top of page
Search

[#36 賭場所見所聞之見到乜野客最多? 有無西客? d機既派彩係咪真係麻麻地?!上集]

話說好多朋友都想知我呢份賭場工做d乜，岩岩黎到想搵份工返住先，又唔想太操勞，我都介紹左幾位師兄去申請份工，咁今日就唔講工作內容住但想講下返左呢度兩個月既所見所聞同趣事。


查實賭場咁多唔同花款既老虎機，玩耐左可能真係會上癮，咁平時個場有d咩類型既客人呢? 以下我會用叮噹tone羅法寶出黎既聲同大家介紹下。


第一類客: 借廁所客

好多客人入黎都問有無得去廁所，因為曼城市中心你唔入餐廳或者商場基本上好難搵到廁所，但老虎機場係有廁所既，as long as你要扮客人入黎玩，順便去，千祈唔好劈頭就話要去廁所，否則員工會話要玩機先有得借廁所。下次你再去市中心或者經過賭場人有三急，你應該知道可以去邊度。


第二類客: 黏飲黏食客

呢類客人入黎行過場一圈，表面上成日望下d機，好似想玩機，但無入錢玩，通常都會問你羅野飲羅野食，因為賭場係有offer free drinks 同餅乾，早午晚更加係有offer pastries/pizza/fries (唔係垃圾我覺得幾好食，特別係pepperoni pizza!)，所以吸引左呢類人黎黏餐，食完或者飲完就會走，同事都會serve。但公司好似更新梗policy只會offer飲食比玩緊既客。所以如果你下次係市中心肚餓或者口乾，入黎賭場放鬆下，呢度係有10p既機，入1鎊都玩10次，但你就可以同朋友坐下休息下玩下機，有冷氣、有野食、仲有野飲! (呢排曼城熱到爆唔知點解，但夜晚可以十幾度凍到傻左)


第三類客: 候生仔岩岩畢業毛都未生齊客

日日都見好多唔同種類既人，見得多而家都大概可以講得出唔同人種佢地既樣反映出黎既年齡大概係幾多歲。好似白人咁好多候生仔鐘意入黎玩下機，但佢地好搞笑，行到入黎未查佢身份證就自動問係咪要睇身份證... 比著我係澳門被人check可能會覺得有d老尷，我老婆被人check佢就梗係好開心啦。


咁通常佢地都係成班人咁入黎，就好似岑晚有堆候生仔玩到11點，其間兩個鬼就走先，仲串剩低個幾個: “you are going to miss your train!” 搞到我同班同事係度喪笑。另外，我地舖頭都有好多候生鬼妹入黎玩，想講一句佢地係真係好靚，仲要著得好性感，難怪好多師兄師姐都係討論區講一句，有d咩最唔應該帶黎英國? 老公或者老婆 。


黑人就通常yo yo地咁樣入黎，佢地望落去好似好惡咁，但其實如果你大膽d say hello，佢地既笑容係可以好親切，甚至係有一種 “點解你可以親切到有小小可愛既咁覺”，呢份工係要成日主動認識客人以及介紹自己，有d客望落似阿爾蓋達我都會熱情招呼，同佢地傾落計，我係認為黑人好friendly好helpful，千祈唔好比佢地外表兇到你，否則錯失左好多交好朋友既機會!


其次較少既客就係有阿拉拍國家既客人以及歐洲客人，都係十分好玩同埋好講得笑，再其次比較少既客就係有東南亞同埋中國人，東南亞人成日拗水吹因為佢地識廣東話，華僑黎，中國人就成日都帶住千幾二千鎊係度玩，認真講一句，佢地係最有錢玩機既，其他種類既客通常都賭得好細，100鎊已經叫好多。


第四類客: 老鬼客

有d客人你係一定知道佢地叫咩名，因為佢地日日黎，仲要打躉打足幾粒鐘甚至係直至你個shift完為止，傾落計先知佢地好多都住council house，有政府養，成日羅住個小小錢黎賭諗住可以發舖大達，但更多時間係佢地無乜細藝，所以就黎賭場過日子。(by the way我同佢地deep chat，發覺英國政府有個計劃係比住緊council house既人用六折/七折價錢買佢地自己間council house，勁抵，但就會鎖五年唔準賣出去，五年後可以賣出去個時好似仲可以用市價，呢方面我搵緊資料，遲下再出文。)


