[#76 係英國要做環保撚? 垃圾唔亂咁掉係公民責任對環境都好d? 去回收場有乜野要注意? 亂掉垃圾有乜後果?]

係英國個人感覺公民意識都比較高，對垃圾處理有比較好既方式去做，唔會只係好似某城市咁全部掉去堆填區，更加唔好講話某個區仲要成日非法傾倒泥頭，真係聽見都皺哂眉頭。呢邊公民都比較重視減少使用、重用或者循環再造。

大家如果住house通常都有一個垃圾桶係比你掉唔可以回收既普通垃圾、一個係可回收既垃圾例如紙類廢物，仲有一個係廚餘同花園廢物，so far我見鄰居都做好哂分類去掉，唔會亂咁掉。

話說呢排我買左好多傢具又要砌，真係搞到一頭煙，砌完之後除左有得訓舒適既床同埋坐係勁舒服既梳化之外，隨之而黎就係處理本身包住佢地既紙皮同發泡膠，千祈唔好睇小個量，係堅多😵‍💫。咁每間屋既垃圾桶雖然話都唔細，但其實塞唔哂咁多紙皮，當然你可以同council申請多個垃圾桶，但都係要比錢，呢個時候就要去就近既大型回收場度掉垃圾一盡公民責任。

係Google map度serach recycle就即刻睇到有回收場，只係七分鐘車程，即時group埋d野車去掉，但都足足塞爆左兩大車，分兩次先掉得哂，搬完都有小小身水身汗。去之前我有留意到google comments話入回收場都要等30-45分鐘，所以呢度都有小小tips，我揀左星期六好多英國人都出街shopping同玩既時候走去掉垃圾，又或者神咁早回收場一開門朝早八點就仆去掉，咁先唔會捉蟲同哂左自己時間。結果我去到同我預期一樣超好彩唔使等😮‍💨。

回收場回收既種類都好多下，除左一般常見既紙皮同木條之外，呢度連汽車電池、雪櫃、電視、大型電器及地氈等，仲有好多不能盡錄都會回收，分門別類好清楚，但回收場入面可以泊既位就真係少，我諗一次堅係最多得大概十幾至二十部車可以泊係度同時掉垃圾，仲未計可能有人會想泊正個位最近距離先掉，難怪平時d人都話要等。平時回收場通常開朝早8點收晏晝3點或4點，一星期七日唔休息。

好啦，你話有無得偷雞唔去回收場掉，係門口等council倒垃圾既人倒埋? 超唔鼓勵咁樣做，另外答案係佢地亦唔會處理呢d垃圾，你有你放，佢有佢唔倒，所以做得英國公民都應該自己垃圾自己掉，唔好失禮香港人就the best。

亂掉垃圾有乜後果? 香港隨地拋垃圾罰1,500已經好甘、最高仲可以罰25,000同監禁6個月。英國就有定額罰款80鎊，如果捉到起訴埋最高可以去到2,500鎊。另一種亂掉垃圾佢地叫flytipping，可以罰400鎊，最高可以去到50,000鎊同埋有監禁既風險，刑事罪黎，老土講句，切勿以身試法。

如果大家唔想自己車黎車去，但又有勁多垃圾想倒可以點做? 租個skip掉垃圾超方便放門口只係二百幾鎊，我見好多人裝修都有租呢類既skip，大家都可以考慮下，隨手搵到條link你可以望下個size同價錢。

https://cheapskips4hire.co.uk/skip-hire-price-guide/

---------

√有錢既香港人租skip即可，掉哂初頭搞哂裝修既廢料、訂傢俬既紙皮同埋拆家當既大量紙皮。要注意如果係掉廢料個價錢係唔同掉一般垃圾。

√ 亂掉垃圾罰勁多唔好亂試，做個良好公民建立美好互助社區 (呢句野有無北韓feel)，最緊要救下個地球。

√ 作為屋企既男人砌哂所有傢俬... 原來都幾甘，但其實可以用一d app比錢搵人砌，如果自己搞唔掂記得搵人幫手。

√ 如果你有大量紙皮，有時放上gumtree都會有人認投架，好多英國人都好環保，免費轉讓紙皮被人搬屋。

---------

#uk #bno #uklife #英國生活 #香港人在英國 #Ukmrpr #reuse #recycle #reduce #3R