[#34 曼城中式餐館有老鼠?衞生幫微服出巡查你唔係罰你錢但做左d咩更嚴重?!]

呢排好開心，有新過黎既香港人過左黎曼城市中心我間舖搵我傾計做朋友，其中有位朋友叫興哥佢就岩岩過黎無幾耐，而家係中式餐館做野，佢講左個對我黎講都幾爆既故仔。

有幾爆?! 是關有日晏晝佢做做下樓面既時候突然有個白人鬼佬入左黎舖頭話要食野，咁興哥都好正常熱情招呼客人，點知行到入間舖一半個白人就問你地餐廳負責人係邊? 興哥聽到都有小小錯愕，做乜無端端搵舖頭負責人，唔通想一齊飲茶?

正常黎講中式餐廳通常都係華人入黎食飯，間野仲要係食四川既辣野，聽佢講通常都好少白人或者其他國藉既人士會入黎食飯，一般黎講係中國留學生最多、其次係曼城聚居既華人以及其他地方既華僑過黎食飯，例如越南華僑、印尼華僑以及馬來西亞華僑等等。

興哥就話負責人唔係度，你搵佢咩事呀? 隨即呢位白人突然展示證件，話佢係衞生幫幫辦係council派黎，收到投訴奉命黎查一單食完野又柯又嘔既食物中毒事件，懷疑可能有野唔乾淨，講完未應佢個幫辦已經自己搵路走入廚房（做野勁快手），隨即好似換裝高手咁，個幫辦本身係著緊便服，你唔講你係唔會知佢係幫辦黎，將外面件褸同衫除左，入面原來係衞生幫制服，仲即刻係個袋度羅哂d架生出黎開始記錄同影相，嚇左興哥一跳即刻搵舖頭第二負責人黎傍住，以免有d咩差遲，但其實佢地兩個都係睇住佢做野，做唔到d咩阻止個inspector。

隨即個幫辦係廚房採證發現到勁多老鼠屎既痕跡，但就搵唔到老鼠，個幫辦即刻現場類似審問形式問每個員工有無見到老鼠，d員工當然齊聲話無，唔通話有倒自己米咩?! 但個幫辦都唔留手，話council極度注重食物安全、餐廳清潔程度同衞生情況，返左去之後勒令間餐廳停業三日徹底洗乾淨先比復業，無得做生意三日! 你無聽錯係3日！仲慘過好似香港咁罰你錢! 不得了! 我都上網查左一查，原來仲可以告埋你，係可以嚴重到要坐監，勒令停業已經算係咁 (請睇附圖)。

你仲要諗下個幫辦單人匹馬入黎微服出巡feel查哂所有野都咪話唔厲害! 睇黎做呢d工真係要好有guts唔驚有黑社會兇返你轉頭。然後興哥話因為咁先有得休息下黎搵我吹水，否則每日企足10-11個鐘樓面都好難抽時間出黎，但佢份工就包哂三餐。事後我都叫佢要小心食餐廳包既夥食，否則一陣中左毒就大獲。另外佢都有講部份唐人餐館一個禮拜出一次糧，cash，唔報稅，比你自己衡量點做，但我就覺得做呢d工有風險，好似無合約咁無乜保障，亦唔係正式做法。

唔講唔知，興哥話佢呢段期間返工見聞唔少，包括有見到一大棚人定期入黎飲飽食醉唱歌，開酒都開左2千鎊，佢話呢棚人係曼城china town “有勢力人士”，會收陀地，同埋有勢力範圍，我聽到都覺得好傳奇，其實度度都有收陀地我屋企我老婆都有收我陀地，差在佢地點樣收者，不過呢單野就令我諗到係咪間餐廳唔知係咪得罪左另一批有勢力人士，所以衞生幫係收到兩個投訴以上就黎做野。

今日聽佢講已經返返工，但我上council睇，原來個幫辦可以隨時再黎，睇黎呢段時間餐廳都會叫興哥做多d清潔工作make sure如果佢再黎可以點應對。

--------- √ 香港人如果想係呢邊開餐廳或者食店記得睇清楚相關條例。

√ 開酒都開2千鎊係咩玩法? 小弟眼界淺，聽興哥講野增廣見聞。

√ 歡迎大家黎市中心admiral casino搵我傾計飲下野。 ---------