[#32 曼城博物館有乜睇? 又有恐龍又有青蛙搞邊科?!]

話說前排去左曼城博物館都幾多野睇，雖然細細地，但由史前生物既模型恐龍骨去到識行識走識跳既有毒靑蛙都有得係現場睇到，都咪話唔堅揪!

一入場館地下就有隻1比1大既T-Rex係度坐鎮，基本上所有人一見到全部宗哂入去睇個恐龍骨都不停打卡影相，因為實在太搶fo，到你冷靜落黎先發覺原來側邊有好多野睇，包括史前海洋生物有d乜、馬匹種類同點樣進化以及長毛象既資料都睇得到!

去到第二層不得了，勁多標本，包括如果你有密集恐懼症既話會嚇到傻左既蝴蝶、(我想講其實係超多勁靚既蝴蝶放埋一齊)、飛娥 (係大大小小唔同紋既都有，其中包括對翼有好似一雙大眼晴既花紋都有)、樹惰、豹同老虎等等都有，最爆係佢有塊牌寫住全部現場見到既所謂模型動物其實都用左真既動物毛皮(當然係等隻動物百年歸老先用d毛皮，無獵殺)，入面先係棉花同埋其他人造物料，所以d模型望落去係栩栩如生，唔係現場睇都唔會覺得可以咁真!

去到三樓就有講熱帶雨林，熱帶雨林有d咩? 就係就咁望都知有劇毒既青蛙，唔講唔知，佢地用個口靠震動係可以發出勁大聲既求偶聲，我都大開眼界唔係講笑。

肥蕎仔當然最開心，由門口既太陽系模型去到恐龍去到長毛象再去到青蛙，全場紮紮跳走黎走去勁多野睇勁忙，眼訓但又要睇哂所以結果一出場館就訓左，我都唔知應該笑佢定點

--------- √ 去博物館雖然唔使錢，但記得一個禮拜前要預先上網訂飛，因為就咁睇去到門口都有唔少人係臨時門口排隊入去。我地去個日係凍凍地有落雨，如果唔想係外面食西北風就要做好準備 (好似去迪士尼咁，玩得開心至醒得你XD)

√ 岩岩check諗住黏條link係度等黎到曼城既香港人容易d預約門票，先知道原來博物館要翻新直至2022年末先開返，我諗係要整大d先可以容納到多d人去睇!

√ 去博物館係一個好好既親子活動，教小朋友之餘，連自己都增廣見聞! 曼城仲有好多其他博物館，我地之前都有去science and industry museum，都係免費架，如果想去就呢度預約門票啦https://www.scienceandindustrymuseum.org.uk/whats-on/summer-fun?gclid=Cj0KCQjwg7KJBhDyARIsAHrAXaHMxBu6dS2zw7CdYACB178PDslCRXz1uUD-NCYuwxd9HemXTZlCitMaAoHwEALw_wcB。

√ 好期待去倫敦大英博物館睇木乃伊，聽講仲多野睇過埃及!

√ 博物館動物個part係有白鴿，而當中係有戰爭與和平既信息，希望人類唔好再自相殘殺，特別係而家呢個社會以及國與國之間既衝突，好似越黎越crazy，個訊息係會令你反思你可以做d咩去促進和平。(近排阿富汗單野真係震驚全世界，但申張正義既人好似少左，大家都只看利益。)

---------

睇肥蕎仔扮恐龍就去呢度: https://youtu.be/lCK-896jLQI

#uk #bno #uklife #英國生活 #香港人在英國 #Ukmrpr #manchester #museum #dinosaur #frog #horizon #biological #specimen #peace #nowar _______ Patreon: https://www.patreon.com/Ukmrpr Facebook: fb.com/Ukmrpr Instagram: instagram.com/ukmrpr/ Youtube: https://youtube.com/channel/UCDIhO0JrstXzy1njvsnH4Dw 我囡囡肥蕎仔IG: instagram.com/kiukiubelle