[#44 賭場所見所聞之同事篇 – 佢地係咪真係咁nice ?! 同事其實係東歐大家庭? 下集]

情景題: 比你係區域經理，呢間係市中心咁旺既老虎機賭場你會放咩同事落去先? 以我觀察所得，管理層清一色英國白人，到舖頭經理就有俄羅斯人，supervisor就有東歐人，到普通同事有菲律賓仔、保加利亞人、羅馬尼亞人、匈牙利人、意大利人、希臘人、仲有東歐一d細國家既同事、牙買加人、當然仲有我呢個識兩文三語既香港仔。呢間舖好熱鬧，成日都有高層落黎巡舖，所以我都成日借機望下d高層究竟係咩人，八下佢地落黎其實係關心d乜巡d乜咁樣。而佢地咁樣好似八國聯軍咁放唔同同事係度，我就咁諗覺得純粹係想湊哂曼城黎自唔同地方既客，實現起碼有一個同事同d客講到local language的目標。

由於份工既內容實在係簡單，手板眼見功夫既工作其實你我都識做，基本上同事都好nice，然後發覺東歐同事移居英國打工多數都因為佢地本身國家個經濟麻麻地，而成個歐洲大陸又得英國叫做經濟係好d。所以當佢地問我做乜咁捨得香港份高人工過黎呢度挨世界，我個下又真係好難直接答佢，而我而家都慣左唔答真實原因，有時搞個gag更好，例如如果女同事問就會答: 梗係過黎識下東歐靚女啦，增廣見聞下; 男同事問就會答: 梗係過黎識下英國靚仔啦 (扮gay)。

咁有一次就同個希臘仔deep chat，見證左佢講希臘話寫希臘文既神奇，佢仲up左好多希臘神話我知，加埋d 傳統知識，簡直同中華文化一樣咁博大精深。但佢都有講佢個國家堅窮，罪案又多，雖然有好多希臘靚女，但佢都走過黎英倫闖下世界搵真銀。睇新聞都知希臘成日借錢同債務違約，比你都想脫離地獄往外闖下，佢話男人唔可以窮會無囡，我就話其實任何人都唔可以窮。

又有一次同一位羅馬尼亞金髮靚女同事傾計，佢真係瘦到呢... 我問佢幾重，佢話90鎊，係90鎊，係90鎊呀! 好恐佈，我諗條腰得22或者23，而佢竟然係24歲已經結左婚仲要生左個囡。有次佢返早遲到要跑返黎，返到黎之後同我講個人好暈同埋肌肉好攰，d同事係度笑佢唔食多d野而家跑到成隻狗咁 XD。然後，好多人成日都話英國好多比較肥胖既女人，東歐靚女過黎係殺哂，繼我話其實香港女仔身型過到黎都殺哂，況且好多白人都鐘意亞洲女人。早前係討論區睇過好多移英港女都話最錯係帶左老公過黎 (講笑) 。

同得同事傾計當然都要同下經理哥哥傾下計啦，咁間舖既店長叫Adam，芳齡30，仲細過我，話說疫情前佢好鬼爽全國周圍遊埠巡舖，疫情後佢就要暫時寄居住係呢度先，所以佢話佢都好悶下，寧願遊埠去下英國唔同城市食下唔同既fish & chips。除左講工作內容，我當然都想八下曼城唔同區域既治安情況同受歡迎程度，方便我決定邊度買屋好d。由一個local英國仔講邊度好同唔好，對比地產經紀，我比較過覺得好似真實d，佢都同我講左佢成長個區既詳情我知，仲問我做乜咁快置業，不妨等下望下先咁話。

我諗間舖最好人個兩位當數兩位副經理，都係俄羅斯人，超layback，好chill，你唔做過火野佢地基本上唔會出聲，但求返工have fun! 可以話係樂也融融黎形容，逢親返工，見到佢地兩位都好hapi，其他同事都好hapi，彷彿好似開party一樣!

無錯呀，就係其中一位男俄羅斯副經理將神聖既covid病毒交左比我，我諗佢都應該將呢樣咁神聖既野帶左比其他同事，客人就... 更加唔使講了 XD 係香港人既角度佢係超級缺德架，病左唔戴口罩，但係佢既角度黎講，戴左口罩係對佢自由發聲既抹殺，所以佢係堅決唔會帶咁講，就同好多男人一樣，有d野都堅決唔會戴。所以要學識對呢種人say no，或者離他們遠遠的，係我既角度，同危險人物無分別，簡直係鐵一般既生化武器。撇開呢樣唔講，佢又真係幾搞笑既，係同事喜愛人物之一。

另外一位女俄羅斯副經理就39歲，但顏值28歲，仲有一頭金髮，係歐洲人黎講叫幾靚下，所以我心入面就諗以前俄羅斯多女特工堅係唔出奇，使出美人計不得了，佢仲要係跆拳道黑帶，名副其實睇得又湊得。

之前返工個時仲識左個岩岩過黎既香港同事但返night shift無得deep chat下，佢係香港做開國泰地勤同蘋果既genius，黎到呢邊不得了，佢搵既人工高勁多，後來覺得係間舖撈夠了又有人介紹，而家係曼城返緊英航地勤，除左羨慕還是羨慕，恭喜佢已經係度settle得幾好，而故事又教訓我識人好過識字 XD。

Overall黎講其實係度做都幾輕鬆，除左人工低之外，同事相處都幾好，無乜小圈子，管理層都好nice，日日既感覺好似返左聯合國一樣，幾搞笑! 而如果你睇過之前賭場之客人篇: 傳送門: https://www.facebook.com/Ukmrpr/posts/139379135062977 你會發覺d客又成日有笑料送上，真係笑都笑到抽搐唔係講小，係度做左一段時間後，係個賭場識左唔小岩岩過黎既香港人，又識到唔同國藉既客人，有d仲要係做裝修添，討論過如果我買左屋都可以請佢地幫手; 又有d係日日玩幾百鎊既客，原來本業係經營外賣店，勁多cash，相信都有幾層樓收租。

聽左客人既生意或職業後，發覺呢度真係各適其適，只要你有idea，加返小小promotion，真係可以試下自己創造下屬於自己既天地。

--------- √ 公司同事東歐大集會，有時佢地傾計會用某一種語言，係類似羅馬尼亞文黎，所以當有足夠數量既東歐人過黎呢邊做野，其實佢地可以講返自己語言，係彷彿好似第二個家咁，可以係表達任何野都好清晰。

√ 香港就兩文三語，佢地呢邊其實一樣，一係識西班牙文，一係識某一種東歐語言幫助溝通同搵食。

√ 問左幾位東歐美女，發覺佢地都係搵返同鄉結婚，並無入鄉隨俗嫁比英國人。

--------- #uk #bno #uklife #英國生活 #香港人在英國 #Ukmrpr #manchester #casino #colleagues #staff #nice #management