[#41 曼城市中心的日與夜 - 有咩係連本地保安哥哥都打醒十二分精神? ]

仲記得我曾經拍片講過香港人臨時工可以返住先收支平衡之後再慢慢搵返本行個條短片嗎?

(傳送門: https://lovfang.wixsite.com/ukmrpr/post/26-%E4%B8%80%E8%BF%94%E6%97%A9%E5%85%A8%E9%83%A8manager%E4%BF%82%E9%BD%8A%E5%BA%A6%E7%A9%B6%E7%AB%9F%E6%90%9E%E9%82%8A%E7%A7%91-%E4%BF%82%E8%B3%AD%E5%A0%B4%E8%B3%AD%E5%AE%A2%E5%8F%AF%E4%BB%A5keep%E4%BD%8F%E5%AC%B4%E9%8C%A2%E7%9C%9F%E5%94%94%E7%9C%9F )

咁係條片入面就講過曾經去攞車既時候就遇過d危險野，咁係咩危險野? 賣個關子先

其實曼城日頭係幾可愛，繁華得黎市中心多人但感覺唔係話特別危險，如果天氣好陽光普照係piccadilly garden甚至係好多靚仔靚女出沒同埋中間有個噴水池，洋溢住一片開心歡樂既景象，仲有好多小朋友係度玩水，有時仲有人賣藝演唱，個時黎面試既時候就有幸見到，而通常呢個廣場都有一至兩位阿sir係度睇水，有時仲會截查下人睇下證件咁樣，我曾經係噴水池附近放break食三文治，(舖頭行出黎2分鐘就到) 見到阿sir係截查緊三個望落有黑工feel既中東人大隻佬。

咁當呢度夜幕低垂，又會發生乜野事? 由於我每次返放工其實都會經過曼城市中心一d比較陰暗既橋底同埋望落治安比較差既地方，一到週末夜晚個d時間呢，講緊係夜晚8點後就牛鬼蛇神出沒，甚至我會用群魔亂舞黎形容。

有次將垃圾掉去舖頭後闌個條橫街(街名叫Back Piccadilly)既大垃圾箱度，店長Adam見到我就開玩笑語氣咁講:

adam: Hey Sam，你知唔知前幾日呢度先有女仔係度被人rape?

me:我聽到之後有d愕然，然後問: here? Under the daylight? 呢度雖然話係橫街但都好揚噃?

adam: 呢d事係呢度發生好common，而呢條橫街都好興stabbing，所以夜晚出去倒垃圾都要注意，最好兩個同事互相守望。我覺得有點兒難以置信: 舖前舖後差咁遠?

就繼續話: welcome to the city of crime!

我聽完第一個念頭，我係咪真係要比阿囡係度讀大學，雖然佢只係3歲，然後後來同食蕉哥哥傾計 (白人，身形有D份量，年紀細我幾歲但就1米8幾，佢d博擊比我睇過片都好似幾犀利)，連佢都話: piccadilly garden is somewhere I always be cautious, you need to watch out, Sam。

後來同其他同事反覆印證，都發覺口供係一致。呢個市中心位除左老強、刀仔插、單車搶野黨樣樣齊之外，d人仲好興醉酒+隊草 (成條街都有四至五間pub)，但你會發覺一件好攪笑既事，就係本地既女，特別係靚女(係我眼中) 依然都係著得好少布，好似絲毫唔覺得唔安全咁，周不時見佢地周五周六晚出動去蒲去wet ，咁我收工都有親眼目擊過d仔渣住支酒飲左一兩杯係條街度yo女，係大大聲地yo，離遠望仲以為佢見到fd所以嗌定先，點知行到埋去先發覺條女唔so佢，但佢就已經比定手勢想同條囡high-five。以前係香港老蘭都見過類似既溝女打招呼方式，但就無咁誇張。

有次週六晚我收工，大概11點左右，我仲記得係落緊微微雨，去攞車就行慣常路線，要穿過橋底同比較僻靜既地方，咁今次行既時候就見到兩位白人女士係一個Store Street 一個corner位度隊緊草，係我經過既時候仲好大聲yo我，有小小似想yup我埋去，我當然扮見唔到加快腳步。

然後行多3分鐘就黎到我架車個泊位既時候，見到有個白人男人同我原先行既路線90度角咁向我cut埋黎，我下意識就放慢腳步睇下佢想點先。然後佢就話: where are you heading to? 見佢突然開口其實我唔想應佢，但距離勁近我就隨口講左句: just getting my car。我見佢神色有d奇怪，然後佢就黎料了: you want to have some fun? 然後你知啦，落緊微微雨佢塊面濕+埋個神情係有小小creepy，最難頂係佢講緊野期間仲要小步小步咁烘埋黎我度。當仲有兩步距離既時候我就收遮同時抖動把遮: “Back Off please”。佢聽到就停低左，可能覺得我會用把遮黎做攻擊武器。

而我既女仔同事都係等老公/男朋友渣車接或者坐的士，even只係行10-15分鐘路程就到既屋企，佢都選擇坐車，當時我未知市中心原來咁惡名昭彰，後來問多幾句就知發生咩事。然後佢地仲同我share，話如果男/女一開口就講奇怪野通常都來者不善，我既女仔同事聽過 “hey baby face”做開場白，原來係佢地角度聽起上黎係好creepy，特別係年紀比較大既男性同年紀較細既女性講既話。所以d同事都互相傳授左 “退敵絕招”，萬一真係被人夾住，就使出隨身帶備既 “防狼噴霧” (堅係勁細支但噴中都幾係野)、“攻陰”、或者”柯尿”整污糟自己。

So far 我都好好彩，未發生過不如意事件，出入都好小心，特別係市中心區域。我都有問食蕉哥哥點解咁鬼多用刀捅人事件，純粹捅人無羅錢無剩，食蕉哥哥cool cool地講左一句: because they are high (they are on drugs…)。

睇到呢度你會唔會超級擔心去市中心? 其實通常都係禮拜五同禮拜六夜晚先係咁，特別係如果有球賽、拳賽或者欖球賽事就更加瘋狂，但平時星期1至4就相對平靜。

--------- √ 超市買刀係要show證件，因為之前太多knife crime。

√ Crime既類別仲有好多種，呢排睇到好多谷友架車被人爆玻璃，原因係放左野係車度，如果可以請儘量放後尾箱，起碼睇唔到，車廂就千祈唔好擺貴重野。

√ 如果有危險，唔好猶豫即打緊急電話999搵警察，放心，佢地唔會遲39分鐘先到。

√ 對比香港，呢度夜晚出街係要be cautious。

√ 唔係想嚇你，但連本地人都覺得有d crime好common既時候，對初黎報到既人都係小心d好。 ---------

#uk #bno #uklife #英國生活 #香港人在英國 #Ukmrpr #manchester #crime #stabbing #vehiclecrime #rape #weed #police #999