[#313 咁大個寶山係前面]

Sam Fang
Oct 22
2 min read

但唔掘，係咩玩法?

喺英國Shetland群島以東，有條幾乎筆直嘅海上邊界，將挪威同英國分開。望上去可能只係一片灰濛濛嘅北海海面，中間偶爾有幾個鑽油台，但水底下面係兩個世界黎。

英國個邊，仲喺度為能源政策、淨零排放同埋勘探限制爭論不停; 挪威嗰邊就工程師同科學家用最頂尖技術，日夜喺舊油氣田入面搵出新既油。

挪威電費有幾平相信唔使筆者講大家都知，係發達國家入面，係第三平，相反英國真係貴到hihi，講緊第二最貴!! 大家睇圖!

============================

挪威做左咩可以搵到新油?!

先舉一個例子好無? 以北海油氣田入面 Frigg 氣田為例，呢個油氣田喺Shetland以東大約110英里，橫跨英國同挪威邊界。呢度50年來已經掘到無晒油，但挪威公司 Aker BP 發現，氣田下面其實仲有一層薄薄嘅油層，以前無技術掘到。

佢地用新鑽井技術加上數碼分析軟件，成功喺氣田底層搵到油，油層有時得30呎厚。佢哋甚至打咗長達10公里打橫既井出黎。雖然燒左超過 9,000萬鎊，但結果相當之有驚喜——搵到超過 1.3億桶可開採原油，加埋附近其他發現，可能再多10億桶油。

相比之下，英國所有油田加埋只係剩3.3億桶。你諗下，如果政策肯放寬、鼓勵勘探，潛在仲有7億桶以上未掘出嚟。

-------------------

Aker BP係乜水?

Aker BP CEO Karl Hersvik 認為傳統油公司唔夠快、唔夠創新、成本太高，Aker BP 就好似初創公司咁靈活，用呢個優勢攞到好多好處。挪威喺政治、稅制上穩定，政黨唔會亂郁油氣政策；但英國就成日變，搞到投資者唔敢落本。

工黨上年大勝之後，承諾唔再批新油氣勘探牌照，要走「net zero」路線。不過能源大臣 Ed Miliband 考慮緊，可能比油公司喺舊油田度重新鑽探。但最大問題其實係稅。保守黨政府喺2022年引入能源暴利稅，由25%升到38%，加埋公司稅同附加費，總稅率高達78%。好多企業呻話：「搵到錢個時要俾重稅，蝕錢仲大鑊乜都無得扣。」

結果，北海油氣產量5年間跌咗近四成。美國公司Apache、法國TotalEnergies、英國Ineos都宣布撤出北海業務，去美國投資仲化算。Ineos老闆Jim Ratcliffe直情媽差英國。

=============

挪威政府做左乜野吸引油公司?

挪威既稅率其實都係高到hihi ，但30年無變，而且政府會退返71.8%探索損失俾公司，即係一齊分擔風險，俾著你係油公司都去探下啦。

挪威仲要出口大部分油氣，用收入養起1.5兆鎊主權基金，每年可以額外動用 450億鎊做政府開支。

黎到英國，你見到高層個三條茂利都已經反胃。如果英國想探返，可能都要玩幾年先見效，意味大家要捱一段時間貴電費。

仲有一個方法，就係起返多d核電廠，但始終個風險，都係比較趕客。