[#265 英國太陽能供電值得玩?! ] [長文猛料!]

早前，筆者曾經寫過一個post，講關於英國既太陽能板、每年維修以及回報期，發現當中好多人都認為無乜肉食，主要原因係英國好太陽既日子，主要係春夏天介乎4月-10月，冬天成日橫風橫雨，又陰陰地無太陽，而且安裝後太陽能板有火災風險，最好唔好搵自己笨咁話... ?!

但留言當中既讀者入面，亦有已經裝左太陽能板玩緊既朋友，而且都慳唔少錢，筆者有幸可以邀請到讀者R 黎個deep talk，比大家深入分析，究竟值唔值得玩，等大家有一個更好既透明度去了解呢單野點玩係最好。

--------------------------

先講背景，呢位讀者一家三口，住獨立屋，epc B，間屋坐北花園向南，可以攞到最多既陽光，屋頂裝左10塊太陽能板共4.6 kwh，用緊octopus agile plan。

夏天黎講每個月只係交standard charge，當每日60p計，一個月係大概18-20鎊，主要原因係太多電透過太陽能板輸送入間屋，咁R佢係有裝電池inverter，一個app可以管理哂用電，有時仲有電剩要賣返比octopus，每度電可以賣15p。冬天黎講就每個月50鎊樓下就得，10月既話只需30鎊，其餘月份大多只需40鎊，最多50鎊一定落到樓。

聽落係咪好吸引?! 因為電費真心平左，佢甚至認為由於太多電，如果可以渣埋電車，將剩餘電差落電車度用，會更抵，因為賣電既錢唔夠吸引，寧願用左佢更好。至於另一改進係，如果間屋係用heat pump，佢會連煤氣費都慳埋，不過佢亦有提醒，如果家庭較多成員，10塊太陽能板就未必夠。

----------------------------

佢憶述當初安裝太陽能板既英式奇遇，安裝個條友犯左嚴重錯誤，令到佢有一段時間未能最有效使用太陽能板既好處，發電只發一半，因為有保養既緣故，所以一直搵返該間公司返黎檢查究竟出左咩事，後來間公司因為破產未能經營落去，讀者R 唯有另外搵師博，先發現之前間公司南北極安裝調轉左重新調整後太陽能板就可以full power發電以及傳送至電池。

另外，由於佢間屋車房係獨立既，所以電池及inverter安裝在loft，就比較麻煩，擒高擒低，loft又比較黑，如果可以再黎過，佢會選擇安裝係相連既車房，會比較穩妥，就算要打理都會比較方便。讀者R亦懷疑因為當初安裝時入面較黑，師傅帶住頭燈安裝，引致安裝時南北極調轉既糗事發生。

至於揀選octopus agile plan既原因，係冬天可以係半夜低電費既時候買電，儲滿個電池第二日比d電器用，就可以避過某d凍既日子既高峰電費，呢下真心讚! 筆者越聽越覺得正，問佢回本期，佢認為10年就可以回本，之後淨賺，當初佢投資左11000鎊裝哂所有野，即每年回本1100鎊。佢已經玩左2年，未需要維修或者清潔費用，聽落真心心郁郁，亦都明白如果真係要玩同慳，基本上你要成個配套有哂，較多既太陽能板 / 電車 / heat pump / 附合資格承重既屋頂 / 向南既屋企等等。

對於有讀者關心既火災風險，佢指連接太陽能板個度係有fuse以及isolator，正常最多斷fuse，唔會引致火災，除非安裝錯誤，另外亦有個alarm，無論係屋同埋app都會有警報，可以及早阻止任何問題發生。

如果讀者R係sales，筆者可能都會積極考慮因為咁樣聽落，個方案係切實可行，而且有長遠利益，並唔似坊間所講無肉食或者太麻煩。筆者只係擔心電池壽命，讀者R就話個電池十年保養，即係起碼玩10年先~

[筆者按: 剛才讀者kenny分享: 用左太陽能板以及電池6年，單係 inverter 已經整過 N 次，亦換過 2 部。電池去到第 4 年亦成組換過。如果有保養全程包底就冇咁傷，佢換一組電池要£3000 左右。

另外有讀者指筆投資都有資金成本，本來可以攞出黎收息]

P.S. 再次感謝Rowena抽空接受訪問，無私分享知識及實際操作經驗，以及如果玩太陽能板既注意事項，等大家唔使撞板，直接得米慳錢!

P.S.S. 本頁又再拋磚引玉，引到真實用家信任真誠分享，希望大家都比個like 讀者R百忙中抽時間受訪