，行政工作大增，”今日走一個，聽日黎兩個” 係Jim呢排成日要應對既情境，但提早釋放政策亦令到部分囚犯重現笑容，主要因為可以同愛人以及家人團聚，重新做人。佢強調，三類犯唔會提早釋放，包括恐佈份子、性罪犯以及有家暴記錄既人，主要係怕佢地危害公眾，又再搞出人命。亦有一類犯叫IPP，屬於保護公眾監禁刑罰，目的主要係確保危險既暴力犯和性罪犯留係監獄，直至不再對社會構成威脅。犯人通常會被判入獄數年，然後必須說服假釋委員會出獄後不再犯事先可以獲釋。

Jim 既officer職位，主要係處理監房既事務以及日常運作，管理一定數量既囚犯，每日為佢地撰寫一D評估報告，不過佢話好簡單，用Chatgpt寫都得，監獄方面亦十分鼓勵使用科技令件事容易d，清晰d，企理d。

Officer職位亦有另一類工作內容，屬於監倉既住宿運作管理，職責係睇cctv以及監視犯人，呢項工作就會同上司既見面次數比較多。

筆者忍唔住問: “咁呢度監獄既懲教員會唔會郁d犯、批踭、又叫d犯擦靚你對boots，等你見大sir對鞋笠笠令?!”

Jim: “呢度無呢味野，傷害囚犯身體唔係監獄本身應該做既事，更加唔會叫囚犯擦鞋，英國監獄十分注重囚犯人權。”

筆者再問: “英國又有無未審先判既例子?! 未審訊就囚禁你幾年等你失去自由，仲要遲遲都唔公佈審訊日期?!”

Jim: “基本上係無發生過，英國司法重視囚犯既人權。監獄亦屬於司法制度既一部分，我從來無見過未審先判既政治犯。”

P.S. 下集! Jim 揭秘英國懲教員既薪酬待遇，聽講佢都幾滿意，大假都唔少，又返得幾開心，係一個移英初期搵到好工既blessing! 敬請期待!