[#35 船運家當終於到達英國之有d咩我係最掛住?有d乜野係必須要帶黎uk?!]

相信大家移英最緊張最煩同埋最關心既一件事就係運送家當，成日心思思係度諗究竟邊間穩陣d同平d有交帶d同埋唔會突然charge額外運輸費等等。感謝主我d家當係穩妥咁全部運到黎英國，我勁開心，好似有種失而復得既感覺，so far檢查左大部分箱都無濕、無爛、齊數，因為我覺得重新打開家當係有一種買新野既感覺，包括自己以前係香港d靚衫、電子野以及任何書藉廚房野，堅係有一種「嘩，乜我原來有咁多野」既幸福感。

咁好啦，第一件事要講講價錢，我地total係有43箱野，其中包括單人床褥、打左個木箱裝55吋電視同埋連香港個巨型靚仔垃圾筒都運埋過黎，總共埋單28000蚊港紙，已經包埋大概3000蚊既保險費 (如果要投保電子野如電視機要額外比保費)，即實際運輸係25000蚊左右(文件費+清關費大概3000，已包括在內)。計返係96蚊一個cubic feet，當時係香港已經覺得好貴，因為未有疫情同埋未有移民潮之前運費係講緊50蚊甚至更低一個cubic feet，講緊係100%升幅!

呢幾日太太Vivian有朋友問我地用呢間公司既報價，大家估下係幾多?! 而家9月既價錢係講緊126蚊一個cubic feet，講緊係30幾%升幅! 如果移民再移遲小小，我諗係要比多皮幾兩皮! 滴哂汗!

第二件事，運左幾耐同埋形式係點?! 當全世界都話係咁delay無櫃要加價爭櫃爭位爭呢樣爭個樣，幸運地我係用左3個月時間家當就到了，5月中運，8月中到，算係幾好，黎左英國學識英國標準後，凡事樂觀左，無咁chur，3個月到係bonus，最緊要d野無穿無爛。

形式黎講並唔係好似「七海」咁一個木箱咁運，而係同其他貨砌埋一齊，但佢都好似幾有條理，我係total 3板車。

第三件事，我準備左幾耐? 我執野其實好慢，又唔想chur，老早就請船運公司運d紙皮箱比我，等我慢慢搞慢慢度，前後預左一個半月慢慢pack野。但我feel到太太唔太鐘意香港間屋堆滿紙皮箱既感覺，岩既，我諗無人鐘意既。(講緊我係住500呎)

好啦，如果你問我最開心運左乜野過黎，以下物件係我係心目中既排序: 1. 床褥 – 金美夢床褥，真係可以賜我金色既美夢，因為夠硬! 好似男人咁，都要幾時都咁硬...淨! 黎到買左絲連firm，一d都唔firm，有網友係我早前個post

(傳送門: [#28 床褥揀咩軟硬度先至岩? 訓絲漣只需兩三千? ]

https://lovfang.wixsite.com/ukmrpr/post/28-%E5%BA%8A%E8%A4%A5%E6%8F%80%E5%92%A9%E8%BB%9F%E7%A1%AC%E5%BA%A6%E5%85%88%E8%87%B3%E5%B2%A9-%E8%A8%93%E7%B5%B2%E6%BC%A3%E5%8F%AA%E9%9C%80%E5%85%A9%E4%B8%89%E5%8D%83)

仲話extra firm都唔係太firm，你想唔想像到係呢度買硬既床褥有幾難... 自從床褥到左後我太太話我訓到好似豬仔咁，訓得好左勁多，咁又係既，訓醒無左一種條腰中間硬係無乜承托既感覺 (我覺得長期訓軟床褥真係會背痛，唔係講小。)

2. 電視機 – 雖然制式唔同但我都係帶左佢過黎，因為一黎香港唔係買左幾耐，二黎我唔係太睇電視，多數用黎睇netflix、打機同埋做display，英國屋企有返部電視機之後先似返一個屋企，大家坐定定齊齊睇手機射出黎既相、影片同節目。

3. 日本電飯煲 (Panasonic IH磁應金鑽西施電飯煲 (1.8公升)– 我想講呢樣野係真係比到無比既幸福感我，因為係我太太整出黎既飯，係特別鮮甜、特別美味、特別香! 對比英國超市買既臨時電飯煲，煮出黎既米係有色澤、特別圓潤、更好地吸收左水份，方知道好味既白米係配合各種菜式既主角同配角，缺他不可~ ya ya~ 係英國你想買靚電飯煲?! 難過登天或者比多d錢!

4. 日本大隻鑊 – 可以大炒特炒，炒乜都爽手d，唔使就住就住! 鑊氣足d，好炒d，配合英國新鮮d既食材，直覺地覺得好食左。

5. 我d 電子野 - 到齊哂終於可以拍多d野! 航拍機、專業相機、遊戲機同埋仲有電腦既相關野，唔使呢邊買比額外稅，慳唔少無咁肉赤!

6. 肥蕎仔既玩具我地都運左過黎，最開心其實應該係佢，佢見到個d佢認得既野開心既表情係...難以形容!

7. 有紀念價值既野 – 必須要帶過黎，唔好嫌重，係呢邊，當你遠離家人朋友既時候見到呢d物件係會特別有力量，心靈既力量係好強大架，千祈唔好睇小佢，我係將相薄、相、部份裝飾配件運左過黎，睇返係好窩心的，it keeps you going forward!