呢班客我地係湊得好好，佢地有時玩部機會玩到十分high，特別係中jackpot，帶動全場氣氛!由於佢地黎得實在太繁密，佢地甚至乎係識哂成間舖既同事同埋互相認識成日黎呢度玩機既人，都咪話唔犀利，佢地亦係貢獻舖頭穩定收入既最大來源。


第五類客: CashMatch客

賭場有咩招成日引人黎玩? 就係cashmatch。Cashmatch係咩黎? 就係你可以係賭場用電話sign up後，佢會定期send短訊比你，話會比十鎊/10 free spins你玩，前題係你都要入10鎊，入左既錢係退唔到，除非你係玩spins期間嬴到錢，咁個d錢就可以帶返屋企。


有勁多，勁多，勁多 (因為真係太多，要講三次) 既客都係因為呢味野黎玩老虎機，抱住僥倖既心態、覺得點都會中多過20鎊既心理、覺得人地中自己無理由唔中既想法狂賭。的確，有小部分既人係會嬴到jackpot，有小部分人嬴返小小錢但失去多多時間，有大部分人係credit 歸零返屋企，或者係撞左邪咁係咁去cashier用debit card 羅錢玩機 (所以賭場有set上限每日每人最多withdraw 300鎊，300鎊係呢度算叫做幾多，唔好同香港比較)。


賭呢味野沉左落去好難上返黎，特別係男人，千祈千祈千祈唔好掂呢味野，同叫雞啪丸飲酒食煙一樣，毒性極強大，一定會輸身家! 無錢，會連尊嚴都無，所以要自強。


我眼見有個熟客朝早中400-500 jackpot同佢傾計，細細聲話嬴左錢不如走啦enjoy your day with great meals啦，佢都仲繼續賭，結果係得返80鎊先走人(佢帶黎既金額，因為朝早少客所以我喼住佢點玩。)


又有見過中左jackpot好開心識走人既客 (我都戥佢開心)，第二日第三日第四日返黎玩，但d錢又輸返哂比間舖。大賭變李嘉誠係好難，除非你有極強自控能力，但有極強自控能力既人，通常都做其他專業工作，你睇c朗訓練特輯，日日一樣鐘數操體能、操波、操肌 (當然都有操下 something else )，記招推可樂飲水單野大家都應該知，佢係極健康極自控有目標既王者，非一般人可以比較，但普通人如你我都可以由小事做起自控既習慣。


第六類客: 新客

入左黎問有乜玩既客，呢類客係要serve，同埋介紹有咩機佢可以玩，例如輪盤、777老虎機、robinhood老虎機、埃及妖后老虎機等等，仲要問下佢飲咩，介紹公司既promotion同埋請佢地sign up，因為分分鐘佢地係公司未來既資金來源。


---------

√ 賭場分新機舊機，新機最高Jackpot 500鎊，最低100鎊，玩新機通常都好多遊戲但玩法千篇一律，螢光幕大又靚，易d吸引你埋去，但見到賭客玩呢d機通常都輸。鬼咩，計機率唔輸就假。


√ 舊機金額細細低至10p就玩到，1鎊可以玩十獲，Jackpot最高25鎊，最低50p或1鎊。你玩左幾獲之後佢通常都會比你hold住某一個column已出現既圖案，然後nudge其餘兩個column既圖案，變相你其實可以有機會同技巧操控到部機容易d令你嬴錢，派彩係細d但可以keep住嬴，嬴面較高! 我見過有客中25鎊jackport，連續比三次機會你nudge三個column既圖案，即係比你hold住全部圖案三次連中三次jackport，75鎊輕鬆入袋無難度。


√ 比你揀你想大機玩得好興奮輸q哂d錢? 定係細機金額細悶悶地嬴小小然後開心唔q使輸? ---------

太長... 下集再續講工作內容。









 
 
 

Comments

bottom of page