[#290 同父母傾計]

過左黎英國，其中一樣少左好多既，就係同父母傾計。好多時，溝通方式都係透過電話視像，遠遠唔似得以前可以面對面咁親切。但從前既時間，好多人都會掛住搵食，到你回頭一睇，先發現父母可能已經滿頭白髮。

筆者每年返香港或者約係亞洲旅行，先有同父母面對面既交談機會，由於少親身見面，都會感受到大家珍惜一齊既時間。Time近日有一篇文章係講述 "趁父母健在問幾條深入既問題，或者可以改變你地之間既關係。"

你有無真係 "認識" 過父母? 問左呢d問題，你可能會有d答案。如果你唔慣同父母傾深入話題，可以傾d輕鬆野先，例如係：「你最近有冇啲新興趣我唔知道架？」令對方放鬆。

===========

1. 「如果你呢世人係一本書，而家呢一節你會比咩title佢呀？」呢啲問題可以比佢思考同輕鬆表達父母對而家生活既一種感受。

2.「你而家咩時候覺得最平靜、最輕鬆？」可以幫你了解佢哋點樣應對壓力，亦可能引發雙方分享日常點樣自我充電。

3.「其實，你本身希望我係變成點？」呢個問題可以帶出佢哋對你嘅期望，唔止成功，亦可能係講人際關係、愛同埋關懷等等既話題。你以為佢在意既係 "你有無買樓? 每個月搵幾多?" ，

其實父母可能只係想 "你有人陪"、"你有無委屈自己呀?"、"有時唔好太博呀傷身呀" 等等。

4.「你人生最痛苦嘅時刻係咩時候？」如果合適時機，再問「你點樣行返出嚟？」可以學到佢哋面對困難嘅方法，可能會啟發你。

5.「近年你改變咗對邊樣嘢嘅睇法？」呢個問題幫助大家反思同成長，亦可能有助解開以前嘅心結。解鈴還須繫鈴人。

6.「你希望其他人多啲了解你d咩？」可以知道佢哋最重視自己邊啲特質，學識欣賞同認同佢哋。

7.「你細個屋企嘅環境係點樣架？爺爺嫲嫲 / 公公婆婆點湊大你。」例如有冇啲情緒唔可以表達、講返啲成長規矩，會幫你明白佢哋點樣變成今日嘅樣。

8.「你做父母既時候有咩最驚？」無人一開始識做父母，呢條問題幫你了解佢地當初有咩唔習慣同埋有咩壓力，令你睇清佢哋都係普通人，有佢哋唔同嘅掙扎同不安。

9. 最後一條，係有關「如果你將來走左，你希望其他人會記得你d咩？」呢條問題可以知道佢哋點睇自己同人生，亦可以等你及早做一啲有意義嘅對話，以免將來有咩遺憾。

===========

父母都係人，都想了解你 / 被了解，有d野，你唔問，一世都無答案，問左，可能都未必有答案，但你會知道佢點諗。

有d答案，更加可能會成為你成世人既養分同力量。

Recent Posts