[#31 DVLA罷完工未? 補完share code一個禮拜後終於有車牌?!]

申請香港轉英國車牌呢單野相信都搞到好多香港人一頭煙，事關DVLA早前罷工，積壓左大量既申請未做，有d英國既司機係要等個牌先開到工，早前呢d事上哂新聞全英國都知，咁當然香港牌換英國牌都因為咁有一定程度既延誤，至於係咪延誤左好多，其實又唔係!

其實佢個服務標準就話三個禮拜就應該搞掂哂d野寄埋個牌比你，咁我個人經驗就四個禮拜先搞到，可能堅係適應左英國既所謂速度，佛系等待係呢度做人既座右銘，時辰到d野就會搞掂寄返比你。

之但係其實換車牌有個插曲，事緣DVLA突然玩野要求渣BNO既香港人補share code，但好彩我收到信要補share code，前後我寄返比佢都係用左一個星期左右就將個車牌搞掂比我，係我角度黎講呢個英國標準叫做幾快! 起碼唔使又再等成個月! 其實講真香港人過到黎遇到大大小小唔同既英國事早已經培養好耐性，知道有d野其實催黎都無用，仲要激親自己，所以我諗好多香港人都學精左，係好事黎。

咁好啦，前後我寄左乜野文件去申請換車牌?! -TD320 (係香港用160蚊去申請)

-香港車牌 (我係香港仲要已經報失埋費時煩，所以其實係有一張後備車牌，寄去申請期間都叫有牌可以係英國路面駕駛，然後就算有咩事要返香港都可以渣到車，唔使臨時臨急再申請車牌。) (DVLA係會收左你個香港車牌，唔會寄返比你)

-DVLA份表格D1 form我係郵局羅 + 一張灰色底既相片 (記得影個時唔好笑，面部表情放鬆自然就ok，呢個係影車牌張相既條件黎。) + D1 form簽名個時記得唔好簽出界，聽有師兄講咁樣係會打回頭叫你再簽過。

-郵局買張postal order 43鎊，但其實如果你有銀行戶口可以申請支票薄寫cheque比DVLA，慳返個5.3鎊手續費。

-我係香港係有1,2,3,22號牌，黎到就換左A同B牌，可以渣46同埋26，個牌齡由於有TD320既關係佢就跟返張野，聽其他師兄講如果無TD320佢就會當你新牌齡咁計。

-我無好似其他師兄咁另紙寫自己個出生地係香港或者個牌係香港考等等既細節資料，但最尾出既driving license既place of birth 係寫hong kong。實證有其他師兄係內地出世，佢就會寫China。

-睇車牌後面佢仲送左個AM牌比我，我諗係類似電動單車個d牌，時速唔可以超過45km/h (我而家醒起大家以前係香港去泰國旅行咪成日見到d鬼佬回程個程機整斷左隻腳要打石膏，好多時係因為佢地無學過但免費有呢個牌，有d商家唔知就租部電單車比佢，結果就係好多人炒車。其實無真係練過電單車既定油技術同埋斜路打八字好多時係好危險唔建議渣電單車，因為電單車係有速度同重量唔可以亂咁黎，even只係綿羊仔，另外就係路面個駕駛安全意識，無學過d鬼佬係真係亂咁黎。

--------- √ DVLA寄個牌比我之前有補信叫我補share code，我就補填返之後用second class signed for寄返比DVLA，前後三個工作天，價錢係£2.06。

√ Vivian係同我一齊郵寄申請既，佢有寄香港特區護照去，係收到車牌一個工作天之前，DVLA有用我地夾係申請入面既first class signed for 膠袋寄返本護照比佢。(重要文件都係用返first class穩陣放心d) 。

√ 有其他師兄本身用國際牌買左車保，換左英國牌之後通知車保公司修改資料有得慳百幾二百鎊!

√ 有英國車牌後可以開始做有英國車牌先做到既工，例如amazon既parcel delivery。

---------

申請時間表:

6月底申請香港牌換英國牌 / 同時間傳出DVLA罷工既消息及新聞，積壓大量申請需要處理

7月尾收到DVLA既信要補Share code / 同日用second class signed for 寄返比DVLA

8月頭Vivian收返特區護照及係一個工作天後收到車牌 / 8月10號我都收到車牌了，前後用左四個禮拜左右，算係幾快!