[#326 細細個就玩ratrace? 返學有獎品送提升出席率? ]

Sam Fang
Jan 1
3 min read

返學有獎品送比你，會唔會加大你返學既誘因? 好似返工一樣，日日返工先有糧出，細細個就train起，大個繼續做螺絲你點睇?

英國位於曼城嘅官立中學難 Co-op Academy Belle Vue 為咗提升學生出席率，送出免費電視、單車同 100 鎊禮品卡獎勵學生，個方法仲好work，成功幫學校大幅減低缺課情況。

校長 Scott Fletcher 2022 年上任之後推行呢個計劃，學生只要喺行為、品格或者出席率表現良好，就可以儲「功績分」，再用嚟換抽獎券，定期參加抽獎。學生功績分愈多，可以換嘅抽獎券就愈多，中獎機會亦愈大，獎品包括名牌單車、足球、朱古力等等。

佢地仲有一味野做「黃金門票抽獎」嘅計劃，畀行為表現極好、零缺席嘅學生，可以換更大嘅獎品，例如 100 鎊 Tesco 禮品卡或 JD Sports 禮品卡。唔係吹水，最近一次黃金抽獎，派出咗超過 2,000 鎊嘅獎品，其中包括一部 40 吋電視，獎畀一位喺學期最後一個星期保持 100% 出席率嘅學生。

校長話學校試過 10 日內送咗 10 部電視，全部都係獎勵好表現既學生。

校長話有啲嘢，d學生一世都未必有: 「無論我哋鍾唔鍾意用獎勵做誘因，現實係——呢班小朋友本身就無呢啲嘢，佢哋平時接觸唔到，甚至成個童年都唔會有機會接觸到。」

佢又話，學校咁多年黎見到一個好客觀嘅事實: 出席率高，連帶成績都提升左。「出席率係預測長期成就其中一個最重要嘅指標，而且呢樣嘢，係我哋大家可以一齊控制嘅。」

-------------------

除咗抽獎，學生仲可以用功績分喺學校嘅「獎勵店」換禮物，包括玩具、文具、足球卡、平板電腦等，所有獎品都係由學校預算支付。

校長表示，呢個計劃令學校嘅長期缺課率，喺過去兩年由 20% 大跌到 10.5%。英國定義係，如果學生每兩個星期至少缺一日課，就屬於「長期缺課」。

------------------

全英國又點?

相對呢間中學，全國數字就真係麻麻地。疫情之後，仍然有接近 18% 英格蘭學生喺秋季同春季學期每 10 日就缺 1 日課。

Ofsted警告，嚴重缺席問題正係急升——即係一年缺課超過一半時間，真係好癲。而家英格蘭大約有 16.6 萬名學生（約 2.3%），返學時間比唔返學仲少，疫情前只係 0.8%。

貧困地區問題更嚴重，Ofsted 最新年報指出，缺席情況通常喺貧困地區，以及有特殊教育需要或殘疾（SEND）嘅學生身上特別嚴重。

但上文曼城間Belle Vue 嘅出席率表現理想，雖然政府數據顯示，學校有接近 58% 學生合資格攞免費學校午餐，遠高於全國平均 26%。