--------- 搬野注意事項:

√ 由於而家船運公司實在太忙，佢地D夥計係一日做幾單，唔係講緊星期六日，係講緊平日都有幾單! 你話癲唔癲?

√ 因為佢地好忙既關係，如果你運野係安排左晏晝或者夜晚，D夥計黎到其實已經好攰，儘量同船運公司安排請佢地朝早黎幫你pack箱同運野，係好好多! 我個時個order係晏晝，船運公司d人suppose係搬我d箱，但佢地黎到其實係拖行我d箱，或者碌住我d箱上板車，但你要知道pack野既時候其實全部野都向同一個方向，佢地咁樣搬就有機會令到你帶黎英國既液體濺出黎，如果係無蓋封好個d既話，又或者令到你有d野爛左，所以pack野記得塞公仔、衫或者紙，有防撞效果，再儘量塞滿每一箱，d野pack實左自然無咁易爛。

√ 將心比心，香港大熱天時搬咁多野係好慘，我個時係香港都準備哂利是、汽水、水同餅招呼工人哥哥，等佢地搬得舒服d，佢地對你d貨都會好d。

√ 如果你未知自己過到黎英國係住咩屋定單位，最好係箱既四面同箱面箱底都寫上號碼，等d貨到左你容易d睇。點解咁講? 因為而家我住排屋，唔似有d香港人已經隔山買牛左住得寬敞d或者租貴d有garge可以擺貨，我係將d貨放左係一間房度，要擒高擒低羅d貨、開貨、同埋辨認有咩貨到齊未，寫好號碼可以幫你唔少!

文件事項:

√ 準備好excel清單，寫清楚每個箱入面大概有d咩，呼應返上面呢一點，如果時間許可，諗下有d咩係過到黎都唔會開住 (適合可能租住屋先未買樓既人)，儘量放埋一齊，方便你自己到時買左屋，再運多一次野會容易好多。(我而家係開左大部分箱)

√ excel清單可以加一頁係大、中、細箱以及平衣箱所佔既cubic feet，方便你自己用左幾多箱可以add up大概知道自己船運既總費用。(加唔加保險就自己衡量，聽好多網友講話有唔見箱、同另一個客撈亂箱或者個箱浸濕左爛左既情況出現)

√ 申請ToR1個時係2021年既5月，用左四個工作天，聽講之前係可以快到1日就有，我用左4日已經算係咁，聽好多網友講而家要幾日甚至一至兩個禮拜既時間，儘早Plan定有so! 船運就到英國港口個時運輸公司會問你攞ToR1。

ToR1申請網址: https://www.gov.uk/guidance/application-for-transfer-of-residence-relief-tor1?fbclid=IwAR2SVyiG-K1aSuEQKnCGU1sQ5OwZsJnKe8y6lNbL08n85yVV1v56e9XJcFs

√ ToR1 表格填寫既貨值，最好就同填比船運公司既貨物清單及貨值一樣，d野一致容易d通關，否則被人扣關一黎拖遲你羅貨時間，二黎check到你帶違禁品如廚房用刀或者全新既貨物(例如電子野: 蘋果電腦就要打返你稅。)

√ ToR1 既Sample - List of Goods 清單我準備左一個sample大家可以係呢條link: https://docs.google.com/document/d/1mRjSjhGrLcsR5JCIxNdATx6ztJrE9v9b/edit?rtpof=true&sd=true&fbclid=IwAR1UqwLoiiSNAi8EoBR2d9FVlJ65FviPmub0Ll6omsC0h-5DeFuP-LuoTaY

下載黎用，改返自己資料後可以email寄比HMRC。

---------

船運時間表:

2021年 2月 – 船運公司代表上門衡量total總貨物既運送價錢

4月頭 – 同船運公司book期 / 準備護照及英國臨時地址等資料 (可更改) / 簽quotation落deposit

5月頭 – 同船運公司攞紙皮箱 / 填好貨物清單預備比HMRC / 準備好比自己參考用既Excel貨物清單表格 – show到紙皮箱號碼及內容以及大概唔同種類既箱add up既總運費價錢 / 比quotation 餘款付清

5月中 - 船運公司黎搬野 / 申請ToR1

5月中至6月尾期間 – whatapps及打電話比船運公司負責人通常係: 已讀不回或者唔聽電話，我當時係覺得間公司有小小不負責任。

6月尾 – 船運公司電郵通知d貨已寄出至英國

7月中 – 有個電郵話d貨已運送至英國途中，會係倫敦南面港口上岸 / 船運公司會問你羅ToR1 Approval

8月頭 – 船運公司英國分公司有個agent打黎話貨已到港口，大概要兩至三個禮拜運黎曼城比我

8月中 – 到貨! 熱烈慶祝感恩! (分左兩次運比我，船運公司話因為架貨車唔夠大。如果你返緊工就要請兩日假咁解。第一次運黎得廿幾箱嚇到我係度諗: 唔係卦，無左十幾箱?! 好彩後來話係分左兩板車。Anyway到左齊左大家搞掂左!) (有無睇皆大歡喜家燕姐既感覺)