top of page
Search

[#337 淡定有錢剩 – ILR 申請]

呢排討論ILR申請已經變成全城熱話，點解? 因為已經有由零開始BNO Visa自行填表及上載文件成功永居既案例出現左啦，本頁當然唔執輸，新鮮滾熱辣即時訪問一位居住倫敦既街坊Sam，有關成功申請既心得，佢呢個案例相信對單身或者淨係兩公婆過黎英國會有幾好既參考作用。


Sam透露佢申請永居既時間表如下:

-可以永居前10個星期開始上去睇下個系統，慢慢填哂所有資料

-前後嘗試登入睇下有無快證位

-1月16號填完表又確定有快證位即時submit，約左1月19號打指紋

-1月19號打指紋

-1月21號批


講緊只係3日前! 而且批刻極快，真心恭喜Sam! 當中有咩要留意?


-----------------

- 預先填表 -


個系統可以比你正式入紙前10星期就可以慢慢填資料，save低，等得閒又入去填下，唔使一兩日就填哂架。大家適宜預留時間，唔好咁趕。


填表期間，有一項可以比你填埋屋企人之前同你一齊申請BNO Visa既reference number。呢個位就係比內政部知道你係自己申請，兩公婆申請，定一家人申請。要填到差唔多最後嗰度先有得填呢d資料，填自己個人ref no.係第6頁，填屋企人既係第8頁。

-------------------

- 流程及搶快證 -


經佢系統填完資料，去到第7 part有比錢既選項，呢個時候有普通申請選項，以及如果有快證選項，都會係呢個時候出現。如果你見唔到快證選項，save低，同一日第二個時間再入黎睇都可能會有，同坊間話要半夜搶快證既說法有出入。


換言之，同一日任何時間都有機會出現快證，而Sam搶到快證既時間係朝早食早餐時間 8-10am 都有出現過，大家可以作為參考。


(佢同時提醒大家，如果見唔到快證選項，而你又係需要快證處理既話，就千祈唔好click入去比錢既頁面。應該save，然後離開系統，再返黎睇幾時有快證，直至你見到個選項為止。)

比完錢就會進入TLS系統，呢個位主要係比你約Center 去打指模。完成後會有一個Reference number ，記低後就需要上載文件，文件包括在英居住證明以及一系列各位就永居需要交既資料。 上載文件呢part 不是一次性登入，可以無限登入去上載文件。

--------------------

- 提交文件注意事項 -


BNO及特區護照均需要全彩掃描，每一頁都要清楚提供。Sam提醒每個檔案上限size係7.2 mb。佢由於較早就黎英國，佢亦有上載自己既香港身份證及BRP卡。


到埗英國既日期Sam有提供機票圖片證明，但並無提供airbnb住宿文件，直至佢租到屋，佢有提供屋租收據作為證明。佢在英期間每次離英，均有機票圖片或電郵文件證明離開英國既時長，佢亦以excel表格羅列每次離英既時長。


生活證明方面，佢有向公司要求在職證明，通常幾日就搞得掂，上面註明就職日期，現時尚在職，擔任職位等資料。佢交既文件亦包括水電煤council tax單。佢亦有交bank statement，但同坊間討論有所分別既係，佢只係上載左每年其中兩三個月既bank statement，並無全年交哂。


佢同時有上載既文件包括叫佢去投票既信件、NI信件、NHS信件等等。

提交文件前，系統會有3份聲明，係同意內政部去查你個人資料既同意書，呢方面都記得要完成。


Sam由頭到尾，並無附上任何cover letter，只係按程序上載文件。

---------------------

- 伴侶方面 (Dependent) -

由於Sam既太太並無工作，佢既文件相對簡單。Sam有上載結婚證書，以及在英同太太周圍去玩既生活照大概4-5張。佢太太就只係上載bank statement (有生活開支既證明)，投票既信件、NI信件、NHS信件等等，文件真係好少，但照批。


======================================

Sam並無小朋友，所以問唔到有關小朋友既注意事項，但因為同屬dependant，筆者估計同佢太太要交既資料應該差唔多，加埋在學證明就fit哂。


Sam形容成件事唔複雜，平常心處理就搞得掂，只需要提前準備就得，亦都唔使擔心呢樣擔心個樣，希望港人唔使太困惑。


電話訪問時感受到Sam既開心，筆者亦恭喜佢屬於第一批攞到永居既港人! 同時相約下年差唔多時間再訪問佢有關入藉既心得。非常感謝佢今日抽左30分鐘時間出黎同大家無私分享，亦在此祝福各位港人永居申請順利!



跟住成功過既人既經驗去行，就係成功既最佳例證。


永居成功後，你會收到電郵 "your application for settlement (also known as indefinite leave to remain) has been successful."


然後你登入UKVI ，會發現E Visa改為Settled。 


有請小鳳姐!!!!


黎緊會訪問埋有長老及小朋友自行申請成功既案例比大家參考。本頁希望提供例證素人自己都搞得掂。



 
 
 

Comments

bottom of page