top of page
Search

[#39 其實，香港人先係戰鬥民族?]

唔知你有無發覺，經濟層面黎講，香港人，其實先係...戰鬥民族?


首先要澄清呢篇唔係自J既文章，筆者亦知道呢個係一個大既課題黎，但係英國生活左一段時間之後，從小事去觀察，就發覺香港人其實係好鬼chur，不停發掘新野，不停學習，不停地尋找商機，甚至乎所謂既拍片youtuber都好似雨後春筍咁湧現，香港人就係唔停得! 24小時不停充實自己、不停去玩、不停去拍片去分享，就算爆肝香港人都chur盡博盡，係名乎其實體現work hard play hard既民族。


由於曼城租樓已經去到極難租到既情況 (又極少比較筍既租盤)，近排為兩至三個家庭睇樓租樓既過程入面，都發覺每個移英家庭都有全盤大計，絕少話過黎hea兩個月先再睇下點，反而每一個都周身刀張張利，有小小獅子山下既精神，梗有d窿路去做自己想做既野，包括搵食、學野 (工作相關就例如學做電工、plumber、裝修師傅... 學唔同既興趣就有滑雪、踩板、爬山單車... 應有盡有，總之一定有d野搞，好大程度仲要係同經濟相關。


就好似筆者之前join既曼城得閒飲茶group一樣，召集人已經開左舖搞左間有香港菜既餐廳、聚會入面有車房專家亦都已經密鑼緊鼓準備開車房、有HR達人不停refer工作比新到英國既香港人，大家盡自己一分力貢獻香港民族呢個社群，筆者作為其中一個member，係勁感動勁開心，彷彿舊時的英治香港在英國這邊重現。彼此關心、彼此互助、彼此出一分力，絕對不是之前十年被共產政權滲透搞到香港人冷漠互對的境況。


我公司既同事黎自五湖四海，有英國本土人、俄羅斯、保加利亞、希獵、羅馬利亞、意大利、拉脫維亞，甚至乎係有菲律賓... 因為公司呢間舖係市中心，目的係想湊哂曼城所有既客，我有諗過識唔同語言係請我既原因之一。


係同同事傾計其間了解到佢地既生活模式後，對照香港人既話，香港人呢個民族係勁勤力，完全係拼博到暈咁濟。基本上，佢地大部分收左工都諗點樣休息，點樣party，又或者做自己鐘意既野，例如去pub、隊weed、界囡，去玩去諗點樣使左d錢佢，多過諗點樣不停增值自己、投資、成立屬於自己既品牌/公司等，同香港人好唔一樣。筆者係度諗亦都可能同我而家份工係相對基層既工有關，可能d人唔係太上進或者無諗咁多野?


而佢地係可以用 “使哂份糧唔太mind，最緊要happy齊齊high” 作為佢地座右銘，可能同退休有pension攞有關都未定。(英國做足35年野有扣NI，68歲後政府養你會有full pension攞。最基本就要做足10年先會qualify有pension，政府按比例咁計比你。)


當然，外國有好多人都因為研究自己既喜好而成就左當今世界頭十既大型品牌公司，但對比底下香港人真係勁好多，做d野係有quality、efficient同effective好多，而最爆個樣野係，香港人係本質上全部野自動波，唔使等你開口已經自己研究哂，就算挨眼訓都同你死掂佢，有哂答案，點做，幾時做，邊度做，有香港人做員工既老闆可以話係十分幸福，前題係呢個老闆比返相對好既福利比香港既員工，否則，香港員工已經搵到更加筍既工去做，多過係度聽你支笛。

而外國好似成日等order咁，相對reactive，你推佢佢就做小小你睇，你擰轉面佢可以即刻停手，無他，其實全世界都一樣，有得偷下懶why not? 做多左唔會加人工，少做少錯，停留於收工就走齊齊happy既狀態。


但香港人做野，特別係英國為我地開一扇門之後，我地都好感恩，一定負責任地做好個樣野，而且筆者有比較過香港人其實無論係國際視野、工作態度、學歷以及家庭資產上都係有一定既優勢存在。


有時，筆者成日係度諗，造就香港過往30年輝煌成就的香港人，其實，真係一d都唔簡單。黎得英國到左埗既你更加係過五關斬六將，通過左幾百樣野既準備同精密計算先過到黎，所以，千祈唔好太過杞人憂天。香港人係拼博得黎會守規舉唔犯法、香港人精神去到邊都會有一番作為 (我又諗起維基搞到香港電視風生水起)，香港人可能先係真正既... 戰鬥民族。


--------- √ 香港人了解自己在世界入面自己既位置及扮演既角色好重要。知己知彼認清自己既競爭力，為你未來既下一步打下穩固既根基。


√ 香港人永遠打不死既拼博精神同競爭力，非其他民族可以媲美。


√ 既然離開了comfort zone，不妨勇於追尋一下一直以來在香港想做但沒有做的事? ---------





 
 
 

Commentaires

bottom of page